“Yu Holim Yet Stretpela Tingting”

● Camila i gat dispela sik: Em i sot long blut, sampela hap bilong bodi i no wok gut, na em i no gro gut. Olsem na maski em i gat 8-pela krismas, longpela bilong em, em inap 75 sentimita tasol. Papamama bilong Camila, em ol i Witnes Bilong Jehova, ol i kisim em i go long wanpela kibung bilong ol dokta i kamap long wanpela ples bung long taun bilong ol long Ajentina. Inap 500 manmeri i stap long dispela bung. Camila na papamama bilong em ol i sindaun klostu long fran.

Long wanpela tok i kamap long dispela bung, dokta husat i mekim dispela tok, em i poinim han i go long Camila na i tok olsem Camila em i wanpela bilong ol lain husat i gat gutpela helt. Em i no save Camila i gat hamas krismas na em i gat wanem sik, olsem na em i askim: “Bebi i gat hamas mun?”

Mama bilong Camila em Marisa, em i tok: “Em i gat 8-pela krismas.”

Dokta i tok: “Yu tok em i gat 8-pela mun?”

Marisa i tok: “Nogat, em i gat 8-pela krismas.”

Dokta i kirap nogut na em i askim mama na pikinini meri long i go antap long pletfom bilong bekim sampela askim. Bihain long Marisa i stori long ol wok painimaut ol dokta i mekim long Camila na ol marasin ol i bin givim long Camila, dokta i tok: “I gat sampela mama em ol i save krai taim pikinini bilong ol i kisim kus. Tasol yu, inap 7-pela yia yu bin traim long painim kain kain marasin na rot bilong helpim Camila, tasol yu no givap, yu holim yet stretpela tingting. Wanem samting i mekim na yu holim stretpela tingting?”

Bilong bekim dispela askim, Marisa i stori long odiens long tok promis bilong Baibel long nupela taim bai kamap we olgeta kain sik, pen na dai bai pinis olgeta. (Aisaia 33:24; KTH 21:​3, 4) Bihain Marisa i stori long olsem wanem ol Witnes Bilong Jehova i amamas long i stap olsem wanpela bikpela lain brata long olgeta hap bilong graun. Na em i stori tu long olsem wanem pasin laikim bilong ol i helpim ol long karim ol kain kain hevi na traim i save kamap long laip bilong ol.​—⁠Jon 13:⁠35.

Taim program i pinis, wanpela meri i kam long Marisa na i askim em long stori moa long ol tok em i bin mekim. Meri i laik kisim sampela save moa, olsem na em i orait long ol i mekim fri Baibel stadi wantaim em. Ol Witnes Bilong Jehova long olgeta hap i save amamas long mekim fri Baibel stadi wantaim ol man husat i gat laik long kisim save long ol tok bilong Baibel, na long samting em God i tingting pinis long mekim bilong helpim yumi ol manmeri bilong graun.

[Piksa long pes 13]

Camila husat i gat 8-pela krismas wantaim mama bilong em, Marisa