“Pasin Bilong Narapela i No Trastim Narapela i Go Bikpela”
Long Wes Afrika, wanpela liklik mangi i gat 12-pela krismas i slip long haus sik, long wanem, mama bilong em i givim em giaman marasin bilong malaria em i bin baim long wanpela kemis stua. Wanpela dokta bilong haus sik i tok, “mipela i painimaut olsem inap 15 yia ol stua i wok long salim ol giaman marasin.”a
Long Esia, papamama bilong wanpela nupela bebi boi i kirap nogut long kisim save olsem milk em ol i wok long givim long bebi i gat marasin nogut long en, maski ol man i tok dispela milk i gutpela. Sori tru, liklik bebi i dai.
Wanpela bisnisman bilong Amerika em ol man i save trastim em, em i bin trikim ol kastama bilong em na stilim planti bilion dola bilong ol! Planti tausen manmeri i kisim save olsem pensen bilong ol i pinis nating long rot bilong pasin giaman dispela man i mekim. Ol man i kolim dispela pasin em i mekim, olsem “wanpela traipela pasin giaman i bin kamap long taim bilong yumi.”
LONG nau, klostu olgeta man i kisim hevi olsem, wanpela ol i bin trastim em i bin giamanim ol. Niuspepa bilong Frans, Le Monde, i stori olsem as na hevi bilong mani i kamap long olgeta hap bilong graun, em “pasin bilong narapela i no trastim narapela i go bikpela.”
Wanem ol samting i mekim na “pasin bilong narapela i no trastim narapela i go bikpela” long nau? Olsem wanem? I gat wanpela em yu inap trastim?
[Futnot]
a Niuspepa Le Figaro, i kamapim dispela ripot long Paris, Frans.