Yu Gat Wanem Save Long Ol Witnes Bilong Jehova?

Wanpela meri i skul long kamap ripota long Denmak, em i tok: “Mi ritim planti stori long ol Witnes Bilong Jehova long Intenet. Mi harim sampela tok win long ol, na mi putim yau long planti tok i daunim ol. Dispela i mekim na mi kisim tingting kranki long ol Witnes Bilong Jehova”

BIHAIN dispela ripota i inteviuim wanpela famili Witnes. Wanem samting i kamap? Ripota i tok: “Taim mi go insait long haus bilong ol, wantu tingting bilong mi i senis! Ating ol man i no save gut long ol Witnes, o ating yumi save hariap tumas long skelim ol. Mi save mi bin mekim olsem. Na mi kisim save olsem tingting mi gat long ol i no stret.”​—⁠Cecilie Feyling, bilong nius Jydske Vestkysten.

Wanpela konsalten bilong ol stua long Yurop i bungim ol Witnes Bilong Jehova long rot bilong wok bilong em, na em i luksave olsem ol i lain bilong mekim tok tru tasol. Olsem na em i laik givim wok long ol Witnes.

Ol Witnes Bilong Jehova i gat nem olsem ol i lain bilong autim tok. Ol i save bungim ol man husat i no laik toktok long Baibel, na ol man husat i amamas long toktok long Baibel. Winim 7 milion manmeri long klostu olgeta kantri i save stadi long Baibel wantaim ol Witnes, na sampela bilong ol dispela sumatin i kamap tisa bilong skulim ol narapela long Baibel. Olsem: Long Amerika, ripot bilong lain National Council of Churches i tok olsem, namel long ol 25 bikpela lotu, inap 4-pela lotu tasol i wok long i go bikpela na ol Witnes Bilong Jehova i wanpela bilong ol.

Bilong wanem planti milion manmeri i stadi long Baibel wantaim ol Witnes? Olsem wanem ol i mekim ol dispela stadi? Yu ting ol dispela lain i mas kamap Witnes? Maski yu no tingting long kamap wanpela Witnes, i gutpela sapos yu kisim ol stretpela bekim long ol dispela askim. Olsem na yu no ken putim yau long ol tok win i daunim ol Witnes, nogat, mobeta yu painimaut ol i wanem kain lain tru. Long Sindaun 14:​15, Baibel i tok: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”

Mipela i laik bai dispela Kirap! i ken helpim yu long kliagut moa na kisim stretpela save long ol Witnes Bilong Jehova. Yu ritim dispela nius na dispela i soim olsem tingting bilong yu i op na yu laik kisim stretpela save. Olsem na traim dispela: Taim yu ritim 4-pela stori na ol blok i kamap bihain long dispela, lukim long Baibel bilong yu ol skripsa ol i no raitim tok bilong en.a Em savetingting long mekim olsem, na olsem Baibel i tok, dispela em ‘gutpela pasin.’​—⁠Aposel 17:⁠11.

[Futnot]