Givim Bel Long Mekim Tok

TAIM yu givim bel long mekim tok, em bai kirapim tru ol man. Tru, tok bilong yu i mas givim save long ol man, tasol pasin bilong givim bel long mekim tok i save kirapim ol man long putim gut yau long tok yu mekim. Maski yu bilong we o yu gat wanem kain pasin, yu inap kisim pasin bilong givim bel long mekim tok.

Mekim Tok Olsem Yu Pilim Tru. Taim Jisas i toktok wantaim wanpela meri Samaria, em i tok olsem ol man i laik lotu long Jehova ol i mas lotu “long strong bilong Holi Spirit na long pasin i tru.” (Jo. 4:24) Bel bilong ol i mas pilim gut tok i tru na dispela i mas kirapim ol long lotuim God, na lotu bilong ol i mas stret wantaim tok i tru i stap long Baibel. Taim bel bilong man i pilim tru olsem, orait pasin bilong em long toktok bai kamapim dispela. Bai em i gat laik tru long tokim ol narapela long ol samting Jehova i mekim long pasin sori bilong helpim ol man. Pes bilong em, na pasin bilong em long tromoi han, na nek bilong em bai kamapim klia bel bilong em.

Orait olsem wanem na i olsem wanpela brata i no givim bel long mekim tok, maski em i laikim tru Jehova na em i bilipim tok em i kamapim? Em i no ken redim tasol ol tok em bai mekim, nogat. Em i mas pilim tru long bel ol tok em bai kamapim. Ating ol i makim em long stori long ofa Jisas Krais i bin givim bilong baim bek ol man. Orait taim em i mekim tok, em i no ken tingting tasol long ol bikpela tok bilong dispela, nogat, em i mas pilim tru long bel olsem dispela ofa bilong Jisas i mekim wanem long em yet na ol man i harim tok em i mekim. Em i bin pilim amamas tru long pasin bilong God Jehova na Krais Jisas long givim dispela pe i gutpela tru, na em i mas tingim dispela taim em i mekim tok bilong em. Em i mas tingting long gutpela sindaun olgeta man inap kisim​—stap amamas oltaim long wanpela paradais bai kamap bek long graun na no gat sik moa! Olsem na em i mas tingim ol dispela tok long bel bilong em.

Baibel i stori long Esra, wanpela tisa long Israel, olsem “Esra i man bilong wok strong [“redim bel bilong em,” NW] long kisim save long lo bilong Bikpela na long bihainim gut dispela lo. Na tu em i wok long skulim gut ol Israel long olgeta tok bilong lo.” (Esr. 7:10) Sapos yumi mekim olsem​—olsem redim ol tok na redim bel bilong yumi​—bai yumi mekim tok i kamap long bel bilong yumi. Taim yumi kamapim tok i tru i stap long bel bilong yumi dispela i ken helpim ol man yumi toktok long ol na bai ol i kisim pasin bilong laikim tumas tok i tru.

Tingim Ol Man i Harim Tok Bilong Yu. Bilong kamapim pasin bilong givim bel long mekim tok, i gat narapela bikpela samting yu mas tingim. Yu mas bilip tru olsem ol man i mas harim tok yu kamapim. Olsem na taim yu wok long redim tok, yu mas painim ol tok bilong helpim ol man na beten askim Jehova long stiaim yu long kamapim ol dispela tok long pasin i helpim ol man yu bai givim tok long ol. (Sng. 32:8; Mt. 7:​7, 8) Skelim gut wanem as na ol man i mas harim ol dispela tok, na em bai helpim ol olsem wanem, na olsem wanem yu ken kamapim ol dispela tok long wanpela rot ol man bai pilim tru ol gutpela samting bilong dispela tok.

Wok long redim tok bilong yu i go inap long taim yu redim sampela tok bel bilong yu i kirap tru long mekim. I no olsem yu mas kamapim ol nupela tok, tasol yu ken kamapim long narapela kain pasin. Bel bilong yu bai kirap long mekim dispela tok sapos yu redim ol tok em inap helpim ol man long pas gut wantaim Jehova, amamas long ol samting Jehova i givim long ol, karim ol hevi long i stap bilong ol long dispela taim nogut, o mekim gutpela wok moa long wok autim tok.

Olsem wanem sapos ol i makim yu long ritim buk samting long ai bilong ol man? Bilong mekim tok olsem yu givim bel tru, yu mas kolim stret ol tok na skruim ol tok wantaim long pasin i stret, tasol i gat narapela samting tu yu mas mekim. Stadi gut long ol tok yu laik ritim. Sapos yu bai ritim hap bilong Baibel, orait painim sampela save long dispela. Kisim save long as tingting bilong dispela tok. Skelim olsem wanem dispela tok i ken helpim yu na ol man i harim tok yu ritim, na taim yu rit yu mas i gat laik long ol man i ken save olsem wanem dispela tok i ken helpim ol.

Olsem wanem? Yu laik redi long mekim wok autim tok? Skelim gen tok yu laik toktok wantaim man long en wantaim ol skripsa yu laik kamapim. Tingim tu ol samting ol man i tingting long en. Niuspepa i bin stori long wanem samting? Wanem ol hevi i save painim ol dispela man? Taim yu redi long soim ol man olsem Baibel i kamapim rot bilong stretim ol hevi ol man i tingting planti long en, bai yu gat laik long toktok wantaim ol, na nau bai yu givim bel long mekim olsem.

Kamapim Pasin Bilong Givim Bel Taim Yu Mekim Tok. Taim bel bilong yu i kirap tru na yu mekim tok, dispela i kamapim olsem yu givim bel. Ol man inap save long dispela taim ol i lukim pes bilong yu. Nek bilong yu i mas kamapim olsem yu bilip tru long tok yu mekim, tasol no ken strong tumas olsem yu laik subim man long bilipim tok bilong yu.

Yu mas skelim gut na mekim long stretpela tingting. Bel bilong sampela i save kirap nating long olgeta samting ol i toktok long en. Ating ol i mas kisim helpim long save olsem taim man i hambak long kolim tok o bel i kirap tumas taim em i toktok, ol man i harim tok bai tingim em, na tok em i mekim, nogat. Tasol man i save sem long toktok, ol i mas kirapim em long kamapim ol tok i stap long bel bilong em.

Taim man i givim bel, dispela i save kirapim narapela long mekim olsem. Sapos yu save lukluk long ol man taim yu toktok na yu givim bel long mekim tok, ol man i harim tok bai pilim dispela. Apolos i bin givim bel long mekim tok, na ol man i tok em i man bilong mekim gutpela toktok. Sapos yu larim spirit holi i kirapim yu, orait taim yu givim bel long mekim tok dispela bai kirapim ol man long mekim samting.​—Ap. 18:​24, 25; Ro. 12:11.

Pasin Bilong Givim Bel i Mas Stret Long Tok Yu Kamapim. Sapos yu kolim olgeta tok long pasin olsem bel bilong yu i kirap tru i go inap long pinis bilong tok, ol man bai les. Na ol tok yu givim long ol bilong kirapim na strongim ol long mekim samting, em bai i lus nating. Olsem na yu mas redim tok i givim rot long yu long kamapim tok long kain kain pasin. No ken mekim tok long pasin i kamapim olsem yu les na yu no pilim tok yu mekim. Sapos yu skelim gut ol tok yu bai mekim, bai yu laik tru long mekim dispela tok. Tasol sampela tok yu mas mekim olsem yu givim bel moa long en, na yu mas kamapim ol dispela tok insait long tok bilong yu.

Yu mas givim bel taim yu kamapim ol bikpela tok. Tok bilong yu i mas i gat ol bikpela tok yu wok long kamapim. Ol dispela bikpela tok em bilong kirapim ol man long mekim samting. Orait taim ol man i bilipim tru tok bilong yu, nau yu mas kirapim ol, na soim ol olsem taim ol i bihainim dispela tok yu bin kamapim, dispela bai helpim gut ol. Pasin bilong yu long givim bel bai helpim yu long putim tok i go daun long bel bilong ol man i harim. Yu no ken strong tumas long mekim kain tok bilong kirapim nating bel bilong man. I mas i gat as na yu mekim olsem, na ol tok yu laik mekim bai kamapim dispela as.