“Jehova, Plis Larim Mi i Mekim Wok Bilong Yu”
Stori bilong Danielle Hall
Taim mi liklik meri yet, mi save laikim tumas long i go lukim bubu meri bilong mi em haus bilong em i stap klostu long mipela. Long olgeta de long apinun em i save slip liklik taim. Sapos mi go lukim em taim em i laik slip, mitupela wantaim i sindaun long bet na em i ritim ol Baibel stori long mi. Planti taim em i tokim mi olsem: “No ken lusim tingting olsem Jehova i save laikim yu tru. Na sapos yu laikim em, oltaim em bai i lukautim yu.” Dispela tok bilong em i stap strong long tingting na bel bilong mi.
BUBU meri i dai long 1977, taim mi gat 4-pela krismas. Em i wanpela Witnes Bilong Jehova, na olgeta wanblut bilong Papa i stap long as ples bilong mipela long Moe, ol tu i Witnes. Papamama bilong mi ol i no Witnes, tasol Papa i amamas long harim tok bilong ol. Bihain famili bilong mipela i go sindaun long Tintenbar, em wanpela liklik taun klostu long nambis bilong New South Wales. Long dispela hap, sampela taim mi na bikpela brata bilong mi Jamie i go wantaim Papa long miting bilong ol.
Taim mi gat 8-pela krismas, papamama bilong mi i no stap wantaim moa. Papa i go bek long Moe, na Jamie na mi i stap wantaim Mama. Mama i no gat laik long save long tok bilong Baibel na em i no laik bai mipela i go long ol miting bilong ol Witnes. Dispela i bagarapim tru bel bilong mi. Tok bilong bubu meri i stap strong long bel bilong mi. Mi save tru olsem mi laikim Jehova! Na mi gat laik long mekim wok bilong em. Olsem na mi beten long Jehova na tokim em olsem mi tu mi wanpela Witnes bilong em. Jamie i gat wankain tingting.
Ol Traim i Kamap Long Skul
Bihain liklik, wanpela tisa long skul i askim olgeta wan wan pikinini long klas long tokaut long ol i bilong wanem lotu bambai em i ken raitim dispela long buk. Taim Jamie i mas tokaut long dispela, em i tokaut klia olsem, “Witnes Bilong Jehova.” Tisa i tokim em long kolim gen, na Jamie i mekim olsem. Tisa i tok: “Mi no ting yu wanpela Witnes, bihain bai mi toktok gen wantaim yu.” Taim mi mas tokaut long lotu bilong mi, mi tu i tokaut klia olsem, “Witnes Bilong Jehova.” Tisa i bel kaskas, na em i singautim hetmasta bilong skul i kam.
Hetmasta i tok strong olsem: “Mi holim hia ol pepa bilong yupela long insait long skul, na papamama bilong yupela i no bin raitim olsem yupela i Witnes Bilong Jehova.” Long gutpela pasin rispek, mipela i tok: “Tasol em lotu mipela i save bihainim.” Bihain long dispela, hetmasta na tisa i no toktok moa long dispela samting.
Long skul mi traim long autim liklik save mi gat long Baibel long ol wanklas bilong mi. Mi kisim buk Baibel Stori Buk Bilong Mi i go long skul, na sampela taim mi inap ritim ol stori long wanpela gel i save bilip long God.a Tasol mi traim long bihainim ol lo Kristen, olsem na planti ol i no laikim mi, na sampela taim mi pilim olsem mi stap wanpis tru.
Planti taim mi beten strong long Jehova, olsem na em i kamap nambawan gutpela pren bilong mi. Long olgeta de bihain long skul, mi sindaun long bet na tokim Jehova long ol samting i kamap long dispela de, mi stori long olgeta liklik liklik samting. Planti taim mi krai. Aiwara i pundaun na mi beten olsem, “Jehova, plis larim mi i mekim wok bilong yu wantaim lain bilong yu.” Taim mi beten pinis, mi pilim orait.
Wanpela Pas i Strongim Mi
Taim mi gat 10-pela krismas, Jamie i go bek long Moe bilong stap wantaim Papa. Nau mi stap wanpis moa yet long ol samting bilong lotu. Bihain, taim mi go lukim wanpela neiba, mi painim sampela nius ol Witnes Bilong Jehova i wokim. Mi amamas tru na mi putim long tingting atres bilong brens ofis na go hariap long haus bilong raitim dispela atres long pepa. Mi raitim pas long brens, na mi stori gut long i stap bilong mi na askim ol long helpim mi long sait bilong lotu. Ol i raitim naispela, longpela pas inap 2-pela pes, na tok bilong en i kam long mi wanpela tasol, na dispela pas i mekim na aiwara i pulap long ai bilong mi. Dispela pas i soim olsem mi gutpela samting tru long ai bilong Jehova!
Dispela pas i kirapim mi long bihainim bilip bilong liklik meri Israel husat i kamap wokmeri bilong Naman, em wanpela kepten bilong ami bilong Siria long taim bilong ol man i bin raitim Baibel. Maski dispela liklik meri i wok kalabus na i stap longwe long ples bilong em, em i pas gut wantaim God bilong em, Jehova. Na em i no pret long autim bilip bilong em, olsem na em i kamapim klia em i wanpela witnes tru bilong Jehova.—2 King 5:1-4.
Dispela pas i kam long brens ofis i tok moa: “Yu yangpela meri, na yu ken lotuim Jehova long rot bilong bihainim tok bilong papamama bilong yu na mekim gutpela wok long skul. Na tu, yu mas pas gut wantaim Jehova long rot bilong beten na stadi.” Pinis bilong pas i tok: “Danielle, tingim olsem maski yumi stap long wanem wanem hap, oltaim Jehova i stap klostu long yumi. Mipela i save olsem yu bilip long dispela.” (Rom 8:35-39) Dispela pas i olpela nau na pepa i bagarap liklik, na em i stap yet insait long Baibel bilong mi. Insait long ol yia i go pinis, mi bin ritim dispela pas planti taim, na long olgeta wan wan taim mi ritim pas, mi save krai.
Bihain liklik long dispela, mi kisim narapela pas. Pas i tok papa bilong mi i bin stretim rot bilong mi ken kisim nius Wastaua na Kirap! long rot bilong posofis. Mi amamas tru! Nau mi inap kisim ol tok bilong God long olgeta mun. Taim nupela nius i kam, mi ritim olgeta stori bilong en. Mi holim yet ol namba wan kopi bilong ol dispela gutpela nius mi bin kisim. Long dispela taim, wanpela elda Kristen long wanpela kongrigesen i bin kam lukim mi. Em i mekim ol sotpela visit, tasol ol i strongim mi tru.
Ol Senis i Helpim Mipela Long Kamap Strong
I stap bilong mi long ol samting bilong lotu i kamap gutpela liklik, tasol mi gat bikpela laik yet long i stap fri long lotuim Jehova. Olsem na taim mi gat 13 krismas, mi askim Mama sapos mi ken i go stap wantaim Papa. Mi laikim tru Mama, na em i laikim mi, tasol mi tingting strong long mekim wok bilong God. Taim Mama i wanbel, mi go bek long Moe na kirap stadi long Baibel wantaim kongrigesen long dispela hap. Papa i orait long mitupela Jamie i go long olgeta miting. Ol Witnes long dispela hap i wok strong tru long helpim mitupela. Mitupela Jamie i kamap strong hariap long ol samting bilong lotu na bihain mipela i kisim baptais, narapela i kisim baptais sampela mun bihain long narapela. Yes, God i inapim beten mi bin mekim taim mi liklik yet. Mi mekim wok bilong Jehova wantaim lain bilong em!
Long dispela taim, mi kirap pas gut wantaim ankol na anti bilong mi, Philip na Lorraine Taylor, ol tu i stap long Moe Kongrigesen. Ol i mekim gut long mi olsem pikinini meri bilong ol. Taim ol i go sindaun long ailan Boungainville, long Papua Niugini, bilong mekim wok long hap i sot long ol man bilong autim tok bilong Kingdom, ol i singautim mi long i go wantaim ol na mi amamas long mekim olsem. Mi gat 15 krismas tasol, tasol Papa na Mama i orait long mi ken i go.
Long Bougainville mi wok yet long skul long rot bilong pas. Taim mi no skul, mi save go autim tok. Mi amamas tru long wok wantaim ol misineri na ol painia! Ol man asples i gat pasin daun, winim ol narapela man mi bin bungim, na planti i gat laik long stadi long Baibel.
Long dispela yia yet, ol lain politik i kirap long pait, na i no gutpela long mi stap moa long dispela hap, nogut mi kisim bagarap. Bel bilong mi i bagarap stret taim mi lusim dispela liklik ailan na ol gutpela manmeri bilong en. Taim liklik balus mi sindaun long en i kirap, mi lukim Ankol Philip i sanap long ples balus na tromoi han long mi. Mi krai nogut tru, na mi beten askim Jehova long larim mi long mekim wok misineri long narapela kantri.
God i Harim Ol Narapela Beten Bilong Mi
Long Australia, taim mi pinisim haiskul, mi kirap wok olsem aprentis long wanpela ofis bilong ol loya. Papa i marit gen na em i gat wok long lukautim planti pikinini bilong nupela meri bilong em. Mitupela Jamie i stap wantaim Mama. Inap sampela hap taim, mi go i kam namel long Mama na Papa. Mi pilim olsem laip i hatwok tru. Mi mas lusim sampela samting na tingting strong long winim ol mak bilong spirit. Olsem na long 1994, mi kirap autim tok bilong God fultaim long Moe olsem wanpela painia.
Mi amamas gen. Ol pren bilong mi em ol yangpela insait long kongrigesen husat i save tingim ol samting bilong lotu na ol i sapotim mi gut. Long 1996, mi maritim wanpela bilong ol—Will—em man bilong toktok isi, mekim gutpela pasin, na i gat pasin daun. Em i wanpela blesing tru i kam long Jehova.
Mitupela i marit na mipela i stap amamas tru. Long wanpela de, Will i kam bek long haus bihain long em i bin wok wantaim wasman raun husat i visitim ol kongrigesen long hap bilong mipela. Will i tokim mi long sindaun, na em i askim mi olsem, “Yu redi long i go stap long narapela hap bilong helpim wanpela kongrigesen?” Long bel bilong mi, mi tok yes hariap. Tasol mi tok pani long em na askim: “Go we? Vanuatu? Fiji?” Taim Will i tok “long Morwell,” mi tok olsem, “Tasol em klostu tumas!” Mitupela i lap na wantu mipela i wanbel na tok mipela bai i amamas long go long kongrigesen i stap klostu na mekim wok painia.
Mipela i stap long Morwell inap tripela yia, na mipela i stap amamas na wok bilong mipela i karim gutpela kaikai. Orait nau, narapela samting mipela i kirap nogut long en i kamap. Brens ofis bilong ol Witnes Bilong Jehova long Australia i singautim mipela long mekim wok painia salim. Long wanem hap? Long Is Timor, em wanpela liklik kantri long hap is bilong ol ailan bilong Indonesia. Aiwara i pulap long ai bilong mi. Mi tok tenkyu long Jehova long em i bin harim olgeta beten bilong mi. Em i bin orait long mi kamap wanpela wokmeri bilong em, na nau mi wantaim man bilong mi, mipela inap i go mekim wok autim tok long narapela kantri.
Mekim Wok Long Narapela Kantri
Mipela i kam kamap long biktaun Dili, long Julai 2003. Dili Kongrigesen—i no gat narapela kongrigesen long dispela kantri—i gat 13 painia salim i kam long Australia na sampela asples Witnes. Ol brata na sista bilong Is Timor i stap rabis tru; ol samting bilong ol i bin lus long pait i bin stap insait long kantri inap 24 yia, em dispela pait i pinis long 1999, na tu, sampela long famili bilong ol i dai long dispela pait. Nupela bilip bilong ol i mekim na famili bilong planti i bin birua long ol. Tasol maski ol i stap rabis na ol man i birua long ol, ol i stap gut long ol samting bilong lotu na ol i stap amamas.—KTH 2:8, 9.
Mipela i lukim olsem klostu olgeta manmeri bilong Is Timor ol i save pret long God na bilip long Baibel. I no longtaim na mipela i gat planti Baibel stadi tru na mipela i no inap lukautim olgeta! Bihain, sampela sumatin bilong mipela i kisim baptais na wok wantaim mipela olsem ol brata na sista bilong mipela. Taim mipela i lukim ol i kamap strong long ol samting bilong lotu, dispela i givim bikpela amamas long mipela.
Long 2006, bikpela hevi i kamap gen long Dili. Hevi namel long ol narapela narapela lain i go bikpela na pait i kirap. Ol i stilim ol samting long haus bilong ol man o kukim ol haus, na ol asples Witnes i kam hait long haus bilong ol painia salim. Haus na banis bilong mipela i kamap olsem refiuji kem, na long wanpela taim klostu 100 manmeri i stap wantaim mipela! Bikpela ples bilong putim ka i kamap olsem haus kuk, ples bilong kaikai, na Haus Kingdom.
Maski ol gan na hanbom i pairap klostu long mipela, long haus painia i gat bel isi i stap. Mipela olgeta i pilim olsem Jehova i lukautim mipela. Long olgeta moning, mipela i skelim teks bilong de. Mipela i mekim ol miting olsem mipela i save mekim long olgeta taim. Mipela i stadi tu long Baibel wantaim ol man i laik harim tok.
Ol wik i kam na i go, na ol samting i kamapim klia olsem ol brata husat i bilong hap is bilong kantri, i no gutpela long ol i stap long Dili, nogut hevi i painim ol. Olsem na ol Witnes i go pas long wok, ol i laik kamapim nupela grup long Baucau, em namba tu bikpela taun bilong kantri na em i stap longwe long Dili inap 3-pela aua long hap is. Long dispela as mitupela Will i kisim nupela asainmen.
Mipela i kam kamap long Baucau long Julai 2006, inap 3-pela yia bihain long mipela i bin kam long Is Timor. Dispela nupela grup i gat 4-pela painia salim na 6-pela Witnes bilong Is Timor. Ol asples brata na sista i bin lusim olgeta kago samting bilong ol long Dili, tasol ol i stap amamas yet. Mipela i amamas tru long pasin bilong ol long stap gut long God na daunim laik bilong ol yet!
Mitupela Will i stap yet long Baucau. Mipela i laikim tru asainmen bilong mipela na mipela i ting em i wanpela blesing i kam long Jehova. Taim mi tingting i go bek, mi inap luksave olsem tok bilong bubu meri i stret. Jehova i bin lukautim mi gut insait long ol dispela yia. Mi save tok tenkyu long em oltaim long em i larim mi i mekim wok bilong em wantaim lain bilong em. Mi wet tu long lukim gen bubu meri long taim bilong kirap bek. Long dispela taim bai mi inap tok tenkyu long em i bin helpim mi long painim rot bilong stap amamas tru na kisim ol gutpela blesing.
[Futnot]
a Ol Witnes Bilong Jehova i wokim.
[Piksa long pes 26]
Mi wantaim bubu meri
[Piksa long pes 28, 29]
Mi wantaim man bilong mi, Will