Mi Wanem Kain Man?

Michael i lukim Brad i kam, na em i tingting planti long wanem samting bai kamap. Brad i tok, “Mikey, traim dispela!” Brad i opim han na Michael i lukim samting em i tingim pinis, em mariwana. Michael i no laik kisim, tasol em i no laik bai ol wanlain bilong em i les long em. Michael i tok isi, “em orait narapela taim.”

Jessica i lukim Brad i kam, na em i save long wanem samting bai kamap. Brad i tok, “Jess, traim dispela!” Brad i opim han na Jessica i lukim samting em i tingim pinis, em mariwana. Jessica i tokaut strong olsem, “mi no laik.” Na em i tok moa, “Mi tingim i stap bilong mi long bihain na mi laik stap laip longpela taim. Na tu, . . . mi ting yu gat save na yu no inap smok!”

LONG tupela stori, wanem samting i mekim na Jessica inap sakim dispela traim? Em sakim, long wanem, em i save long samting Michael i no save long en. Em wanem samting? Em i save long em i laik stap wanem kain meri. Na dispela i helpim em long sakim traim, na em inap bosim ol samting long laip bilong em yet na em no larim ol narapela i bosim em. Olsem wanem yu inap kisim strongpela tingting olsem? Namba wan samting yu ken mekim em long bekim ol dispela askim.

1 OL SAMTING MI GUTPELA LONG EN

As na em i bikpela samting: Taim yu kliagut long ol samting yu gat save long mekim na ol gutpela pasin bilong yu, dispela bai strongim pasin bilong yu long bilip long yu yet.

Tingim: Yumi olgeta i gat kain kain save long mekim sampela samting. Olsem, sampela ol i gutpela long droim piksa o pilaim musik, o pilai spot. Raquel i gat save long stretim ol ka.a Em i tok: “Taim mi gat 15 krismas, mi save olsem mi laik kamap wanpela mekenik.”

Eksampel long Baibel: Aposel Pol i tok: “Maski sapos mi no save tumas long pasin bilong autim ol tok, save bilong mi i no sot liklik.” (2 Korin 11:⁠6) Pol i kliagut tru long ol tok bilong Baibel, olsem na em sanap strong taim ol narapela i putim hevi long em. Em i no larim pasin bilong ol i daunim em.​—⁠2 Korin 10:10; 11:⁠5.

Skelim yu yet. Raitim wanpela samting yu gat save long mekim.

․․․․․

Nau raitim wanpela gutpela pasin bilong yu. (Olsem, yu save tingim ol narapela?, givim ol samting long ol narapela?, ol narapela i ken bilip long yu?, yu save bihainim gut taim?)

․․․․․

“Mi save tingim ol narapela. Sapos wanpela i laik toktok, na maski mi bisi, mi save lusim wok na putim yau long tok bilong em.”​—⁠Brianne.

Sapos yu hatwok long luksave long wanpela gutpela pasin bilong yu, orait tingim wanpela gutpela pasin yu mekim nau taim yu bikpela pinis em yu no bin mekim taim yu liklik, na raitim.​—⁠Bilong lukim sampela eksampel, skelim blok “Tok Bilong Ol Wanlain.”

․․․․․

2 OL SAMTING MI NO GUTPELA LONG EN

As na em i bikpela samting: Laik bilong yu long i stap wanem kain man o meri inap senis wantu sapos yu larim pasin kranki bilong yu i bosim yu.

Tingim: Olgeta man i gat sin. (Rom 3:23) Yumi olgeta i gat sampela pasin em yumi laik senisim. Wanpela gel, nem bilong en, Seija, em i tok: “Wai na mi save larim ol liklik hevi i bagarapim bel bilong mi. Liklik hevi tasol i save mekim mi belhat hariap!”

Eksampel long Baibel: Pol i save long ol samting em i no gutpela long en. Em i tok: “Long bel bilong mi, mi laikim tumas lo bilong God. Tasol mi lukim olsem narapela lo i stap insait long bodi bilong mi. Na dispela lo i save pait wantaim lo i stap long tingting bilong mi. Na dispela lo bilong sin i wok long kalabusim mi.”​—⁠Rom 7:​22, 23.

Skelim yu yet. Wanem pasin kranki bilong yu em yu mas lain long bosim?

․․․․․

“Mi luksave olsem taim mi lukim wanpela muvi we man i kirap prenim meri, mi save bel hevi liklik na mi tu laikim wanpela boipren. Olsem na nau mi save olsem mi no ken tingting tumas long lukim dispela kain muvi.”​—⁠Bridget.

3 OL MAK MI LAIK WINIM

As na em i bikpela samting: Taim yu gat ol mak yu laik winim, laip bilong yu bai i gat as bilong en. Na tu, ating yu bai abrusim ol manmeri na ol samting em ol inap pasim yu long winim ol mak yu putim.

Tingim: Yu ting bai yu kalap long teksi na tokim draiva long raunim raunim wanpela hap inap long petrol i pinis? Dispela em longlong pasin na bai yu tromoi bikpela mani stret! Olsem tasol sapos yu no putim ol mak yu laik winim, i olsem yu raunim raunim nating wanpela hap na yu no inapim ol samting yu mas mekim. Tasol sapos yu putim ol mak, i olsem yu save long hap yu laik go long en na rot bilong go kamap long dispela hap.

Eksampel long Baibel: Pol i tok: “Mi mekim olsem man i ran strong na i no lukluk nabaut.” (1 Korin 9:26) Pol i no mekim nating ol samting na larim tasol ol samting i kamap, nogat, em i putim ol mak em i laik winim na mekim ol samting i stret long ol dispela mak.​—⁠Filipai 3:​12-14.

Skelim yu yet. Raitim 3-pela mak em yu laik winim kirap long nau i go neks yia.

1 ․․․․․

2 ․․․․․

3 ․․․․․

Nau makim wanpela bilong ol dispela mak yu raitim antap we i bikpela samting tru long yu, na raitim ol samting yu ken mekim nau bilong winim.

․․․․․

“Sapos mi no bisi long wok, i olsem mi mekim nating ol samting i no gat as bilong en. I gutpela moa long putim mak bilong winim na mekim ol samting bilong inapim ol dispela mak.”​—⁠José.

4 OL SAMTING MI BILIP STRONG LONG EN

As na em i bikpela samting: Sapos yu no gat ol samting yu bilip strong long en, bai yu gat tupela tingting long olgeta samting. Olsem sampela snek i save senisim senisim kala bilong ol, yu bai senisim senisim pasin bilong yu na bai yu wankain olsem ol wanlain bilong yu​—⁠dispela i kamapim klia olsem yu no save yu laik stap wanem kain man o meri.

Tingim: Baibel i kirapim ol Kristen long “save tru long laik bilong God, em dispela laik em i gutpela, na em i orait, na i gutpela olgeta.” (Rom 12:⁠2) Taim ol samting yu bilip long en i as bilong ol pasin yu save bihainim, orait yu mekim pasin i stret wantaim laik bilong yu long stap wanem kain man o meri, maski ol arapela i mekim wanem.

Eksampel long Baibel: Taim profet Daniel i tineja, em i tingting strong long bihainim ol lo bilong God, maski em i stap longwe long famili na ol wanbilip bilong em. (Daniel 1:⁠8) Long dispela rot em i mekim ol pasin i stret wantaim ol samting em i bilip long en.

Skelim yu yet. Yu bilip strong long wanem ol samting? Olsem:

● Yu bilip long God? Wai na yu bilip olsem? Wanem samting i kirapim yu long bilip olsem God i stap?

● Yu bilip olsem ol lo bilong God i gutpela long helpim yu? Wai na yu bilip olsem? Wanem samting i helpim yu long save olsem ol lo bilong God long sait bilong maritpasin bai mekim yu i stap amamas, winim pasin bilong bihainim ol wanlain em ol i mekim nabaut long laip bilong ol?

No ken bekim hariap ol dispela askim. Lusim haptaim bilong skelim gut as bilong ol bilip bilong yu. Taim yu mekim olsem, bai yu inap sambai long bilip bilong yu.​—⁠Sindaun 14:15; 1 Pita 3:⁠15.

“Long skul, ol yangpela i save tok pilai long samting narapela i tingting planti long en, olsem na mi laik kamapim klia olsem mi strong long bilip bilong mi. So mi wok long kisim save long as bilong ol bilip bilong mi na klia tru long en. Mi no laik tokim ol manmeri olsem, ‘Mi no ken mekim dispela pasin, long wanem, lotu bilong mi i tambuim mi long mekim,’ mi laik tokim ol olsem ‘Mi ting dispela samting i no stret long mekim.’ Dispela em ol bilip bilong mi.”​—⁠Danielle.

Yu laik stap wanem kain? Yu laik stap olsem lip i pundaun na win i sakim i go i kam o yu laik stap olsem diwai i stap strong maski i gat bikpela win na ren? Wokim disisen long yu laik i stap wanem kain man o meri, na long dispela rot bai yu stap olsem dispela diwai. Na dispela bai helpim yu long bekim dispela askim, Mi wanem kain man?

Bilong lukim sampela stori moa long hap “Ol Yangpela i Laik Save,” em long tok Inglis, lukim Web-sait www.watchtower.org/ype

[Futnot]

[Blok/Ol Piksa long pes 27]

TOK BILONG OL WANLAIN

“Taim mi wok long i go bikpela, mi lain long skelim gut ol samting taim mi laik wokim ol disisen, maski ol i bikpela o liklik, na mi no insait long ol samting em God i no orait long en.”

“Taim mi liklik, mi ting olsem sapos wanpela i no wankain olsem mi, mi ting em i narapela kain. Nau mi amamas olsem olgeta manmeri i no wankain, na mi laik save long tingting bilong ol narapela.”

[Ol Piksa]

Jeremiah

Jennifer

[Blok long pes 28]

ASKIM PAPAMAMA

Wanem ol samting em mi gat save long mekim em yupela inap lukim? Wanem sampela pasin bilong mi em yupela ting mi mas stretim? Wanem samting i kirapim yupela long bilip strong long ol lo bilong God?

[Sat long pes 26]

(Bilong save ol dispela rait i stap we long pes, lukim buk o magasin)

MI GUTPELA LONG EN

MI NO GUTPELA LONG EN

OL MAK MI PUTIM

SAMTING MI BILIPIM

[Piksa long pes 28]

Taim yu kliagut long yu wanem kain man o meri, yu kain olsem diwai em rop bilong en i go daun tru na inap sakim strongpela win