Husat i As Bilong Wok Spirit?

BAIBEL i tok long Man Bilong Wokim yumi, olsem: “God em i lait na tudak i no stap long em.” (1 Jon 1:⁠5) Long ol samting bilong lotu, dispela tok em i tru. Olsem na yu ting trupela God em i as tru bilong wok bilong ol spirit? O yu ting i gat wanpela spirit nogut i as bilong dispela wok?

Wok bilong ol glasman, pasin bilong lukluk long ol sta bilong painimaut long samting bai kamap bihain, pasin bilong skelim ol namba em ol man i ting i gat tok hait long en, na lukluk long ol mak bilong han bilong kisim save long ol samting bai kamap bihain, na wok bilong marila posin, na pasin bilong toktok wantaim ol daiman, olgeta dispela samting i insait long wok bilong ol spirit. Dispela ol pasin i bin stap long bipo yet, kirap long taim bilong kantri Babilon bilong bipo na i kam inap long nau. Long nau ol pipia ston bilong Babilon i stap yet long Irak. (Aisaia 47:​1, 12, 13) Long dispela taim bipo, wok bilong ol spirit i kirap long Babilon na i go long ol narapela kantri na planti bilong ol dispela kantri i kirap bihainim ol dispela pasin long kastam bilong ol.

Tingim samting i bin kamap long taun Filipai long Masedonia bilong bipo. Long dispela taun, sampela Kristen wantaim aposel Pol na dokta Luk, ol i bungim wanpela meri husat i mekim wok bilong ol spirit. Lukim tok Luk, em man bilong raitim Baibel, i kamapim long husat tru i givim strong long dispela meri. Luk i tok: “Mipela i bungim wanpela wokmeri em wanpela spirit nogut i stap long em na i save givim save long em long ol samting i stap hait. Ol bosman bilong dispela meri i save kisim planti mani long wok bilong en long tokaut long ol samting bai kamap bihain.”​—⁠Aposel 16:​16-18.

Em nau, trupela God, Jehova, i no givim strong long dispela meri, nogat, wanpela spirit nogut i givim em dispela strong. Olsem na Pol wantaim ol poroman bilong em i no laik harim tok bilong dispela meri. Ating nau yu laik save: ‘Ol spirit nogut ol i husat? Na ol i kam long we?’ Lukim gen tok Baibel i mekim.

Ol Spirit Nogut Ol i Husat?

Paslain tru long Jehova i wokim ol man, em i bin wokim planti milion milion “ensel” long heven. (Jop 38:​4, 7) Olsem ol man, ol ensel tu i stap fri long makim wanem rot ol i laik bihainim, na inap longpela taim tru olgeta ensel i bin stap gut long God. Tasol bihain sampela samting i kamap na i bagarapim gutpela sindaun bilong ol. Dispela samting i kamap olsem wanem?

Taim God i wokim pinis ol man, wanpela ensel i kirap mangal long samting i no bilong em​—⁠em i laik bai ol man i lotuim em. Dispela ensel nogut i yusim snek bilong grisim Iv long sakim tok bilong Man Bilong Wokim em. (Stat 3:​1-6) Baibel i kolim dispela bikhet ensel olsem “dispela snek bilong bipo yet, ol i kolim em Devil na Satan.” (Revelesen 12:⁠9) Jisas i kolim em olsem “man bilong kilim man i dai” na “em i no holimpas tok i tru.” Na Jisas i tok moa: “Taim em i mekim tok giaman, em i mekim pasin tru bilong em, long wanem, em i man bilong giaman na papa bilong pasin giaman.”​—⁠Jon 8:⁠44.

Bihain ol narapela ensel, em “ol pikinini man bilong God,” ol tu i kirap bihainim Satan long bikhet long God. (Stat 6:​1, 2) Baibel i kolim ol olsem “ol ensel husat i bin mekim sin” na “ol ensel husat i no stap gut long wok bilong ol na ol i lusim ples stret bilong ol” long heven. (2 Pita 2:4; Jut 6) Olsem na Baibel i kolim ol olsem ol spirit nogut. (Jems 2:19) Olsem ol i bin mekim long lain Israel long bipo, ol dispela spirit nogut i wok strong tru long pulim planti manmeri long lusim lotu i tru. (Lo 32:​16, 17) Olsem Satan i bin mekim long pastaim, long nau tu, em wantaim ol spirit nogut i mekim wok long ol bilip giaman bilong ol lotu long paulim ol man.​—⁠2 Korin 11:​14, 15.

Lukautim Yu Yet!

Tru, ol spirit nogut i gat strong winim yumi ol man, tasol God bai helpim yumi long ‘sanap strong na sakim ol’ na bai yumi inap winim ol. (1 Pita 5:⁠9) Bilong God i ken helpim yumi, yumi mas kisim save long ol lo bilong em na bihainim. Aposel Pol i tingim ol Kristen long taim bilong em na em i tok: “Oltaim mipela i save beten askim God long helpim yupela. Mipela i beten olsem stretpela save long ol laik bilong em i ken pulap long yupela na yupela i ken kisim olgeta savetingting na holi spirit i ken helpim yupela long kisimgut ol tok. Olsem bai yupela inap wokabaut olsem ol manmeri tru bilong Jehova na olgeta samting yupela i mekim bai amamasim em.”​—⁠Kolosi 1:​9, 10.

Sampela bilong ol lain i kisim “stretpela save,” em ol manmeri long taun Efesus husat i insait long wok bilong ol spirit nogut. Save ol i kisim long tok i tru i kirapim ol long mekim sampela samting. Baibel i tok: “Planti bilong ol husat i save wokim ol kain kain marila posin samting, ol i karim ol buk bilong ol i kam na kukim long ai bilong olgeta manmeri.” Pe bilong ol dispela buk em inap olsem “50,000 mani silva,” em bikpela mani tru! (Aposel 19:​17-19) Dispela stori i stap long Baibel i bilong helpim yumi.​—⁠2 Timoti 3:⁠16.

Ol Stiatok i Lukautim Yumi

I gat ol narapela samting tu yumi inap mekim bilong sakim ol spirit nogut. Skelim ol dispela tok bilong Baibel.

“No ken bilipim olgeta tok profet, tasol yupela i mas traim ol dispela tok profet bilong save olsem ol i kam long God o nogat.” (1 Jon 4:⁠1) Bilong save sapos tok bilong lotu em i tru o nogat, yumi mas skelim ol tok bilong en wantaim tok bilong Baibel. (Aposel 17:11) Tasol sampela taim tok bilong ol glasman, o tok ol man bilong lukluk long sta i mekim, em i tru. Olsem: Dispela meri long Filipai em spirit nogut i stap long em, em i tok tru taim em i tok long Pol na ol poroman bilong em, olsem: “Ol dispela man i wokboi bilong God Antap Tru, na ol i autim tok long yupela long rot bilong God long kisim bek yupela.” (Aposel 16:17) Tasol Pol wantaim ol poroman bilong em i no orait long dispela meri i raun wantaim ol. Pol i tokim spirit nogut long lusim em.

“Olsem na yupela i mas daunim yupela yet na stap aninit long God. Tasol yupela i mas sakim Satan, na em bai lusim yupela na ranawe.” (Jems 4:⁠7) Ol spirit nogut i birua bilong God na ol i birua bilong yu tu. No ken tingting liklik long kisim save long wok bilong ol. Yu mas daun long God na bihainim ol lo bilong em, em ol dispela lo i no givim hevi long yumi. (1 Jon 5:⁠3) God i tokim lain Israel bilong bipo olsem: “Yupela i no ken larim ol manmeri bilong yupela i mekim olkain pasin bilong glasman, na pasin tambaran na pasin sanguma na wokim posin na mekim marila. Na yupela i no ken toktok wantaim tewel bilong ol man i dai pinis. God, Bikpela bilong yumi, i no laikim tru ol manmeri i save mekim ol dispela kain pasin nogut.” (Lo 18:​10-12) Tingting bilong God long ol dispela samting i no senis.​—⁠Galesia 5:​19, 20.

“Sapos ol birua i wokim posin na sanguma samting long ol [wokman bilong Jehova], dispela i no inap bagarapim ol.” (Namba 23:23) Olgeta manmeri husat i laik amamasim God, ol i no ken pret long ol spirit nogut. Ol spirit nogut i save “guria” long God, long wanem, ol i save olsem em i gat bikpela strong, na em bai yusim dispela strong long bagarapim ol. (Jems 2:19) God bai “was gut long ol manmeri i save aninit long em wanpela tasol” na “bai em i no larim wanpela samting i bagarapim ol stretpela man.”​—⁠2 Stori 16:9; Song 55:⁠22.

“Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting.” (Saveman 9:​4, 5) Baibel i tok ol man i dai pinis​—⁠ol i no stap moa! Yumi no ken pret long ol, long wanem, ol i no inap mekim wanpela samting bilong bagarapim yumi. (Aisaia 26:14) Sampela taim ol spirit nogut i save giaman olsem ol i tewel bilong man i dai pinis, olsem na pasin bilong dispela “tewel” i no wankain stret long pasin bilong dispela man i dai pinis.

“Yupela i no inap kaikai long ‘tebol bilong Jehova’ na long tebol bilong ol spirit nogut wantaim.” (1 Korin 10:​21, 22) Ol man husat i laikim tru Jehova, ol bai stap longwe long ol buk, ol muvi, na ol kompiuta gem we i kamapim ol wok bilong ol spirit nogut.a Buk Song 101:3 i tok: “Mi no ken orait long pasin nogut. Nogat tru.” Na tu, planti taim ol amamas i kamapim wok bilong ol spirit nogut i save litimapim pasin bilong pait na bagarapim man, na pasin pamuk, em ol pasin we ol man i “laikim tru” Jehova ol i sakim.​—⁠Song 97:⁠10.

Oltaim ol spirit nogut i save traim long haitim pasin tru bilong ol. Tasol ol i no inap haitim tru olgeta pasin bilong ol. Long rot bilong Baibel, Jehova i kamapim klia pasin tru bilong ol spirit nogut​—⁠ol i lain bilong giaman na ol i birua bilong ol man. Tasol God Jehova, em Man Bilong Wokim yumi em i no olsem! Olsem dispela stori i kamapim, em i laikim yumi, na olgeta taim em i save mekim tok tru tasol na em i laik bai yumi stap amamas oltaim oltaim.​—⁠Jon 3:16; 17:17.

[Futnot]