Baibel i Tok Wanem?

I Stret Long Man na Meri i Sindaun Nating Wantaim Paslain Long Ol i Marit Tru?

SAPOS yu laik baim wanpela siot o dres, ating bai yu laik traim pastaim na bihain yu baim, laka? Sapos yu baim nating na yu no traim pastaim, yu bai pilim olsem yu westim nating taim na mani bilong yu.

Planti manmeri i gat wankain tingting long sait bilong marit. Ol i pilim olsem i gutpela moa long man na meri i stap wantaim paslain long ol i marit. Ol i tingting olsem, ‘Sapos sampela hevi i kamap, orait ol i ken lusim poroman marit isi tasol na ol i no lusim bikpela hap taim na mani long katim marit.’

Ol lain husat i gat kain tingting olsem, ating sampela bilong ol i bin lukim wanpela maritman o maritmeri i karim bikpela hevi insait long marit​—⁠ating poroman marit i mekim hatpela pasin long em. O ating ol i lukim ol samting nogut i kamap insait long marit we i no gat pasin laikim long en. Olsem na ol i ting man na meri bai abrusim ol dispela hevi sapos ol i stap wantaim paslain long ol i marit.

Baibel i tok wanem long dispela samting? Bilong bekim dispela askim, pastaim yumi mas skelim wanem ol tok em Baibel i mekim long pasin bilong marit.

“Wanpela Bodi”

Baibel i strongim ol lo em ol marit i mas bihainim, na yumi no kirap nogut long dispela, long wanem, God Jehova yet i bin kamapim pasin bilong marit. (Stat 2:​21-​24) Long pastaim tru, Jehova i bin tingim pinis olsem long rot bilong marit, man na meri bai kamap “wanpela bodi.” (Stat 2:​24) Jisas i kolim pinis dispela tok bilong Baibel na em i tok moa olsem: “Samting God i pasim pinis, em man i no ken katim.”​​—⁠Matyu 19:⁠6.

Sampela manmeri em ol i marit pinis, bihain ol i save katim marit.a Taim dispela samting i kamap, i no olsem pasin bilong marit i kamapim hevi, nogat. As bilong en em olsem, wanpela o tupela poroman wantaim ol i no bihainim tok promis ol i bin mekim long taim bilong marit.

Yumi ken tok piksa olsem: Man na meri i gat wanpela ka, tasol ol i no bihainim ol lo em kampani bilong wokim ka i kamapim long pasin bilong lukautim ka. Sapos ka i bagarap, orait yu ting em asua bilong husat? Em asua bilong kampani bilong wokim ka o asua bilong papamama bilong ka em ol i no bihainim lo bilong lukautim ka?

Wankain tu long samting bilong marit. Taim man na meri i lukautim marit na ol i tingting strong long bihainim ol stiatok bilong Baibel bilong stretim ol hevi, bai ol i no gat tingting bilong katim marit. Taim man na meri i mekim tok promis long narapela narapela, dispela bai mekim na poroman marit bai i no pret olsem poroman bai lusim em. Olsem na pasin laikim bai i stap insait long marit bilong ol.

“Abrusim Olgeta Kain Pasin Pamuk”

Sampela i tingting olsem: ‘Man na meri i ken sindaun nating wantaim paslain long ol i marit. Taim ol i mekim olsem, dispela i soim olsem ol i tingim marit olsem samting i holi.’

Tasol tok bilong Baibel i klia tru. Pol i tok: “Yupela i mas abrusim olgeta kain pasin pamuk.” (1 Tesalonaika 4:⁠3) Dispela tok “pasin pamuk” i makim olgeta kain pasin bilong slip wantaim em man na meri i mekim tasol ol i no poroman marit. Dispela i makim tu pasin bilong man na meri i slip wantaim paslain long ol i marit, maski sapos ol i gat tingting long marit. Olsem Baibel i tok, i no stret long man na meri i stap wantaim​​—⁠maski sapos ol i tingting long marit bihain.

Yu ting tok bilong Baibel em bilong ol man bilong bipo tasol? Ating sampela i gat kain tingting olsem. Long planti hap bilong graun, ol man i ting em orait long man na meri i sindaun nating wantaim, maski ol i gat tingting long marit o nogat. Tasol tingim ol samting i kamap. Ol lain husat i sindaun wantaim, yu ting ol i painim pinis rot bilong stap amamas? Yu ting amamas bilong ol i winim amamas bilong ol manmeri husat i marit? Taim man na meri i sindaun wantaim paslain long marit, yu ting ol bai stap gut moa long poroman marit taim ol i marit pinis? Ol wok painimaut i soim olsem dispela samting i no kamap. Ol marit husat i sindaun wantaim paslain long marit, ol i bungim planti hevi moa long marit na planti ol i save katim marit.

Sampela saveman i tok olsem i gat popaia long ol kain wok painimaut olsem. Wanpela savemeri i tok: “Ol manmeri husat i marit pastaim na bihain ol i sindaun wantaim, ol i no wankain long ol manmeri husat i sindaun wantaim paslain long ol i marit.” Em i tok olsem pasin bilong sindaun wantaim em i no nambawan samting; nambawan samting em long “tingim olsem marit em i bikpela samting.”

Maski sapos dispela em i tru, em i kamapim klia olsem em bikpela samting long kisim tingting bilong God long ol samting bilong marit. Baibel i tok: “Marit em i gutpela samting tru, na yupela ol marit i mas lukautim gut marit bilong yupela.” (Hibru 13:⁠4) Taim man na meri i tok promis long stap wanpela bodi na rispektim marit bilong ol, dispela i strongim pasin bilong ol long pas gut wantaim.​​—⁠Saveman 4:​12.

Tingim gen tok piksa yumi bin stori long en: I stret long traim siot o dres paslain long baim. Tasol dispela i no wankain long pasin bilong sindaun wantaim paslain long marit. Man na meri i mas lusim sampela hap taim long save gut long man o meri em i laik maritim. Dispela em i bikpela samting bilong helpim famili long i stap amamas, tasol planti man i no save mekim olsem.

[Futnot]

YU LAIK SAVE?

◼ I gat wanem as na Baibel i tok long ol marit tasol i ken slip wantaim?​​—⁠Song 84:11; 1 Korin 6:​18.

◼ Taim yu laik marit, yu laik bai poroman i gat wanem ol pasin?​​—⁠Rut 1:​16, 17; Sindaun 31:​10-​31.

[Blok long pes 29]

“MEKIM NOGUT LONG BODI BILONG EM YET”

Baibel i tok: “Man i mekim pasin pamuk, em i mekim nogut long bodi bilong em yet.” (1 Korin 6:​18) Insait long ol yia i go pinis, ol samting i kamapim olsem dispela tok bilong Baibel em i tru olgeta, olsem planti milion manmeri i bin i dai long sik AIDS na ol narapela sik bilong pamuk. Tasol i no dispela tasol. Ol wok painimaut i kamapim olsem ol yangpela husat i save mekim pasin pamuk, ol i kisim sik bilong bel hevi na traim long kilim i dai ol yet. Pasin bilong paul nabaut wantaim man o meri, dispela i mekim na ol meri i save kisim bel nating, na planti i save rausim pikinini i stap long bel. Taim yumi skelim ol dispela samting, yumi inap tok olsem ol lo bilong Baibel em i no samting bilong ol man bilong bipo tasol, nogat.