Toktok Wantaim Wanpela Man Holi Spirit Em i Wanem Samting?

OL WITNES BILONG JEHOVA i amamas long toktok wantaim ol manmeri long Baibel. Olsem wanem? Yu gat wanpela askim long Baibel em yu laik kisim bekim long en? Yu laik save long sampela bilip o pasin bilong lotu bilong ol Witnes Bilong Jehova? Sapos olsem, orait kamapim tingting bilong yu long wanpela Witnes. Em bai amamas long toktok wantaim yu long dispela samting.

Stori nau mipela i kamapim em wanpela toktok namel long wanpela Witnes Bilong Jehova na wanpela man. Wanpela Witnes nem bilong em Scott i toktok wantaim wanpela man bilong haus, nem bilong em Brad.

Yu Tingim Wanem Samting Taim Yu Toktok Long “Holi Spirit”?

Brad: Mi harim olsem ol Witnes Bilong Jehova ol i no Kristen, na yupela i no save bilip long holi spirit.

Scott: Pastaim mi laik kamapim klia long yu olsem mipela i Kristen. Mi bilip long Jisas Krais na dispela i mekim na mi kam long haus bilong yu long dispela moning. Em Jisas yet i bin givim wok long ol disaipel bilong em long autim tok. Tasol inap mi askim yu, yu tingim wanem samting taim yu toktok long “holi spirit”?

Brad: Mi tingim holi spirit olsem namba 3 man insait long God Triwan, em dispela helpim Jisas i bin tok promis long salim i kam long yumi. Dispela helpim em i bikpela samting long mi. Mi laik holi spirit i mas i stap long laip bilong mi.

Scott: Planti man i gat kain tingting olsem long holi spirit. I no longtaim i go pinis, mi bin skelim ol tok bilong Baibel long dispela samting. Sapos yu gat sampela minit, mi bai amamas long soim yu long save mi bin kisim.

Brad: Yes, mi gat sampela minit.

Scott: Nem bilong mi Scott. Na nem bilong yu?

Brad: Nem bilong mi, Brad. Mi amamas long bungim yu.

Scott: Mi tu i amamas long bungim yu, Brad. Mi no laik pulim longpela taim bilong yu, olsem na i gutpela yumi toktok long wanpela samting tasol. Yu bin tok olsem holi spirit em i helpim Jisas i bin promis long salim i kam long yumi. Mi wanbel long dispela tingting bilong yu. Tasol olsem wanem? Yu ting holi spirit em i wanpela man na i wankain olsem God?

Brad: Yes, ol i bin skulim mi olsem.

Olsem Wanem? Holi Spirit Em i Wanpela Man?

Scott: Orait yumi ken lukim wanpela tok bilong Baibel em bai helpim yumi long save holi spirit em i wanpela man o nogat? Ating yu save long ol dispela ves bilong Baibel. Long Aposel 2:​1-4, Baibel i tok: “Bikpela De Bilong Pentikos i kam pinis, na ol manmeri i bilip long Jisas ol i bung wantaim long wanpela haus. Na wantu wanpela nois i kam long heven, em i olsem krai bilong strongpela win, na i pulapim tru dispela haus ol i sindaun i stap long en. Na ol i lukim samting olsem paia i kamap, na i luk olsem planti tang bilong man. Na ol dispela tang i go nabaut na i stap long olgeta bilong ol. Na Holi Spirit i pulap long olgeta dispela manmeri, na ol i stat long mekim tok long ol kain kain tok ples. Holi Spirit i mekim na ol inap mekim ol dispela toktok.”

Brad: Mi save long dispela stori.

Scott: Olsem na Brad, yu ting wanpela man inap i go insait long narapela man?

Brad: Nogat.

Scott: I gutpela yumi ken skelim sampela tok moa long ves 17 bilong dispela sapta. Long namba wan hap bilong ves, God i tok: “Klostu long las de bai mi kapsaitim Spirit bilong mi long olgeta manmeri.” Orait Brad, mi laik askim yu, yu ting God inap kapsaitim wanpela man i wankain olsem em yet?

Brad: Nogat.

Scott: Jon Bilong Baptais i mekim narapela tok long holi spirit. Dispela tok i stap long Matyu 3:11. Plis, inap yu ritim dispela ves?

Brad: “Mi save baptaisim yupela long wara olsem mak bilong yupela i tanim bel pinis. Tasol man i kam bihain long mi, strong bilong en i winim strong bilong mi. Mi no gutpela man inap long karim su bilong em. Em bai i baptaisim yupela long Holi Spirit na long paia.”

Scott: Tenkyu. Yu lukim, Jon Bilong Baptais i tok wanem long holi spirit?

Brad: Em i toktok long pasin bilong baptaisim man long holi spirit.

Scott: Em stret. Na em i toktok tu long pasin bilong baptaisim man long paia. Yumi save, paia i no wanpela man. Yu ting dispela ves i laik tok olsem holi spirit em i wanpela man?

Brad: Nogat.

Scott: Olsem na ol ves bilong Baibel yumi bin skelim i kamapim klia olsem holi spirit i no wanpela man.

Brad: Yu tok stret.

Olsem Wanem Em i Wanpela “Helpim”?

Scott: Pastaim yu bin kolim dispela tok “Helpim.” Long Jon 14:​26, Jisas i toktok long holi spirit olsem em i wanpela “Helpim.” Orait, yumi ken ritim dispela ves: “Helpim tru bilong strongim yupela em i Holi Spirit. Na long nem bilong mi, Papa bai i salim em i kam. Em bai i skulim yupela long olgeta samting. Na bai em i kirapim tingting bilong yupela na bai yupela i tingim gen olgeta tok mi bin givim long yupela.” Sampela man i ting dispela ves i sapotim tingting olsem holi spirit i wanpela man, na em bai helpim na skulim ol man.

Brad: Em nau, long olgeta taim mi ting olsem.

Scott: Tasol yu ting dispela tok Jisas i mekim i makim wanpela man tru o em i wanpela tok piksa tasol? Orait, nau yumi ken lukim wanpela tok Baibel i mekim long gutpela tingting na save. Sindaun 7:4 i tok: “Gutpela tingting na save i mas i stap wantaim yu oltaim, olsem susa tru bilong yu, o olsem gutpela pren bilong yu.” Olsem wanem? Yu ting dispela tok hia i makim olsem gutpela tingting na save i wanpela man?

Brad: Nogat. Em i tok piksa tasol.

Scott: Mi wanbel long dispela tok. Long dispela ves Baibel i kamapim klia olsem yumi mas laikim tru gutpela tingting na save olsem wanpela susa o gutpela pren bilong yumi. Planti taim Baibel i save mekim tok piksa long wanpela samting olsem dispela i olsem wanpela man. Yumi tu i save mekim ol kain tok piksa olsem planti taim. Olsem: Long wanpela gutpela moning, bai yumi harim man i tok, “Opim windo na san i ken kam insait.”

Brad: Yes, mi tu i save mekim kain tok olsem.

Scott: Olsem wanem? Bai yu toktok long san olsem em i wanpela man tru husat bai kam insait long haus?

Brad: Nogat. Em tok piksa tasol.

Scott: Olsem na taim Jisas i toktok long holi spirit olsem helpim, o tisa, yu ting em i bin mekim wanpela kain tok piksa olsem?

Brad: Yes, ating em i mekim tok piksa tasol. Dispela i stret wantaim ol ves yu bin ritim olsem God bai kapsaitim spirit, na ol man i baptais long holi spirit. Tasol sapos holi spirit i no wanpela man, orait em i wanem samting?

Holi Spirit Em i Wanem Samting?

Scott: Long Aposel 1:​8, Jisas i tokim yumi long holi spirit em i wanem samting. Plis, inap yu ritim dispela ves?

Brad: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.”

Scott: Lukim, long hia Jisas i bungim dispela tok holi spirit wantaim strong. Na long ol ves yumi bin ritim bipo, yu ting husat i givim dispela strong?

Brad: Em God, Papa.

Scott: Em i stret. Holi spirit em dispela strong God i bin yusim taim em i wokim heven na graun. Namba tu ves long Baibel i toktok long dispela. Stat 1:2 i tok: “Tudak i karamapim bikpela wara na spirit bilong God i go i kam antap long en.” Dispela spirit em i strong bilong God, na long rot bilong dispela strong God i kamapim ol samting em i tingting pinis long mekim na em i kamapim klia laik bilong em. Orait, nau mi laik soim yu wanpela skripsa moa long tingim. Em Luk 11:13. Plis, inap yu ritim dispela ves?

Brad: “Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.”

Scott: Sapos Papa long heven i save givim holi spirit long ol man i askim em long en, yu ting holi spirit i wankain olsem Papa?

Brad: Nogat. Nau mi kisim tok bilong yu.

Scott: Mi no laik pasim yu longpela taim tumas, Brad. Yu bin tok yu gat sampela minit tasol. Tasol mi laik mekim wanpela askim bilong pinisim toktok bilong yumi. Long ol ves yumi bin skelim, yu gat wanem tingting long holi spirit?

Brad: Em strong bilong God.

Scott: Em i stret. Olsem Jon 14:26 i bin kamapim, taim Jisas i toktok long holi spirit olsem wanpela helpim, o tisa, em i bin mekim tok piksa tasol.

Brad: Mi no bin save long dispela.

Scott: I gat wanpela gutpela samting yumi ken kisim save long en long tok bilong Jisas.

Brad: Em wanem samting?

Scott: Yumi inap askim God long givim holi spirit long yumi bilong helpim yumi long taim yumi gat hevi. Yumi inap askim em tu long holi spirit bilong helpim yumi long lain long tok i tru bilong em.

Brad: Em gutpela. Mi mas wokim gut tingting long dispela samting.

Scott: Paslain long mi go, mi laik yu mas tingim yet wanpela samting. Yumi save, holi spirit em i strong bilong God, olsem na ating yumi wanbel long tok olsem God inap yusim holi spirit bilong em long mekim olgeta samting em i gat laik long mekim.

Brad: Yes, em i tru.

Scott: Sapos olsem, bilong wanem em i no yusim bikpela strong bilong em bilong pinisim olgeta hevi na pasin nogut yumi lukim long nau? Sampela taim yu save tingting long dispela samting?a

Brad: Yes, mi bin tingim dispela samting.

Scott: Olsem wanem sapos mi kam bek long neks wik long wankain taim na yumi toktok long dispela samting?

Brad: Yes, mi gat laik tru long yu kam bek. Lukim yu.

[Futnot]