I Gat Ol Man Em Yu Inap Trastim

Santiago, em wanpela teksi draiva long Ajentina, em i no gat tupela tingting long samting em bai mekim. Taim wanpela pasindia i lusim wanpela beg long teksi bilong em, Santiago i bringim dispela beg i go bek long papa bilong beg. Ating i luk olsem samting Santiago i mekim i no bikpela samting. Tasol em i bikpela samting long wanem beg i gat 32,000 dola long en!

YU INAP piksaim long tingting wanpela taim we i gat ol manmeri bilong bihainim pasin i stret tasol ol i stap? Ating sindaun bilong yumi bai narapela kain stret, a? Yu inap larim pikinini bilong yu i stap wantaim bebisita na yu no tingting planti. Na i no gat wok long yu gat ki o lok bilong haus. Yu ting dispela em wanpela driman nating tasol?

Gutpela Samting i Kamap Long Pasin Bilong Bihainim Ol Stretpela Lo

Pol, em wanpela aposel Kristen, em i tok long em yet na ol wanbilip Kristen olsem: “Mipela i laik wokabaut stret long olgeta taim.” (Hibru 13:18) Em samting ol Witnes Bilong Jehova i strong long mekim. Ol i laik bihainim ol pasin em Baibel i kolim long Aisaia 33:15: “Ol man bilong mekim stretpela pasin na tok tru tasol na ol i no save daunim ol arapela bai ol yet i ken kisim mani samting bilong ol, na ol i no save larim ol arapela man i givim mani long ol bilong grisim ol long mekim pasin nogut.” Olsem wanem sampela i bin bihainim kain pasin olsem?

● ‘Mekim tok tru tasol.’ Domingo, em wanpela Witnes Bilong Jehova, na em i save wok long wanpela kopra plantesen long Filipins. Em i tok: “Planti man i no save mekim tok tru long ol bos. Olsem: Taim ol i bungim kopra, ol i no save tokim bos long hamas beg kopra stret ol i bungim. Long dispela rot ol inap hait na salim sampela beg kopra.”

Klostu ol i rusim Domingo na famili bilong em long plantesen, long wanem, ol i no laik mekim tok giaman bilong helpim bos bilong ol. Domingo i tok: “Mipela i tokim bos olsem, maski sapos yu rausim mipela, mipela i no inap giaman. Bihain, bos i tok olsem ol Witnes Bilong Jehova ol i gutpela lain em yumi inap long trastim ol, na em i givim mipela sampela hap graun moa bilong mekim wok long en.”

● No ken ‘daunim ol arapela bilong kisim mani bilong ol.’ Pierre, em wanpela bos bilong teks ofis long hap bilong Kamarun, em i gat planti rot bilong kisim mani isi tasol. Taim ol i makim em long baim ol wokman husat i save mekim wok haptaim, em i luksave olsem sampela samting i no stret. Pierre i tok: “Ol i givim yet pe bilong ol man em ol i bin pinis long wok na tu ol wokman em ol i dai pinis. Mi inap kisim tingting long yusim ol dispela mani, tasol mi no mekim olsem. Mi raitim gut rekod bilong ol dispela mani na putim gut dispela rekod wantaim ol dispela mani long wanpela seif.”

Wanem samting i kamap? Pierre i tok: “Bihain long 2-pela yia, lain bilong skelim akaun bilong kampani ol i kam na sekim akaun. Mi bin amamas tru long soim ol rekod bilong akaun na mi givim bek dispela mani mi holim i stap, em long nau dispela mani i go bikpela tru. Dispela lain bilong skelim akaun i mekim tok amamas long mi long mi no bin stilim dispela mani.”

● No ken larim narapela i “grisim” yu. Ricardo em wanpela loya long Rio de Janeiro, Brasil. Planti taim ol man i laik givim mani long em bilong grisim em. Em i tok: “Wanpela taim, wanpela loya i traim long grisim mi. Em i kisim wanpela CD pleya na salim i kam long haus bilong mi, na mi no bin save. Long dispela taim, planti man i no gat CD pleya, long wanem, pe bilong en i bikpela tru.”

Ricardo i mekim wanem? Em i tok: “Mitupela meri bilong mi i pasim tok long mipela i no ken rausim karamap bilong dispela boks. Mi kisim dispela boks i go bek long ofis bilong dispela loya na putim long tebol bilong em na em i kirap nogut stret. Rot i op nau long mi inap stori gut long as na mi bringim dispela samting i go bek. Sekreteri bilong em i amamas long pasin mi mekim.”

I no ol Witnes Bilong Jehova tasol i wok strong long bihainim pasin i stret. Tasol olsem wanpela lain olgeta, ol i gat nem olsem ol i lain bilong bihainim pasin i stret. Dispela i as na i no longtaim i go pinis, ol stua bilong wanpela kampani long Polan em ol i save salim ol klos, ol i laik bai ol Witnes Bilong Jehova tasol i wok long ol stua bilong ol. Maneja bilong stua i tok: “Tru, long olgeta hap i gat ol man i save bihainim pasin i stret, tasol ol Witnes Bilong Jehova i gat ol stiatok em ol i strong long bihainim.”

Yu Inap Trastim Ol Maski Ol i Stap Rabis

Planti man i ting olsem i orait long man i stap rabis i mekim pasin giaman. Olsem: Wanpela ripot bilong CNN nius i stori long wanpela mangi i gat 14 krismas long Naijiria. Em i save giamanim ol man long rot bilong Intenet na stilim mani bilong ol. Bilong soim olsem i no gat rong long pasin em i mekim, em i tok: “Yupela i laik bai mi mekim wanem? Mi save lukautim famili bilong mi​—⁠susa, mama na papa bilong mi. Man i mas i gat kaikai na bai em i stap laip.”

Tru, Baibel i no tok promis olsem ol man i bihainim stretpela pasin ol bai i gat planti samting, nogat. Tasol Baibel i tok ol bai kisim ol samting ol i mas i gat bilong i stap laip. Aisaia 33:16 i tok: “Oltaim bai ol i gat kaikai na wara bilong dring.”

Tasol ating sampela i laik save: ‘Olsem wanem pasin bilong bihainim pasin i stret inap helpim ol lain i stap rabis? Olsem wanem long ol lain em ol i save wok hat long olgeta de bilong lukautim ol yet long sait bilong kaikai?’

Tingim Berthe, em wanpela wido long Kamarun. Long wanpela liklik stol em i save salim ol miando, em tapiok ol i save kukim na putim spais long en. Long olgeta wan wan de em i save kisim inap olsem 4 kina o 8 kina samting long rot bilong salim ol miando. Em i tok: “Olgeta wan wan paket i mas i gat 20 miando. Tasol ol stuakipa i save putim 17 o 18 miando long wanpela paket. Tasol mi no save mekim olsem bilong giamanim ol man na kisim mani.”

Olsem wanem? Wok maket bilong Berthe i ron gut? Nogat, i no long olgeta taim. Em i tok: “Sampela taim, mi save maket de olgeta tasol mi no salim wanpela samting. Taim mi tokim ol narapela husat i salim kaikai olsem mi laik dinau long kaikai bilong ol, long wanem, mi no salim yet wanpela samting, ol i save givim kaikai long mi, long wanem, ol i save olsem mi bai baim ol taim mi kisim mani. Ol i trastim mi, long wanem, planti taim mi save truim tok bilong mi.”

Wanpela God i Stret Yumi Trastim

Sapos wanpela man i save truim ol tok promis bilong em, ating pasin bilong yumi long trastim em bai i go bikpela moa. Josua em wanpela lida bilong ol lain Israel bilong bipo, i tok olsem long God: “Bikpela i inapim tru olgeta gutpela promis em i bin mekim.” (Josua 21:45) Olsem wanem? I gat as na yumi tu i ken trastim God?

Ol tok promis bilong God i save kamap tru, olsem na em i tok, tok bilong em i kain olsem ren i save pundaun. (Aisaia 55:​10, 11) Tru tumas! I no gat wanpela samting inap pasim ren long pundaun, givim wara long graun, na mekim ol kaikai i kamap. Olsem tasol, i no gat wanpela samting inap pasim God long inapim ol tok promis bilong em.

Wanpela bilong ol dispela tok promis i stap long 2 Pita 3:​13, i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” God i tingting pinis long rausim olgeta man husat i save giamanim ol narapela man. Olsem wanem? Yu laik kisim sampela save moa long olsem wanem God bai truim ol samting em i tingting pinis long mekim? Yu ken askim ol Witnes Bilong Jehova long hap bilong yu, o yu ken raitim pas long wanpela atres i stret long yu i stap long pes 5 bilong dispela magasin.

[Blok/Piksa long pes 8]

BIHAINIM PASIN I STRET I KAMAPIM GUTPELA SAMTING

Lucio, em wanpela Witnes Bilong Jehova long Filipins, em inap mekim pasin giaman. Em i bin painim 27,500 dola long wanpela olpela kabot long ofis em ol i tokim em long klinim. Dispela ofis na mani i bilong bos bilong em husat i go long wanpela bisnis raun. Lucio i tok: “Man! Em fes taim bilong mi long lukim wanpela dola mani.”

Taim bos i kam bek, Lucio i givim em dispela mani. Wanem samting i kamap? Lucio i tok: “Ol i givim sampela wok moa long mi. Na tu, bos i givim mi wanpela rum we mipela famili olgeta i ken i stap long en. Maski laip i hat long Filipins, mi pilim tru olsem God Jehova i lukautim mipela, long wanem, mipela i strong long bihainim ol lo bilong em.”

[Blok/Piksa long pes 9]

SKEL I WOK STRET

Long wanpela maket long Douala, long Kamarun, olgeta man i save long stol bilong Moïse we em i save salim ol pis. Moïse i tok: “Mi givim nem ‘Skel’ long stol bilong mi, long wanem, skel bilong mi em wanpela bilong ol skel long maket we i wok stret. Mi save olsem planti taim ol manmeri i save traim mi. Sapos ol i askim mi long wanpela kilo pis, mi save givim stret wanpela kilo pis long ol. Ol i save go long narapela hap na skelim gen beg pis bilong ol. Taim ol i mekim olsem, ol i luksave olsem skel bilong pis bilong ol i abrusim wanpela kilo. Nau ol i save olsem mi no traim long giamanim ol. Planti i save tokim mi, ‘Mipela i kam long yu, long wanem, yu man bilong tok tru.’ ”

[Piksa long pes 7]

“Mipela i tokim bos olsem, maski sapos yu rausim mipela, mipela i no inap giaman.”​—⁠Domingo, Filipins.

[Piksa long pes 7]

“Lain bilong skelim akaun i mekim tok amamas long mi long mi no bin stilim dispela mani.”​—⁠Pierre, Kamarun.

[Piksa long pes 7]

“Wanpela loya i traim long grisim mi. . . . Mitupela meri bilong mi i pasim tok long mipela i no ken rausim karamap bilong dispela boks.”​—⁠Ricardo, Brasil.

[Piksa long pes 7]

‘Sampela taim, Berthe i save maket de olgeta tasol em i no salim wanpela samting. Tasol ol narapela husat i save salim kaikai, ol i save givim kaikai long em long dinau, long wanem, ol i save olsem em bai baim ol taim em kisim mani.’