Tok Ol Papamama i Mekim
Sapos pikinini i no skul yet, ating yu gat sampela hatwok. Taim em i krai krai na bikhet, yu mas mekim wanem? Olsem wanem yu ken skulim em long wanem pasin i stret o i no stret, na bihainim stretpela tingting long stretim em? Orait tingim ol samting sampela papamama i bin mekim.
KRAI KRAI NA BIKHET
“Taim pikinini i gat tupela krismas, em i ting em i mas kisim olgeta samting em i laikim. Pikinini man bilong mipela i olsem. Sapos em i no kisim ol samting em i laikim, em bai tromoi nabaut ol samting. Em fesbon olsem na mipela i no gat save long dispela kain pasin bikhet. Na mipela i bel hevi moa taim sampela papamama i tok, dispela em nomol tasol.”—Susan, Kenya.
“Taim pikinini meri bilong mipela i gat tupela krismas, em bai slip long plua, singaut, krai, na tromoi lek nabaut . . . Mi les tru long dispela! Long kain taim olsem, mi traim long toktok long em, tasol i no wok. Olsem na mipela i save salim em i go long rum bilong em na tok isi long em olsem, taim bel bilong em i kol, mipela bai toktok wantaim em long dispela. Taim em i stap isi, mi o papa bilong em bai go long rum na tokim em long as na mipela i no orait long pasin bilong em. Dispela i wok gut. Wanpela taim mipela i harim em i beten askim God long fogivim em. Isi isi bikhet bilong em i wok long pinis, na bihain em i lusim olgeta.”—Yolanda, Spen.
“Ol pikinini i save traim papamama, olsem tupela bai les na larim ol o nogat. Sapos yu bin tambuim pikinini long mekim wanpela samting na nau yu larim em i mekim, em bai i no klia long lo bilong yu. Taim mipela i strong na mipela i no senisim tok bilong mipela, isi isi ol pikinini i kisim save olsem, krai na bikmaus nabaut i no rot bilong kisim ol samting ol i laikim.”—Neil, Briten.
STRETIM PIKININI
“Taim pikinini i no winim yet 5-pela krismas, i hatwok long save em i putim yau o nogat. Olsem na yu mas kolim planti taim ol tok yu mekim long em, na wokim han, na nek i mas strong liklik bilong soim olsem yu no toktok nating tasol.”—Serge, Frans.
“Maski 4-pela pikinini bilong mipela i gat wankain sindaun, ol i no wankain. Wanpela bai krai sapos em i save em i bin mekim mipela i bel hevi, na narapela bai traim mipela, olsem mipela bai les na larim em o nogat. Sampela taim sapos pes bilong mipela i strong o mipela i krosim ol, em inap, tasol sampela taim mipela i mas givim strafe long ol.”—Nathan, Kanada.
“Yumi no ken senisim tingting na bihainim laik bilong pikinini. Tasol yumi no ken mekim hatpela pasin. Sampela taim, sapos pikinini i sori tru long pasin bikhet em i bin mekim, mipela i save isi long em taim mipela i stretim em.”—Matthieu, Frans.
“Mi no laik putim planti lo tumas, tasol ol lo mi putim, mi no ken senisim. Pikinini man bilong mi i gat 3-pela krismas em i save sapos em i sakim tok em bai kisim strafe, na dispela i helpim em long bihainim tok. Tru, taim skin bilong mi i les, em bai isi moa sapos mi larim em tasol. Tasol mi no laik senisim nabaut tok mi bin mekim, olsem na mi mas stretim em. Em i bikpela samting long yumi no ken senisim tok bilong yumi!”—Natalie, Kanada.
NO KEN SENISIM NABAUT TOK
“Olgeta taim papa o mama i senisim ol tok ol i mekim, ol liklik pikinini bai tingim i stap.”—Milton, Bolivia.
“Sampela taim pikinini bai askim mipela planti taim long wanpela samting, tasol em bai mekim long narapela narapela pasin bilong traim mipela, bai mipela i givim wankain bekim long em o nogat. O sapos mi mekim wanpela tok na mama i mekim narapela tok, em bai ting dispela i givim rot long en long mekim samting em i laikim.”— Ángel, Spen.
“Taim mi stap amamas, mi larim pikinini i bikhet nabaut, tasol taim mi no stap amamas, mi mekim save tru long em. Tasol dispela i mekim na em i bikhet moa yet.”—Gyeong-ok, Korea.
“Ol liklik pikinini i mas save, sapos nau wanpela pasin i no stret long mekim, orait long bihain tu bai i no stret long mekim.”—Antonio, Brasil.
“Sapos sampela taim papamama i stretim pikinini na sampela taim ol i larim em, pikinini bai paul, em bai ting pasin bilong ol long stap amamas o nogat i bosim samting ol i mekim. Tasol sapos papamama i bihainim stret lo bilong ol, pikinini bai save olsem lo bilong papamama i no save senis nabaut. Em wanpela wei bilong helpim pikinini long stap bel isi na pilim pasin laikim bilong papamama.”—Gilmar, Brasil.
“Ol pikinini inap luksave long wanem taim i gutpela bilong askim askim long wanpela samting na mama bai les na orait long en—olsem long taim ol narapela lain i stap wantaim mipela. Sapos mi tok nogat long pikinini, mi save kamapim klia olsem mi no ken putim yau taim em i krai krai long ol samting.”—Chang-seok, Korea.
“Papa na mama wantaim i mas wanbel long ol lo ol i putim. Sapos mi na meri bilong mi i no wanbel long wanpela samting, orait taim mitupela tasol i stap, mipela bai toktok long dispela samting. Pikinini inap save taim papamama i no wanbel long wanpela samting, na em bai traim tupela long dispela taim.”—Jesús, Spen.
“Taim pikinini i save papamama i wanbel na em i no inap kirapim papa o mama long bihainim tingting bilong em, dispela i helpim pikinini long i stap gut. Em i save long samting papamama bai mekim sapos em i bihainim tok o em i bikhet.”—Damaris, Jemani.
“Taim mi na meri bilong mi i tok promis long givim wanpela gutpela samting long pikinini meri bilong mipela, orait mipela save bihainim dispela tok. Long dispela rot em i lain olsem em inap bilip long ol tok promis bilong mipela.”—Hendrick, Jemani.
“Sapos bos i wok long senisim tok long samting em i laik bai mi mekim long wok, dispela bai sikirapim bel bilong mi. Ol pikinini tu i wankain. Taim ol i save long ol lo bilong papamama na ol dispela lo i no inap senis, ol i pilim olsem ol i stap gut. Na ol i mas save tu long samting bai painim ol sapos ol i bikhet, na dispela tu i no inap senis.”—Glenn, Kanada.
[Rait long pes 8]
“Yes bilong yupela i mas minim Yes tasol, na Nogat bilong yupela i mas minim Nogat tasol.”—Jems 5:12
[Blok/Ol Piksa long pes 9]
OL SAMTING BILONG FAMILI
Kirap Nogut Long Kisim Bel—Mipela i Stretim Tingting
Stori bilong Tom na Yoonhee Han
Tom: Mitupela i bin marit inap 6-pela mun tasol na meri bilong mi, Yoonhee, i kisim save olsem em i gat bel. Mi mekim olsem mi stap bel isi, long wanem, mi laik soim Yoonhee olsem mi bai helpim em na mekim gut bel bilong em. Tasol bel bilong mi i guria stret!
Yoonhee: Mi bel hevi tru—na mi pret! Mi krai planti. Mi ting mi no redi long kamap mama, na mi no inap mekim wok mama.
Tom: Na mi pilim olsem mi no redi long kamap papa! Tasol taim mipela i toktok wantaim sampela papamama, mipela i luksave olsem planti marit ol i bin karim pikinini em ol i no bin tingting long kamapim. Na tu, ol narapela i stori long amamas ol i kisim long i stap papa o mama, na dispela i helpim mipela. Isi isi mi no tingting planti moa, na mi wetim pikinini i kamap.
Yoonhee: Taim mi karim Amanda pinis, ol nupela hevi i kamap. Em i krai oltaim, na inap planti wik mi no slip liklik. Mi no laik kaikai na skin bilong mi i no gat strong. Pastaim mi no laik i stap wantaim ol narapela. Tasol bihain mi save, sapos mi stap wanpis tasol long haus, dispela i no inap helpim mi. Olsem na mi toktok wantaim ol narapela nupela mama, na nau mi save ol i gat wankain hevi olsem mi.
Tom: Mi wok strong long bihainim yet sediul bilong mipela famili. Mitupela Yoonhee i Witnes Bilong Jehova, olsem na mipela i strong long autim tok long olgeta wik na go long olgeta miting Kristen. Na tu, mipela i mas lusim bikpela mani bilong lukautim pikinini. Mipela i was gut na baim ol samting inap tasol long mipela na bai mipela i no gat dinau, nogut mipela i kisim sampela hevi moa.
Yoonhee: Pastaim mi no ting mi ken kisim pikinini i go long autim tok, nogut em i krai na bagarapim wok bilong mipela. Tasol ol manmeri i save amamas long lukim ol bebi. Dispela save i helpim mi long mekim yet wok autim tok na amamas long pikinini bilong mi.
Tom: Baibel i tok ol pikinini i “olsem presen” Jehova i givim long yumi, na “ol i gutpela blesing tru yumi kisim.” (Song 127:3) Dispela tok i soim olsem pikinini em i gutpela presen tru. Yumi ken lukautim gut dispela samting yumi bin kisim, o yumi ken mekim nabaut long en. Mi luksave olsem dispela haptaim we pikinini i wok long kamap bikpela i narapela kain tru, na mi mas stap wantaim pikinini na lukim ol senis i kamap long en. Long wanem ol dispela samting i no inap kamap gen.
Yoonhee: Sampela taim yumi save kirap nogut long ol samting i kamap long yumi, na taim yumi gat wanpela pikinini yumi no bin tingting long kamapim, dispela em i no samting nogut. Nau Amanda i gat 6-pela krismas, na mi amamas tru long mipela i gat dispela pikinini.
[Piksa]
Tom, Yoonhee na pikinini bilong ol, Amanda