Nau Mi Luksave Long Pasin Laikim Tru na Bel Isi
Stori bilong Egidio Nahakbria
Taim mi wok long i go bikpela mi pilim olsem i no gat man i laikim mi. Tasol nau, ol narapela i laikim mi na mi stap bel isi. Dispela i kamap olsem wanem? Bai mi stori.
MAMA i karim mi long 1976 long wanpela haus kunai long wanpela ples maunten bilong Is Timor, bipo em hap bilong Indonesia. Papamama ol i stap rabis. Ol i kamapim 10-pela pikinini, na mi namba 8 long famili. Ol i no inap lukautim mipela olgeta long kaikai, olsem na ol i lukautim twin brata bilong mi na ol i givim mi long kasen brata bilong mi.
Long Disemba 1975, pastaim long mama i karim mi, ami bilong Indonesia i kam insait long Is Timor, na dispela i kirapim wanpela lain long hait na mekim pait long gavman, dispela pait i stap winim 20 yia. Ol samting mi tingim yet taim mi stap yangpela, em pait, kilim man, na ol man i karim pen na hevi. Mi tingim taim ol soldia i kam insait long ples bilong mipela na fosim olgeta man long ranawe, nogut ol i dai. Mi na kasen brata bilong mi i wokabaut i go long wanpela ples maunten we planti tausen manmeri bilong Is Timor i ranawe i go hait long en.
Tasol ol soldia i painimaut ples hait bilong mipela, na i no longtaim na ol birua i kam bomim ples hait bilong mipela. Mi tingim yet ol samting nogut dispela pait i kamapim na mi pret, planti man i dai na bikpela bagarap i bin kamap. Planti man i lus nating o ol birua i kilim ol i dai, na mi pret nogut ol i kilim mi tu.
Taim mi gat 10-pela krismas, kasen bilong mi i sik na em i dai, olsem na papamama bilong mi i salim mi i go stap wantaim bubu meri bilong mi. Em i wido, na em i save bel hevi long ol samting nogut i painim em, olsem na em i ting wok bilong lukautim mi i putim hevi long em. Em i mekim mi olsem wanpela wokboi. Wanpela taim mi sik na mi no inap mekim wok, na em i paitim mi nogut tru na lusim mi i stap. Gutpela tru, narapela kasen brata na famili bilong em i kisim mi na lukautim mi.
Taim mi gat 12-pela krismas, mi stat long skul. I no longtaim na meri bilong kasen bilong mi i kisim bikpela sik, dispela i mekim na kasen bilong mi i bel hevi tru. Mi no laik putim hevi long ol, olsem na mi ranawe i go stap wantaim wanpela lain soldia bilong Indonesia em ol i kem long bus. Mi helpim ol long wasim klos, kukim kaikai, na klinim kem. Ol i mekim gutpela pasin long mi, na mi pilim olsem ol i laikim mi. Tasol sampela mun bihain, famili bilong mi i kisim save long dispela na ol i tokim ol soldia long salim mi i go bek long ples.
Insait Long Lain i Bikhet Long Gavman
Taim mi pinisim haiskul, mi go sindaun long Dili, em biktaun bilong Is Timor, na mi go long yunivesiti. Long skul mi bungim planti yangpela em ol i gat kain laip olsem mi. Mipela i ting olsem wanpela rot tasol bilong kisim indipendens na senisim sindaun bilong ol pipol em long rot bilong pait long gavman. Ol sumatin i kamapim planti mats na straik long gavman, na planti taim dispela i kirapim pait. Planti pren bilong mi ol i kisim bagarap, na sampela i dai.
Taim Is Timor i kisim indipendens long 2002, kantri i stap nogut tru, planti tausen manmeri i dai, na gavman i rausim planti handret tausen manmeri long ol ples bilong ol. Mi laik tru bai sindaun bilong ol man i senis na i kamap gutpela. Tasol planti man moa i no gat wok, stap rabis, na hevi bilong politik i wok long i go yet.
Senis i Kamap
Long dispela taim, mi stap wantaim sampela wanblut, wanpela bilong ol em yangpela kasen brata bilong mi nem bilong em Andre, em i save stadi long Baibel wantaim ol Witnes Bilong Jehova. Mi wanpela strongpela Katolik, olsem na mi no amamas olsem kasen bilong mi i bung wantaim narapela lotu. Tasol mi laik save long Baibel na sampela taim mi ritim Baibel bilong Andre i stap long rum bilong em. Samting mi ritim i kirapim laik bilong mi long kisim save moa.
Long 2004, Andre i givim mi wanpela invatesen pepa bilong i go long Memorial bilong tingim indai bilong Jisas, na mi pasim tok long go. Mi no ritim gut ol tok long dispela invatesen pepa, olsem na mi go kamap long ples bilong miting 2-pela aua paslain. Taim ol Witnes i kamap, ol asples na ol narapela tu, olgeta i sekanim mi na tok amamas long mi kam. Mi kirap nogut tru. Taim brata i mekim tok bilong Memorial, mi raitim long notbuk olgeta skripsa em i kolim, na bihain mi sekim long Katolik Baibel bilong mi bilong save sapos tok bilong em i tru. Na tru tumas, tok em i mekim em i tru!
Long wik bihain, mi go long Misa long haus lotu bilong mi. Mi na sampela narapela i kam leit, olsem na pater i kros na em i kisim hap plang na ronim mipela i go ausait long haus lotu. Taim mipela i sanap ausait, pater i pinisim lotu na tok, “Bel isi bilong Jisas i ken i go wantaim yupela.” Wanpela meri i no pret na em i singaut olsem, “Hau na yu tok long bel isi taim yu i ronim ol dispela man i go ausait long haus lotu?” Pater i no bisi long em. Long dispela taim mi lusim lotu na mi no go bek gen.
Bihain long dispela, mi kirap stadi long Baibel na go wantaim Andre long ol miting bilong ol Witnes. Ol wanblut bilong mipela ol i no amamas na ol i kirap birua long mitupela. Bubu meri bilong Andre i tok: “Bai mi digim graun na planim yutupela sapos yupela i wok yet long stadi wantaim dispela nupela lotu.” Tasol tok bilong em i no pretim mipela. Mipela i wok strong long mekim ol samting bilong pas gut wantaim God.
Senisim Pasin
Taim mi wok long stadi long Baibel, mi kirap pilim olsem mi no bin save gut long pasin laikim. Mi gat strongpela het na mi no laik trastim ol man. Tasol ol Witnes i soim olsem ol i laikim mi. Taim mi bin sik na ol famili bilong mi i no kam lukim mi, ol Witnes i kam lukim mi na helpim mi. Ol i no toktok tasol long pasin laikim, nogat, ol i save ‘kamapim pasin laikim tru long ol samting ol i mekim’ long ol narapela.—1 Jon 3:18.
Maski mi no bilas gut na mi gat hatpela pasin, ol Witnes i mekim gutpela pasin long mi, “pilim hevi” bilong mi, na ol i “laikim” mi. (1 Pita 3:8) Em fes taim long laip bilong mi we mi pilim olsem ol narapela i laikim mi. Pasin bilong mi i senis, na mi kirap kisim pasin bilong laikim God na ol man. Na long Disemba 2004, mi dediket long Jehova na mi kisim baptais. I no longtaim bihain Andre i kisim baptais.
Ol Blesing Long Taim Bilong Hevi
Bihain long mi kisim baptais, bel bilong mi i kirap tru long helpim ol narapela man husat i no save long pasin laikim tru o pasin i fea. Olsem na mi kirap mekim wok autim tok fultaim, o wok painia, olsem ol Witnes Bilong Jehova i kolim. Taim mi autim tok bilong Baibel bilong strongim ol man, dispela i givim nupela strong long mi, winim pasin bilong insait long mats na straik, na pait long gavman. Long nau, mi save mekim wok we i helpim tru ol man!
Long 2006, hevi bilong politik long Is Timor, na tu, hevi bilong pait namel long ol narapela narapela lain insait long kantri, i kirap gen. Inap longpela taim i gat hevi i stap namel long ol narapela narapela lain. Ol ami i pasim taun Dili, na ol man bilong hap is bilong kantri ol i ranawe. Mi wantaim sampela Witnes, mipela i ranawe i go long Baucau, em wanpela bikpela taun i stap olsem 120 kilomita long hap is bilong Dili. Mipela i gat hevi, tasol mipela i kisim blesing, long wanem, mipela i kirapim wanpela nupela kongrigesen—em fes kongrigesen i stap ausait long Dili.
Tripela yia bihain, long 2009, mi kisim invatesen bilong i go long wanpela spesel skul bilong ol Kristen i save autim tok bilong God fultaim, em i kamap long Jakarta, Indonesia. Ol Witnes long Jakarta i kisim mi i go stap wantaim ol long haus bilong ol na ol i laikim mi tru. Mi pilim tru pasin laikim ol i mekim long mi. Mi save olsem mi insait long wanpela lain “wanbilip,” olsem bikpela famili i stap long olgeta hap bilong graun, em narapela i tingim tru narapela.—1 Pita 2:17.
Nau Mi Stap Bel Isi!
Bihain long skul, mi go bek long Baucau, em ples nau mi stap yet long en. Mi amamas long helpim ol man long kisim save long God, wankain olsem ol narapela i bin mekim long mi. Olsem, long wanpela ples i stap ausait long taun Baucau, mi na ol narapela i skulim 20 manmeri long tok bilong Baibel, insait long dispela lain i gat planti lapun em ol i no save long rit o rait. Dispela 20 manmeri ol i save kam long olgeta miting, na tripela i kisim baptais pinis na ol i insait long kongrigesen Kristen.
Sampela yia i go pinis, mi bungim Felizarda, em yangpela meri i gat gutpela pasin na em i amamas long kisim save long tok bilong Baibel na em i kamap strong na kisim baptais. Mitupela i marit long 2011. Mi amamas tu long kasen bilong mi, Andre, i wok long ofis bilong ol Witnes Bilong Jehova long Is Timor. Planti wanblut bilong mi, na bubu meri bilong Andre tu, husat i tok long planim mitupela long graun, nau ol i rispektim bilip bilong mi.
Long bipo, mi man bilong kros, ol man i no laikim mi, na mi no laikim ol narapela. Tasol mi tenkyu tru long Jehova, olsem nau mi luksave pinis long pasin laikim tru na bel isi!
[Piksa long pes 27]
Egidio, taim em i bin insait long lain i bikhet long gavman
[Piksa long pes 29]
Egidio na Felizarda wantaim ol wanlotu bilong Kongrigesen Baucau, Is Timor