“Bikpela Helpim Long Wok Bilong Ol Dokta”

DISPELA STORI I KAM LONG MEKSIKO

Long olgeta hap bilong graun, ol Witnes Bilong Jehova i gat nem olsem lain i no save kisim blut bilong stretim sik bilong ol. Ol i mekim olsem, long wanem, ol i bihainim tok bilong Baibel, tasol sampela manmeri i save sutim tok long ol. Tasol long niuspepa Reforma bilong Mexico City, em niuspepa planti man i save ritim, Dokta Ángel Herrera, em wanpela bikpela dokta long National Institute of Oncology, em i tok: “Ol Witnes i no longlong. Na tu, ol i no wanpela lain i strong tumas long bihainim sampela tingting kranki. . . . [Ol] i bin givim bikpela helpim long wok bilong ol dokta. Ol i kirapim ol dokta long tingim gut olsem ol i mas helpim man na bai em i no ken lusim planti blut.”

Inap olsem 15 yia i go pinis, Dokta Herrera i bin makim na bungim sampela dokta, em ol dokta bilong mekim i dai tingting bilong sikman na ol dokta bilong katim man. Em i bungim ol dispela dokta bilong ol i ken katim man na ol i no ken givim blut long em. Wanpela bilong ol dispela dokta, em Dokta Isidro Martínez, em i dokta bilong mekim i dai tingting bilong sikman, em i tok: “Taim ol dokta i mekim stret ol samting ol i mas mekim bilong kilim i dai tingting bilong sikman, dispela bai helpim ol long mekim gut wok na sikman i no inap lusim planti blut. Olsem na mipela inap helpim ol Witnes Bilong Jehova long bihainim bilip bilong ol.”

Long Oktoba 2006, niuspepa Reforma i tokaut olsem i gat winim 30 narapela narapela rot em ol dokta inap bihainim bilong helpim man, na ol i no mas givim blut. Sampela rot em i olsem: Ol i ken yusim samting i hat bilong pasim ol rop bilong blut, o yusim wanpela kain kapok i gat marasin bilong pasim blut long ron, o yusim sampela kain wara bilong helpim blut.a

Dokta Moisés Calderón, em bikpela dokta bilong stretim ol sik bilong klok long Bikpela Haus Sik long La Raza, Mexico City, em i save katim man na em i no givim blut long em. Long niuspepa Reforma, em i tok: “Pasin bilong givim blut inap nogutim man. Blut inap karim ol kain kain binatang nogut bilong kamapim sik. Na tu, sampela taim bodi bilong man i no orait long blut em i kisim, na dispela inap bagarapim wok bilong ol kidni na waitlewa.” Dokta Calderón i skelim ol dispela hevi na em i tok: “Taim mipela i mekim operesen long ol man, mipela i save bihainim pasin olsem mipela i save mekim long ol Witnes Bilong Jehova. Mipela i traim long mekim gut wok na bai planti blut i no ken lus, na kisim bek blut i lus, na yusim ol marasin we i helpim man na bai em i no ken lusim planti blut.”

Dispela niuspepa i kamapim tok bilong Aposel 15:​28, 29, em wanpela skripsa i stap olsem asbilip bilong ol Witnes Bilong Jehova. Long dispela skripsa, ol aposel i tokaut long dispela lo: “Holi Spirit i stap wantaim mipela na mipela i pasim tok olsem, mipela i no laik putim planti hevi long yupela. Olsem na yupela i mas bihainim ol dispela pasin tasol. Yupela i no ken kaikai abus ol i bin kilim bilong mekim ofa long ol giaman god. Na yupela i no ken kaikai abus i gat blut i stap yet long en, olsem na yupela i no ken kaikai abus ol man i bin pasim nek bilong en na kilim i dai. Na yupela i mas abrusim olkain pasin pamuk.”

Hospital Infomesen Des long brens ofis bilong ol Witnes Bilong Jehova long Meksiko i tok olsem i gat 75 Hospital Lieson Komiti long dispela kantri, na i gat 950 volantia em ol i save go lukim ol dokta na stori long ol narapela narapela rot ol dokta inap bihainim na ol i no ken givim blut long man. Inap olsem 2,000 dokta long Meksiko ol i amamas long stretim sik bilong ol Witnes Bilong Jehova na ol i no mekim wok long blut. Ol Witnes i amamas tru long gutpela pasin bilong ol dispela dokta long wok bung wantaim ol. Na dispela pasin bilong ol dokta i helpim ol yet na ol i redi gut long helpim ol narapela sikman em ol i no Witnes.

[Futnot]

[Piksa long pes 30]

Dokta Ángel Herrera

[Piksa long pes 30]

Dokta Isidro Martínez

[Piksa long pes 30]

Dokta Moisés Calderón