Tok Ol Papamama i Mekim
Taim pikinini i kamap bikpela dispela i givim nupela hatwok long papamama. Olsem wanem yu inap helpim pikinini long i stap gut long dispela haptaim long laip bilong em—we ating yu no kliagut long en na em tu i no kliagut long en? Skelim tok em sampela papamama i mekim.
SENIS I KAMAP
“Taim pikinini man bilong mi i liklik, em i save bihainim tasol olgeta tok bilong mi. Tasol nau em i tineja na em i gat tupela tingting long tok bilong mi. Nau em laik save long as na mi mekim wanpela tok na pasin bilong mi long kamapim dispela tok.”—Frank, Kanada.
“Pikinini man bilong mi i no save stori tumas wantaim mi olsem pastaim em i save mekim. Mi mas askim em long kamapim tingting bilong em na em i save mekim olsem. Taim mi kamapim wanpela askim long em, em bai bekim, tasol em bai i no bekim hariap.”—Francis, Australia.
“Pasin bilong i no les kwik em i bikpela samting. Sampela taim yumi laik krosim ol pikinini, tasol yumi mas daunim na toktok gut wantaim ol, dispela em i gutpela rot long bihainim!”—Felicia, Amerika.
TOKTOK GUT WANTAIM
“Sampela taim pikinini meri bilong mi i no laik bai mi save long wanpela samting bilong em, na sampela taim em i pilim olsem mi krosim em nating! Mi mas tokim em olsem mi laikim em na mi laik bai ol samting em i mekim i ken kamap gutpela!”—Lisa, Amerika.
“Taim ol pikinini bilong mi i liklik ol i save kamapim tingting bilong ol long mi. I no hatwok long kirapim ol long kamapim tingting bilong ol. Tasol nau mi mas traim long pilim tingting bilong ol na soim olsem mi rispektim ol. Taim mi mekim olsem, ol i redi long tokim mi long tingting na filings bilong ol.”—Nan-hi, Korea.
“Yumi no ken putim tambu tasol long ol tineja. Yumi mas toktok gut wantaim ol na mekim ol tok ol inap pilim long bel. Sapos yumi laik kirapim ol long kamapim tingting bilong ol, yumi mas redi long putim yau long tok ol i kamapim, maski sampela taim ol i kamapim ol tok em yumi no laik harim.”—Dalila, Brasil.
“Sapos mi mas stretim pikinini meri bilong mi, mi no save mekim long ai bilong ol narapela.”—Edna, Naijiria.
“Sampela taim mi toktok wantaim pikinini man bilong mi, na ol narapela samting bilong haus i pulim tingting bilong mi na mi no putim yau tumas long tok bilong em. Em i luksave long dispela, na mi ting dispela i as na em i no laik toktok tumas wantaim mi. Taim mitupela i toktok mi mas putim gut yau long tok bilong em na dispela bai mekim na em inap kamapim yet tingting bilong em long mi.”—Miriam, Meksiko.
BOSIM OL YET
“Mi tingting planti long larim tupela pikinini bilong mi long bihainim tumas laik bilong ol yet, na dispela i save kamapim tok pait. Mi toktok wantaim ol long dispela samting. Mi stori gut long as na mi tingting planti, na tupela tu i stori gut long as na tupela i laik bai mi larim tupela i stap fri long mekim sampela samting. Mipela i toktok gut wantaim na wanbel olsem ol i ken bihainim laik bilong ol yet tasol ol i no ken abrusim mak mi putim.”—Edwin, Gana.
“Pikinini man bilong mi i laikim motobaik. Mi no laik stret long em bai baim wanpela motobaik olsem na mi kros na tokim em long olgeta samting nogut inap kamap sapos em i baim wanpela motobaik, na mi no larim em long kamapim tingting bilong em long dispela samting. Dispela i mekim em i belhat na em i tingting strong moa long baim wanpela motobaik! Nau mi traim narapela rot. Mi tokim em long skelim gut ol samting pastaim, kain olsem hevi inap kamap, hamas mani em bai tromoi, na ol samting em i mas mekim bilong kisim laisens. Mi tokim em tu long kisim tingting bilong ol strongpela Kristen insait long kongrigesen. Mi luksave olsem pasin bilong kros i no kamapim gutpela samting, tasol i gutpela moa long kirapim em long kamapim tingting bilong em. Long dispela rot em inap pilim tru tok bilong mi.”—Hye-young, Korea.
“Mipela i putim ol tambu long ol, tasol isi isi mipela i larim ol i mekim sampela samting. Na taim ol i mekim gut ol dispela samting, orait nau mipela i larim ol i stap fri long mekim sampela samting moa. Mipela i laik bai ol i save olsem mipela i amamas long ol i kisim sampela fridom moa, olsem na mipela larim ol i mekim ol samting we ol inap soim olsem ol i redi long dispela samting. Tasol sapos ol i mekim ol samting we i soim olsem mipela i no inap trastim ol, orait mipela givim strafe long ol.”—Dorothée, Frans.
“I no gat wanpela taim mi bin senisim ol lo mi putim. Sapos ol pikinini i bihainim tok bilong mi, bai mi redi long bihainim sampela laik bilong ol. Olsem, sampela taim, mi no strong tumas long ol i mas kam bek long haus long taim mi makim. Tasol sapos ol i brukim dispela lo planti taim liklik, orait mi mas stretim ol.”—Il-hyun, Korea.
“Taim wokman i harim tok na mekim gut wok bilong em, orait bos bai larim em long mekim sampela wok moa. Olsem tasol pikinini man bilong mi i luksave olsem taim em harim tok na mekim gut wok bilong em inap stret long mak mipela i putim, orait mipela inap larim em long mekim sampela samting moa. Sapos wokman i no inapim gut wok bilong em, bos bilong em bai rausim sampela wok long em, na olsem tasol pikinini i save olsem sapos em i mekim nabaut long pasin bilong em long i stap fri, orait bai mipela i putim tambu gen long em.”—Ramón, Meksiko.
[Rait long pes 22]
“Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.”—Sindaun 22:6
[Blok/Ol Piksa long pes 23]
TOK BILONG SAMPELA FAMILI
‘Mekim Bikpela Long Ol Pikinini Em Gutpela Samting Tru’
Joseph: Tupela pikinini meri bilong mi i tineja. Mi luksave olsem em i bikpela samting long putim yau long tok bilong ol na pilim tingting bilong ol. Taim mi tokaut long popaia bilong mi na soim rispek taim mi toktok wantaim ol, dispela i opim rot long mipela i toktok gut wantaim. Long rot bilong helpim mipela i kisim long Baibel, mi inap mekim bikpela long ol pikinini na mi pilim olsem dispela em wanpela gutpela samting tru.
Lisa: Taim fesbon pikinini meri bilong mipela i kamap tineja, mi luksave olsem mi mas tingim em moa yet. Mi bin givim bikpela hap taim long putim yau long tok bilong em, na toktok wantaim em, na mekim gut bel bilong em. Na ol pikinini meri bilong mipela i save olsem mipela i redi long harim tingting bilong ol na rispektim tingting bilong ol. Mi wok strong long bihainim savetingting i stap long Jems 1:19 olsem, ‘putim yau kwik long harim tok, na no ken hariap long mekim toktok.’
Victoria: Mama em i bes pren bilong mi. Em i gat naispela pasin na em i save tingim mi tru—na em i save mekim olsem long ol narapela tu. Mi luksave tru olsem mama i save tingim tru ol narapela. I no gat wanpela inap kisim ples bilong em.
Olivia: Papa em i man bilong tingim ol narapela na em i save givim ol samting. Oltaim em i redi long givim ol samting long ol narapela maski mipela famili yet i no gat planti samting. Em i man bilong tingim gut ol samting, tasol em i save amamas tu wantaim ol narapela. Em i gutpela papa na mi amamas olsem em i papa bilong mi!
“Mipela i No Gat Taim Bilong Stap Nating!”
Sonny: Sapos ol pikinini meri i gat hevi, mipela olgeta i sindaun na skelim wantaim. Mipela i save kamapim tru tingting bilong mipela, na wokim ol disisen i stret wantaim ol stiatok bilong Baibel. Mitupela Ynez i save stretim rot na bai ol pikinini i gat ol gutpela poroman i pas gut wantaim Jehova. Ol pren bilong ol em ol pren bilong mipela tu.
Ynez: Mipela i save bisi na mekim planti samting wantaim olsem famili. Mipela i Witnes Bilong Jehova, olsem na mipela i bisi long autim tok, mekim Baibel stadi bilong mipela yet na bilong famili, na mekim wok volantia, olsem helpim ol lain taim i gat bikpela bagarap, na helpim wok bilong sanapim ol Haus Kingdom. Na tu, mipela i mekim ol samting bilong kisim amamas. Mipela i no gat taim bilong stap nating!
Kellsie: Papa em man bilong putim gut yau, na paslain long em i wokim bikpela disisen em i save kisim tingting bilong mipela famili. Taim mi gat hevi o taim mi laik toktok, mama i tingim mi.
Samantha: Mama i save tingim na laikim mi tru. Em i save putim yau long tok bilong mi. Pasin pren bilong mitupela i bikpela samting tru.
[Piksa]
Camera famili: Joseph, Lisa, Victoria, Olivia na Isabella
Zapata famili: Kellsie, Ynez, Sonny, na Samantha
[Piksa long pes 22]
Ol papamama inap larim pikinini long i stap fri long mekim sampela samting, tasol ol i save putim sampela tambu tu