Pikinini i Kirap Lain Taim Em i Stap Long Bel
WANPELA saveman bilong bipo, nem bilong em Aristotal, em i tok, taim mama i karim nupela pikinini, kru bilong em i olsem i no gat tingting samting insait long en. Winim 2 tausen yia bihain long taim bilong Aristotal ol man i gat wankain tingting olsem. Long 1895 wanpela profesa long Yunivesiti bilong Pensilvenia i tok: ‘Taim mama i karim nupela pikinini em i no gat save long kru bilong em.’ Tasol stori bilong ol man bilong bipo i no wanbel wantaim dispela tingting; ol dispela stori i tok, taim pikinini i stap yet long bel bilong mama em i lain long planti samting, olsem long ol samting i kamap ausait long bel tu. Long nau ol saveman bilong saiens i tok, tok bilong Aristotal na bilong dispela profesa bilong bipo i no stret, na toksave bilong ol man bilong bipo i stret.
Pastaim kru bilong pikinini i liklik tru, tasol taim kru i bikpela pinis em i narapela kain tru! Taim pikinini i stap 3-pela wik tasol long bel bilong mama, kru bilong em i kirap. Wanpela saveman (Richard M. Restak) i tok, taim pikinini i gat 3-pela wik insait long bel bilong mama, kru i liklik samting tasol. Tasol klostu long taim mama i laik karim pikinini, kru i kamap olsem nambawan samting tru bilong bodi, winim ol narapela samting. Taim kru bilong pikinini i kirap, i gat ol liklik hap sel inap olsem 125 tausen, na bihain em i go bikpela olsem 250 tausen insait long wanpela minit. Dispela man Restak i tok moa olsem: ‘Bihain ol dispela liklik liklik samting olsem sel i kamap planti moa olsem wan handet bilion, em ol sel i as bilong kru i ken mekim bikpela wok.’
Taim kru i wok long go bikpela ol rop i bung wantaim ol narapela hap rop bilong kru ol i kolim nuron. Long namba 8 wik bilong pikinini i stap long bel ol dispela planti hap bilong kru i kamap planti tru olsem planti milion samting na ol i kirap mekim wok long kru bilong pikinini. Wanpela buk (A Child Is Born) i tok, long dispela taim long pinis bilong namba 2 mun samting ‘olgeta hap hap bilong bodi i redi pinis bilong mekim wok.’ Olsem na em i no stap moa olsem hap blut tasol, nogat, em i kamap man pinis. Tasol ol man i orait long rausim pikinini long bel ol i tok pikinini i no stap laip yet long dispela taim.
Pikinini i kirap na meknais insait long bel bilong mama taim em i gat 7 na hap wik pinis. Na long 13 wik samting bihain em inap pilim swit bilong ol kaikai. Long namba 15 na 16 wik pikinini i kirap long pulim win na em inap susuim pinga, na opim maus samting olsem em i laik slip, na ai i meknais liklik. Olsem na dispela man Restak i tok, inap long skel bilong pikinini em inap mekim ol narapela samting taim em i stap long bel bilong mama, olsem harim, na lukluk, na pilim swit bilong kaikai samting, na harim smel, na pilim ol samting. Tasol maski em i mekim ol dispela samting, ol man bilong rausim bel i tok pikinini i no stap laip yet.
Taim mama i karim pikinini dispela pikinini inap tingim ol samting em i bin lain long en taim em i stap insait long bel bilong mama, olsem klok bilong mama. Em i bin harim klok bilong mama long olgeta taim, olsem taim em i laik slip, o em i kirap, o em i malolo. Dispela i helpim em long i stap belgut.
Kru bilong pikinini i lain long ol samting insait long bel bilong mama, na tu, em i wok long save long ol samting i kamap ausait long bel bilong mama. Wanpela dokta (Thomas Verny) i tok, “Sampela pikinini, taim ol i stap yet long bel bilong mama ol i save laikim ol gutpela musik olsem bilong wanpela man bilong bipo, em Vivaldi.” Narapela dokta (Dr. Clement) i tok, ‘narapela gutpela musik ol i save laikim em bilong wanpela man bilong bipo, em Mosart. Taim pikinini insait long bel i harim dispela kain musik long plet o kaset samting, em i save stap isi tru na em i no meknais tumas . . . tasol sapos i gat ol narapela kain musik bilong pairap bikpela, ol i kolim “rok,” pikinini i no save stap isi—i olsem em i no laikim dispela kain musik.’
Wanpela dokta (Anthony DeCasper) long Yunivesiti bilong Not Karolaina i wokim wanpela giaman ai bilong susu bilong save long mak bilong strong bilong pikinini taim em i susu. Taim pikinini i lain long senisim pasin bilong em long susu, dispela inap helpim em long makim wanem kain ol samting em i laik harim, olsem nek bilong wanpela man o wanpela stori samting. Ol dokta i traim dispela samting long wanpela nupela pikinini em mama i karim em wanpela o tupela aua i go pinis, na pikinini inap save long nek bilong papa bilong em, long wanem, taim em i stap long bel bilong mama, papa i bin toktok long em. Na taim pikinini i harim nek bilong papa, kwiktaim em i lusim krai na em i stap isi tasol. Na em i mekim wankain pasin taim em i harim nek bilong mama o pairap bilong klok bilong mama, em ol dispela samting em i lain pinis long harim taim em i stap yet long bel bilong mama.
Dokta DeCasper i mekim narapela samting olsem: Em i makim 16 meri i gat bel long kaunim wanpela stori bilong ol pikinini. Taim ol dispela meri i laik winim 8-pela mun samting, dokta i tokim ol long kaunim dispela stori inap tupela taim long olgeta de. Bihain, taim ol dispela mama i karim pinis pikinini, dokta i putim ol dispela pikinini long dispela giaman ai bilong susu, na ol i harim dispela stori em mama i bin kaunim taim ol i stap yet long bel, na ol i harim tu wanpela nupela stori bilong ol pikinini. Dokta i lukim pasin bilong ol dispela pikinini long pulim susu na dokta i save ol i laik harim dispela stori ol i lain pinis long harim taim ol i stap long bel. Olsem na yumi save, olgeta pikinini i gat wankain pasin. Maski ol i gat narapela narapela krismas, ol i laik harim stori ol i save pinis long en, maski ol i harim pinis planti taim. Ol i no laik harim tumas ol nupela stori.
Bilong pinisim tok bilong em DeCasper i tok: ‘Ol samting pikinini i harim taim em i stap insait long bel, em i laik harim tu taim mama i karim em pinis.’ Na Dokta Restak i tok long ol save ol i kisim taim ol i skelim pasin bilong ol nupela pikinini, olsem: ‘Pikinini i stap insait long bel em i save lain long kain kain samting—em inap save long nek bilong mama, na long strong bilong nek bilong em, na pikinini inap save long wanem kain stori em mama i wok long kaunim. Olsem na yumi ken tok, pikinini i stap long bel bilong mama em i wok long kisim save paslain long taim em i mas mekim wok long dispela save.’
Pikinini i stap long bel em i lain long planti samting. Em i gat kru bilong mekim olsem. Ol samting yumi stori pinis long en i soim yumi olsem kru bilong pikinini i stap long bel bilong mama i narapela kain tru na yumi kirap nogut long en. Ol saveman i tok: ‘Taim mama i karim pikinini em i gat planti ol gutpela samting i stap pinis long kru bilong em long mekim wok long en, winim ol narapela taim bihain.’ Taim pikinini i gat olsem 8-pela mun, olgeta samting i wok pinis bambai em i ken pulim win, na em i ken susu, na pilim swit bilong ol kaikai, na pispis, na harim ol samting, na lukim ol samting, na lain long ol samting, na tingim ol samting em i harim pinis. Orait, olsem wanem wanpela man i ken tok, pikinini i stap long bel em i no stap laip yet?
Planti man bilong saiens na planti man moa i bilip olsem pikinini i stap laip pinis taim em i stap blut yet long bel bilong mama. Dispela man Restak i tok long buk bilong em (The Mind) olsem: ‘Yumi stap laip pinis taim yumi stap olsem blut yet long bel bilong mama. Ol Saina tu i bilip olsem, long wanem, ol i save kirap long kaunim krismas bilong pikinini long taim em i stap insait long bel bilong mama. Taim mama i karim pinis pikinini ol i tok em i gat wanpela krismas pinis.’
Planti man i ting pikinini i no stap laip inap long taim mama i karim em. Tasol Baibel i no wanbel long dispela tingting. Olsem na sapos ol i kirap na rausim bel long wanem ol i laik mekim, lo bilong God i tok, ‘sapos man i bagarapim laip bilong man, ol i mas bagarapim laip bilong em yet.’ Kisim Bek 21:22, 23 (NW) i tok: “Sapos sampela man i pait na wanpela man i paitim meri i gat bel na meri i karim nogut, tasol i no gat wanpela i bagarap, orait man i bin paitim em i mas bekim mani bilong stretim rong olsem man bilong meri bai i tokim em. . . . Tasol sapos wanpela i kisim bagarap, orait yupela i mas bekim wankain pasin long man i paitim em. Sapos wanpela i dai pinis, orait yupela i mas kilim dispela man i dai.”
Jehova i tingim pikinini i stap long bel bilong mama olsem wanpela man i stap laip pinis. Na tu, ol samting pikinini i mekim long taim em i stap long bel i kamapim dispela long ples klia. Ol saveman bilong saiens nau i save pinis, insait long namba 2 mun olgeta hap bilong bodi bilong pikinini i redi pinis na i kirap pinis long mekim wok. Olsem na tok bilong Aristotal long kru bilong nupela pikinini i no gat wanpela tingting o save long en, dispela tok i no stret. Pikinini i gat olgeta samting long kru i redi pinis bilong mekim wok long en, olsem long kisim save long ol nupela samting i stap klostu long em. Yes, kru i redi pinis long mekim wok!
Ol samting mama i mekim inap helpim pikinini long i stap gut long bel o em inap bagarapim pikinini. Olsem samting long tingting bilong mama inap helpim pikinini o nogutim em. Tru, pikinini i no inap save long tingting bilong mama, tasol samting mama i tingim, em inap mekim na bel bilong mama i no sindaun gut, olsem na pikinini inap pilim ol dispela samting, olsem sapos mama i pret, o belhat, o tingting planti long wanpela samting, o sapos em i stap bel isi. Na pikinini inap kisim bikpela sik long mama. Na ol sik nogut ol man i save kisim long pasin pamuk olsem AIDS, ol dispela sik tu inap kalap long pikinini. Na ol mama i gat bel na ol i save kisim ol drak, o ol i smok o dring samting, dispela tu inap bagarapim pikinini. Taim em i karim pikinini ol dispela drak samting inap pas long pikinini na tingting bilong pikinini i no wok gut, o kru bilong em i bagarap, o bodi i no kamap gutpela, na ol narapela samting nogut.
Long bipo ol man i bin ting olsem ol samting i stap ausait i no inap long bagarapim pikinini i stap hait insait long bel bilong mama, tasol dispela tingting i no stret. Taim pikinini i stap yet long bel, papamama i ken lukautim em gut o wok long bagarapim em. Papamama i ken mekim wanem ol samting taim pikinini i kamap pinis? Pikinini i lain pinis long planti samting taim em i stap insait long bel, tasol olsem wanem long ol nupela samting em bai lain long en long bihain, taim mama i karim em pinis? Em nau, em wok bilong ol gutpela papamama long helpim pikinini long kisim save long ol gutpela samting.
[Rait long pes 14]
“Em wanpela gutpela hap tru bilong bodi”
[Rait long pes 14]
Em i gat 8-pela wik na olgeta samting long bodi i stap pinis
[Rait long pes 15]
Sapos man i tok em i gat save, olsem wanem em i ken tok, pikinini i stap long bel em i no stap laip yet?
[Rait long pes 17]
Planti man bilong saiens i bilip olsem laip bilong pikinini i kirap taim mama i kisim bel
[Piksa long pes 16]
Taim em i gat 8-pela wik, longpela bilong em i olsem 4 sentimita na olgeta samting bilong bodi bilong em i stap pinis
[Kredit Lain]
Photo: Lennart Nilsson for A Child Is Born - 1976 ed./Dell Publishing Co. (also page 2)