Rot 1: Ol Samting Yumi Mas Putim i Go Pas
“Skelim gut olgeta pasin na kisim ol pasin i gutpela tru.”—Filipai 1:10.
Mining bilong dispela. Long ol marit i wok gut, man na meri i save putim ol samting bilong helpim poroman i go pas long ol samting bilong helpim em yet, mani kago, wok mani, ol pren, na ol wanblut. Tupela marit i save lusim bikpela hap taim long i stap wantaim na stap wantaim ol pikinini tu. Tupela wantaim i redi long lusim sampela laik bilong ol yet long helpim famili.—Filipai 2:4.
As na em i bikpela samting. Long Baibel, famili em i bikpela samting. Aposel Pol i tok, sapos man i no lukautim gut famili, “dispela man i lusim pinis bilip bilong em, na em i man nogut tru.” (1 Timoti 5:8) Tasol bihain man inap senisim tingting long wanem samting em i mas putim i go pas. Wanpela man i gat wok long helpim ol famili, em i lukim olsem planti man i bin kam long kibung bilong em ol i putim wok mani i go pas long famili. Em i tok, ‘i olsem ol i ting ol bai lain long sampela pasin bilong stretim hariap ol hevi bilong famili na bai ol i ken putim tingting i go bek long wok mani bilong ol.’ Dispela i lainim yumi long wanem samting? I no hatwok long tok yumi putim famili i go pas, tasol i hatwok long soim olsem yumi mekim tru.
Traim mekim olsem. Mekim wok long ol askim i stap daunbilo bilong helpim yu long skelim wanem samting yu save putim i go pas.
◼ Taim poroman o pikinini i laik toktok wantaim mi, mi save hariap long harim tok bilong ol?
◼ Taim mi toktok wantaim ol narapela long ol samting mi bin mekim, mi save toktok long ol samting mi save mekim wantaim famili?
◼ Mi save tok nogat taim ol i laik givim sampela wok moa long mi (long ples wok o long narapela hap) sapos mi mas givim taim bilong mi long famili?
Sapos yu bekim tok yes long ol dispela askim antap, ating yu tingting olsem yu save putim ol bikpela samting i go pas. Tasol meri pikinini bilong yu bai bekim ol dispela askim olsem wanem? Tingting bilong yumi yet long wanem samting i stret long putim i go pas, em i no makim olsem yumi bin skelim stret dispela samting. Na i olsem tu long ol narapela rot bilong marit i ken wok gut, em yumi bai toktok long en long ol stori i kam bihain long dispela.
Pasim tok long bel. Tingting long wanpela o tupela rot we yu ken soim olsem yu save putim famili bilong yu i go pas. (Olsem: Lusim sampela wok samting i save pulim hap taim yu mas lusim wantaim meri pikinini bilong yu.)
Kamapim long famili bilong yu ol samting yu tingting strong long mekim. Taim wanpela long famili i soim olsem em i laik senisim sampela pasin bilong em, ating ol narapela tu bai mekim olsem.
[Piksa long pes 3]
Papa o mama i win tru em i save putim poroman na ol pikinini i go pas long ol narapela samting