Mi Amamas Long Laip Bilong Mi

Stori bilong Herawati Neuhardt

Mi bon long Cirebon, em wanpela siti long Indonesia. Dispela siti i gat nem long wanpela kain laplap, em ol i save daim na droim ol kain kain naispela disain long en. Laip bilong mi olsem wanpela misineri i kain olsem dispela laplap i gat kain kain kala​—⁠mi bungim ol manmeri bilong kain kain sindaun long Saut-is Esia na long Saut Pasifik. Orait nau mi ken stori.

LONG 1962, taim mi gat 10-pela krismas, mama bilong mi i kirap stadi long Baibel wantaim ol Witnes Bilong Jehova. Bihain, em wantaim papa, em tupela i bilong Saina​—⁠tasol tupela i bon long Indonesia​—⁠na mipela ol 5-pela pikinini bilong tupela, mipela olgeta i kamap ol Witnes.

Planti taim ol misineri na ol wasman husat i save raun lukim ol kongrigesen i save stap wantaim mipela taim ol i kam lukim kongrigesen bilong mipela. Gutpela pasin bilong ol na ol gutpela tok ol i save givim bilong strongim mipela i bin helpim mi tru. Taim mi gat 19 krismas, mi kirap mekim wok Kristen fultaim. Wanpela yia bihain mi maritim Josef Neuhardt, em wanpela misineri bilong Jeman husat i bin kam long Indonesia long 1968. Bihain long hanimun bilong mitupela, ol i salim mipela i go long Sumatra, em namba 2 bikpela ailan bilong Indonesia. Indonesia i gat winim 17,000 ailan. Long Sumatra Josef i kirap mekim wok olsem wanpela wasman raun na em i save go lukim ol kongrigesen bilong ol Witnes Bilong Jehova bilong strongim ol, na mi save go wantaim em.

Autim Tok Long Sumatra

Hap mipela i raun mekim wok autim long en i kirap long biktaun Padang long Wes Sumatra na i go long naispela raunwara Toba i stap long ol ples maunten bilong Not Sumatra. Bihain ol i salim mitupela i go long hap saut bilong dispela ailan. Mipela i save raun long olpela liklik kar bilong mipela long ol bus rot i gat planti pot-hol, ron antap long ol bris em ol i wokim long diwai bilong kokonas, na long rot i stap klostu tru long ol volkeno, em sampela bilong ol i pairap yet na sampela i no pairap moa. Long nait mipela i save slip long plua bilong ol haus kunai i no gat pawa, paip wara, na ples waswas. Mipela i save waswas long ol raunwara na ol bikpela wara. Em simpol laip, na mipela i laikim tru ol manmeri. Ol i save welkamim mipela na givim mipela kaikai, na planti bilong ol i laik kisim save long tok bilong Baibel.

Long Padang, ol lain Minangkabau, em planti bilong ol i Muslim, ol i kirap nogut na amamas taim mipela i soim ol long Baibel olsem i gat wanpela God tasol i stap​—⁠na em i no hap bilong God Triwan olsem planti lotu bilong Kristendom i save tok. (Lo 6:⁠4) Planti i save amamas long kisim nius Wastaua na Kirap! Na sampela bilong ol i stadi long Baibel na ol i kirap mekim wok bilong God. Long raunwara Toba, ol lain Batak, planti bilong ol i tok ol i Kristen, ol i save pinis long nem bilong God, em Jehova, long wanem, dispela nem i stap long Batak Baibel bilong ol. (Song 83:18) Tasol ol i mas kisim stretpela save long God na long ol samting em i tingting pinis long mekim bilong helpim ol manmeri. Planti bilong ol i kirap stadi long Baibel na ol i kamap ol Kristen i givim bel long autim tok.

Autim Tok Long Java

Long 1973 ol i salim mitupela Josef i go long ailan Java. Sapos yu brukim Inglan i go long tupela hap, ailan Java bai inapim wanpela hap bilong Inglan. I gat winim 80 milion manmeri long dispela ailan.a Mipela i autim gutnius long ol Java, ol Sunda, na ol Saina.

Famili bilong mi i bilong Saina, tasol bikos mipela i bon na kamap bikpela long Indonesia, mi inap mekim ol narapela tokples, olsem tokples Java, Sunda, Indonesia, na tok Inglis. Olsem na mi save amamas tru long stori wantaim ol man long tok bilong Baibel long tokples bilong ol yet.

Long Jakarta​—⁠em biktaun bilong Indonesia long Java​—⁠mi bungim wanpela yangpela meri i gat 19 krismas. Pes bilong em i soim olsem em i bel hevi. Mi autim tok long em olsem ol man inap stap laip oltaim long Paradais long graun. Taim mi wok long ritim Baibel, em i krai na i tok: “Tenkyu Anti long tokim mi long ol dispela samting.” Ol i save yusim dispela tok “Anti” bilong soim olsem ol i tingim na rispek long narapela. Na em i tok moa: “Inap long tumora, mi mas i gat 1.5 milion rupiah [$160, U.S.] moa bilong baim skulfi bilong mi long yunivesiti, na mi tingting long salim mi yet bilong kisim mani bilong baim dispela skulfi. Paslain long yu kam mi wok long beten long God i ken soim rot long mi. Tasol nau mi kisim pinis bekim. Nau mi tingting strong long wet liklik pastaim, na tu, stap klin long ai bilong God.” Dispela yangpela meri i amamas long kisim save moa long Baibel.

Kirap long taim mi bin bungim dispela yangpela meri, planti moa ol Java, ol Sunda, na ol Saina i harim tok na i senisim pasin bilong ol bambai i stret wantaim ol stiatok bilong Baibel. Dispela i mekim na ol i stap bel isi na amamas, olsem God i bin promis long en.​—⁠Aisaia 48:​17, 18.

Kalimantan​—⁠Ples Bilong Ol Dayak

Mitupela Josef i lusim Java na i go long Kalimantan, em wanpela provins bilong Indonesia i stap long Borneo. Borneo em namba 3 bikpela ailan long graun (namba 1 em Greenland, na namba 2 em New Guinea). Em i gat ol bikbus, ol maunten, na ol bikpela wara. Ol Saina, lain Malay i bihainim lotu Muslim, na ol asples Dayak i stap long Borneo. Ol Dayak, em ol lain i save sindaun arere long ol bikpela wara. Bipo ol man i save pret tru long ol, long wanem, ol i save kilim ol man i dai na katim na rausim het bilong ol.

Bilong i go long ol ples bilong ol Dayak, mipela i mas kalap long bot o kanu na bihainim ol wara long bikbus i go. Ol traipela pukpuk i save slip arere long wara, ol monki antap long ol diwai i save lukluk i kam daun long mipela, na ol naispela kala kala pisin i save flai antap. Tru tumas, wok misineri long dispela hap i givim bikpela amamas long mipela!

Planti famili Dayak i save stap long ol longpela pos haus, em ol i wokim long kunai. Sampela haus i liklik; na sampela ol i longpela na bikpela inap long 10 o 20 famili i ken stap long en. Planti bilong ol i no bin lukim waitman bipo, olsem na ol i laik lukim Josef. Ol pikinini i save ron i go na singaut olsem, “Pasto! Pasto!” Na olgeta ples lain i save kam bung bilong harim tok dispela waitman bai mekim. Josef i save autim tok na ol asples Witnes i save tanim tok bilong em i go long tokples Dayak. Na ol dispela asples Witnes i save stretim rot bilong mekim Baibel stadi wantaim planti husat i laik kisim save moa long tok bilong Baibel.

Go Long Papua Niugini

Ol narapela lotu i no amamas long wok bilong ol Witnes Bilong Jehova, olsem na gavman bilong Indonesia i tambuim wok bilong ol Witnes long Disemba 1976. Dispela i mekim na ol i salim mitupela Josef i go long Papua Niugini.

Taim mipela i kamap long Port Moresby, inap tupela mun mipela i lainim tokples Hiri Motu. Bihain ol i salim mipela i go long Daru long Westen Provins. Long hap mi bungim Eunice, em wanpela meri i gat bikpela skin, na em i save amamas long bungim ol narapela. Inap planti yia em i save kaikai buai, olsem na tit bilong em i blak nogut tru. Taim Eunice i kisim save olsem God i laik bai ol wokman bilong em i mas stap klin long skin na long ol samting bilong lotu, em i lusim pasin bilong kaikai buai na em i kamap wanpela gutpela Kristen. (2 Korin 7:⁠1) Long olgeta taim mipela i lukim ol kain man olsem i gat pasin daun i bihainim ol tok i tru bilong Baibel, mipela i pilim moa yet tok bilong Song 34:​8, em i tok: “Yupela yet i mas traim na lukim na bai yupela i save olsem Bikpela i gutpela tru.”

Bihain, Josef i kirap gen long mekim wok olsem wasman raun, na mipela i visitim ol kongrigesen long klostu olgeta hap bilong Papua Niugini, em kantri i gat olsem 820 tokples. Mipela i mas lainim gen narapela tokples, em Tok Pisin, bambai mipela i ken toktok wantaim planti man moa. Bilong i go long ol narapela narapela taun na ol ples, mipela i mas wokabaut, o go long kar, bot, o kanu, o liklik balus. Na tu, mipela i mas lain long stap long ples i hat na i gat planti moskito long en, na mipela i save kisim tu malaria.

Long 1985, ol i singautim mipela i go mekim wok misineri long Solomon Ailan, em i stap long hap is bilong Papua Niugini. Long hap, mipela i wok long brens ofis bilong ol Witnes Bilong Jehova, na tu, mipela i save go long ol liklik ailan bilong Solomon Ailan bilong strongim ol kongrigesen na bilong go long ol kibung Kristen i kamap long hap. Olsem na mipela i mas lainim gen narapela tokples​—⁠em Tok Pisin bilong Solomon Ailan. Tasol mipela i amamas taim mipela i toktok wantaim ol manmeri bilong Solomon Ailan, em ol lain i save laikim tok bilong Baibel.

Hevi i Painim Mi

Long 2001, gavman bilong Indonesia i rausim tambu long wok bilong ol Witnes Bilong Jehova, olsem na mitupela Josef i go bek long Jakarta. Tasol i no longtaim bihain, gutpela man bilong mi i kisim skin kensa em ol i kolim melanoma, em wanpela kain kensa i nogut tru. Mipela i go long as ples bilong Josef long Jemani bambai em i ken kisim ol marasin. Tasol sori tru, long 2005, em namba 33 yia bilong mitupela i marit, Josef i dai. Em i wetim dispela taim we em bai kirap bek na stap laip long Paradais long nupela taim. (Jon 11:​11-14) Em i gat 62 krismas long taim em i dai na inap 40 yia em i bin mekim wok bilong God fultaim.

Mi stap nau long Jakarta, na mi mekim yet wok olsem wanpela misineri. Long nau mi kirap lainim narapela kain tokples​—⁠em tokples Sain bilong ol yaupas bilong Indonesia. Dispela i kamapim gutpela samting, long wanem, mi bin painim planti yaupas husat i hangre long kisim save long tok i tru bilong Baibel.

Mi misim tru man bilong mi. Tasol taim mi skulim ol narapela long ol gutpela tok i tru bilong Baibel, dispela i helpim mi long karim hevi bilong mi, long wanem, wok autim tok i mekim mi stap amamas na i stap bilong mi i gat as bilong en. Tru tumas, mi inap tok olsem Jehova i bin opim rot long mi ken kisim planti gutpela samting long i stap bilong mi.

[Futnot]

[Mep long pes 23]

Raunwara Toba

Padang

Sumatra

Borneo

INDONESIA

JAKARTA

Cirebon

Java

PAPUA NIUGINI

Daru

PORT MORESBY

SOLOMON AILAN

[Piksa long pes 24]

Herawati wantaim wanpela Baibel stadi na ol pikinini bilong em long Solomon Ailan

[Piksa long pes 24]

Wantaim Josef long Holan, paslain long em i dai long 2005