Ol Kuk Kaikai Ol i Bringim Long Haus i Go Long Ol Ofis Long Mumbai

LONG olgeta de, yu lusim haus long 5 klok moning bilong i go long wok. Long belo, yu bai amamas long kisim kaikai ol i bin kukim long haus na i gat spais long en long stail yu save laikim. Dispela samting i save painim planti tausen manmeri i wok long Mumbai, long India. Lain dabbawala i save bringim kaikai ol i kukim long haus i go long ol ofis long India.a

Rot i Op Long Wok Bisnis

Long 1890 samting, i bin gat planti wok bisnis long Bombay, em nau ol i kolim olsem Mumbai. Ol bisnisman bilong Inglan na India i save raun inap planti kilomita bilong i go long ol ofis bilong ol i stap long Bombay. Ol i no inap go hariap, na i gat wan wan haus kaikai tasol, na ol dispela haus kaikai i stap longwe longwe. Ol bisnisman i save laikim tru kaikai ol i kukim long haus, olsem na ol i kisim ol wokman long karim ol kaikai bilong ol long haus i go long ofis bilong ol long belo. Wanpela bisnisman i luksave olsem dispela pasin bilong kukim kaikai long haus na bringim i go long ol ofis long belo, inap kamap wanpela gutpela wok bisnis long bihain. Olsem na em i kisim ol yangpela mangi long ol ples i kam bambai ol i ken bringim ol kuk kaikai long ol haus i go long ol ofis. Kirap long dispela taim na i kam, dispela wok bisnis i go bikpela tru.

Ol man i laikim yet kuk kaikai em ol i save kukim long haus. Tru, long nau i gat planti haus kaikai i stap, tasol kaikai ol i kukim long haus, em i no gat bikpela pe na planti man i laikim. Na tu, planti man i gat sik na ol i mas was gut long sampela kaikai. Sampela narapela ol i bihainim lo bilong lotu long tambu long sampela kaikai. Olsem: Sampela manmeri i gat tambu long kaikai anian, na sampela ol i no laikim galik. Long ol haus kaikai ol i save putim ol dispela samting long kaikai, tasol kaikai ol i kukim long haus i no gat ol kain samting olsem, na dispela i mekim na ol man husat i gat tambu long sampela kain kaikai, ol inap long kaikai.

Wok i Ron Gut na Bihainim Stret Taim

Stat long taim dispela bisnis i kirap na i kam inap long nau, i no gat planti senis tumas long dispela wok bilong bringim kuk kaikai long ol haus i go long ol ofis. Long nau, winim 5,000 man na sampela meri tu, ol i save bringim winim 200,000 kuk kaikai long ol haus i go long ol ofis i stap long taun we i gat 20 milion manmeri. Sampela dabbawala i save wokabaut inap 60 kilomita​—⁠sampela ol i save putim inap 30 o 40 kontaina kaikai long wilbaro na bringim i go​—⁠na sampela narapela i save raun long baiskol na tren bilong bringim kuk kaikai i go long ol ofis. Maski wanem rot ol i bihainim, ol i save bringim kaikai i go stret long man em ol i mas bringim kaikai long em na ol i save go kamap long taim stret. Long 6 milion taim ol i bringim kaikai i go long ol man, inap 1-pela taim tasol ol i bin popaia! Olsem wanem ol inap mekim gut wok na ol i no popaia tumas?

Long 1956 lain dabbawala i rejista olsem wanpela oganaisesen bilong helpim ol man. I gat ol bikman bilong ol na ol narapela bosman. I gat ol lain wokman, na ol supavaisa bilong ol em ol i wok olsem narapela grup. Tasol olgeta ol i wok wantaim insait long dispela oganaisesen​—⁠na ol i tok dispela i as na oganaisesen bilong ol i ron gut. Dispela wok i kirap winim 100 yia i go pinis tasol i no gat wanpela taim we ol wokman i straik.

Ol dabbawala i gat ID kat na ol i save werim waitpela siot na longpela trausis, na waitpela hat, olsem na i no hatwok long ol man i luksave long ol. Sapos ol i no werim hat bilong ol, o ol i kam leit long wok, o i no gat gutpela as na ol i no go long wok, o sapos ol i dring alkohol long taim bilong wok, ol i mas baim kot.

Wok Bilong Ol Long Olgeta De

Long 8:30 long moning, wanpela long haus, ating mama bilong haus bai redim kaikai na putim long dabba o kontena. Dabba i gat sampela kontena insait long en, em narapela i stap antap long narapela na wanpela hap ain i holim olgeta kontena wantaim. Wanpela dabbawala i save go kisim sampela kontena kaikai long wanpela ples, na putim antap long baiskol o wilbaro, na kisim i go hariap long tren stesin, em long hap em i bungim ol narapela dabbawala. Long tren stesin, ol bai skelim ol kontena na bungim ol kontena bilong wanpela ples long wanpela hap na ol kontena bilong narapela ples long narapela hap, olsem ol man bilong wok long pos ofis i save skelim ol pas.

Olgeta wan wan kontena kaikai i gat kala, namba, o leta, i soim kontena i kam long wanem hap, wanem rot bilong tren, wanem tren stesin em kaikai bai go kamap long en, nem bilong ofis, na wanem plua namba bilong ofis. Ol kontena kaikai bilong i go long olgeta wan wan hap, ol i save bungim na putim antap long wanpela longpela plang i gat liklik banis i raunim. Dispela plang inap holim olsem 48 kontena kaikai. Taim tren i kam kamap, ol i save putim ol dispela plang i gat kontena kaikai long en long wanpela spesel rum i stap klostu long hap bilong draiva. Taim tren i go kamap long wanpela bikpela tren stesin, ol i save skelim gen ol kontena kaikai na ol i kisim ol i go long ol narapela stesin em kaikai i mas i go long en. Taim tren i go kamap long dispela ples, ol i save rausim ol kontena kaikai long plang na ol i skelim gen laspela taim. Na long rot bilong baiskol o wilbaro, ol i save bringim ol dispela kontena kaikai i go long ol ofis em kontena kaikai i mas i go long en.

Dispela pasin bilong bringim ol kontena kaikai, i gutpela rot na i no gat bikpela pe bilong en. Na tu, ol ka i no inap pasim rot bilong ol dabbawala, long wanem, ol i raun long baiskol na ol inap katim long sait bilong rot o katim namel long ol ka. Dispela i mekim na ol i save bringim kontena kaikai i go long ol ofis long taim stret em 12:30 long belo. Bihain, namel long 1:15 na 2 klok long apinun, taim dabbawala yet i kaikai pinis, em bai go bek long ol ofis na kisim ol emti kontena na bringim ol i go bek long ol haus we em i bin kisim ol long en. Orait wanpela long ol dispela haus bai wasim ol kontena na redim bilong narapela de. Long kirap na i go inap long pinis bilong dispela wok, olgeta samting i ron gut wankain olsem wanpela pilai resis!

Wok i No Gat Nem, Tasol Planti i Tok Amamas Long En

Ol man i luksave long gutpela wok bilong ol dabbawala. Ol narapela oganaisesen i skelim pasin bilong ol long mekim wok bambai ol inap bihainim wankain pasin long wok bisnis bilong ol. Ol i bin kamapim stori bilong ol dabbawala long sampela program bilong TV. Lain Forbes Global Magazine i givim ol wanpela setifiket long wok ol i mekim, long wanem, wanpela taim tasol ol i bin popaia. Stori bilong lain dabbawala i stap long buk The Guinness Book of World Records, na long wanpela skul (Harvard Business School) long Amerika, ol i kisim skul long pasin bilong ol dabbawala long mekim wok. Na tu, ol bikman i bin go lukim wok bilong ol, wanpela bilong ol em prins bilong Inglan. Em i amamas tru long lukim wok bilong ol na em i bin invaitim sampela bilong ol long i go long weding bilong em long Inglan.

Long nau ol dabbawala i save yusim kompiuta na mobail fon bilong kisim oda na wokim rekod bilong ol akaun bilong ol. Tasol ol i bihainim yet wankain pasin bilong bringim kaikai i go long ol ofis. Taim belo i kam klostu, planti ol hangre wokman long ol ofis long Mumbai i save olsem klostu nau bai hatpela kaikai i kam​—⁠na em bai kam long taim stret!

[Futnot]

[Piksa long pes 11]

Ol i putim ol “dabba” long tren bilong karim i go

[Piksa long pes 11]

“Dabba” em ol kontena ol i putim wantaim na i no hatwok long karim na putim long tren samting

[Piksa long pes 12]

Planti bisnis i bihainim pasin bilong ol “dabbawala” long mekim gut wok bilong ol long bringim ol samting i go