Yu Ting i Gutpela Long Trastim Olgeta Man?
Ol man i ting dispela dokta i gat nem long wok painimaut long marasin bilong kilim i dai pen. Tasol kirap long 1996 na i kam, winim 10-pela yia nau, dispela dokta i bin kamapim ol giaman ripot long ol save em i bin kisim long ol wok painimaut bilong em, em ol dispela save ol i bin kamapim long ol buk bilong ol dokta.
WANPELA nius (Anesthesiology News) i kamapim tok bilong Dokta Steven L. Shafer, olsem: “Mi no kliagut long as na wanpela inap mekim kain pasin olsem.”
Wanem samting inap kirapim wanpela saveman, em man ol narapela i save rispektim em, long giamanim ol man? Orait tingim 4-pela samting we inap kirapim man long mekim olsem.
● Pasin Mangal. Niuspepa The New York Times i kamapim tok bilong Dokta Jerome Kassirer, bipo em i edita bilong nius The New England Journal of Medicine. Dispela dokta i tok: ‘Planti taim ol saveman i laik kamapim ol ripot em ol kampani bilong wokim ol marasin bai amamas long en bambai ol dispela kampani i ken baim ol.’
● Mekim olgeta samting bilong kisim biknem. Long Jemani, ol i ting ol sumatin i stadi long saiens long yunivesiti i save baim ol tisa long planti tausen mani bambai ol i ken kisim digri long saiens. Long wanem, long kantri bilong ol dispela i makim olsem man i gat nem. Nius The New York Times i stori long wok painimaut ol i bin mekim long planti sumatin em ol i no bihainim pasin i stret. Ol dispela sumatin i tok olsem “ol bai bihainim pasin i stret” bihain long taim ol i kisim biknem pinis.
● Ol man i bikpela pinis i no stap olsem gutpela piksa. Long niuspepa The New York Times, wanpela profesa i tok long ol haiskul sumatin olsem: “Ating em isi long yumi tok olsem ol sumatin i no bihainim ol lo bilong stretpela pasin . . . Mobeta yumi ken tok ol tisa na ol papamama bilong ol na ol narapela long komiuniti ol i no bin helpim ol sumatin long kisim stretpela pasin na bihainim.”
● Ol pasin i no stret i pait wantaim stretpela lo. Long wanpela wok painimaut ol i mekim long klostu 30,000 sumatin, 98 pesen i tok ol i bilip olsem pasin bilong mekim tok tru em i bikpela samting long pasin bilong pas gut wantaim ol narapela. Tasol long olgeta 10-pela 10-pela sumatin, 8-pela i tok ol i bin giamanim papamama bilong ol, na 64 pesen i tok ol i bin mekim pasin giaman long tes long yia i go pinis.
Ol Bikpela Stiatok Bilong Stretpela Pasin
Olsem blok long dispela pes i kamapim, yumi ol man i gat pasin bilong trastim ol narapela. Tasol Baibel i tokaut stret olsem “stat long taim ol manmeri i yangpela yet ol i save tingting long mekim ol pasin nogut.” (Stat 8:21) Olsem wanem yu inap daunim na sakim laik bilong mekim pasin giaman, em pasin we i kamap bikpela long taim bilong yumi? Ol dispela stiatok bilong Baibel inap helpim yu:
● “Ol wantok bilong yu i stap klostu long yu na ol i ting yu pren bilong ol. Olsem na yu no ken tingting long mekim nogut long ol.”—Sindaun 3:29.
Pasin bilong laikim ol narapela bai kirapim yumi long tingim ol na yumi no giamanim ol. Dispela stiatok inap kirapim ol man long lusim pasin bilong mekim nogut long ol narapela, em pasin mangal i as bilong en, kain olsem pasin bilong salim ol giaman marasin em yumi bin stori pinis long en.
● “Tok giaman i save stap sotpela taim tru na ol man i lusim tingting long en. Tasol tok tru i save stap oltaim.”—Sindaun 12:19.
Long nau planti man i ting i no gat gutpela samting inap painim ol man i save mekim tok tru. Tasol askim yu yet, ‘Wanem samting i bikpela samting moa? Pasin bilong kisim ol gutpela samting long nau tasol o pasin bilong kisim ol samting bilong helpim yu inap oltaim oltaim, em pasin bilong amamas long yu yet i insait long en?’ Long rot bilong giaman long tes, ating wanpela sumatin inap giamanim ol narapela olsem em i gat save, tasol olsem wanem bai dispela i helpim em long taim em i kisim wok mani?
● “Sapos papa i stretpela man na i save bihainim gutpela pasin, orait ol pikinini bilong en i ken amamas.”—Sindaun 20:7.
Sapos yu wanpela papa o mama, yu mas stap gutpela piksa long ol pikinini bilong yu long rot bilong “bihainim gutpela pasin.” Stori gut long ol long olsem wanem pasin bilong bihainim stretpela pasin i bin helpim yu. Taim ol pikinini i lukim papamama i bihainim stretpela pasin, ol tu bai bihainim dispela pasin.—Sindaun 22:6.
Yu ting ol dispela stiatok bilong Baibel i stap antap inap helpim yu? Yu ting long nau i gat ol man em yu inap trastim?
[Rait long pes 4]
Olsem niuspepa Le Figaro i kamapim, planti manmeri moa bilong Frans i “ting ol bikman bilong ol—long wok politik, wok bisnis, na long komiuniti samting—ol i no save bihainim stretpela pasin, olsem na ol i ting olsem i no gat as long ol tu i bihainim stretpela pasin.”
[Blok long pes 5]
TRASTIM OL NARAPELA—EM PASIN BILONG YUMI OL MAN?
Michael Kosfeld, em wanpela profesa bilong wok bisnis long Frankfurt Yunivesiti long Jemani, i skelim dispela pasin bilong trastim ol narapela na em i tok, dispela pasin i stap pinis long yumi ol man taim mama i karim yumi. Kosfeld i kisim save olsem taim wanpela man i pas gut wantaim narapela man, kru bilong man i save kamapim wanpela homon ol i kolim oxytocin. Dispela homon i save kirapim man long kamapim dispela pasin bilong trastim narapela. Kosfeld i tok: “Dispela em wanpela bilong ol pasin we i mekim na yumi ol man i narapela kain. Sapos yumi no gat dispela pasin bilong trastim ol narapela, orait i olsem wanpela gutpela pasin bilong yumi ol man i lus.”