Lemon i Gat Planti Wok

PIKSAIM wanpela samting em man inap yusim olsem marasin, samting bilong klinim haus, kilim ol binatang jem, na mekim gut skin. Yu inap kaikai, dringim, na kisim oil long en. Em luk nais, i stap long olgeta hap bilong graun, na em i no gat bikpela pe. Ating yu gat wanpela i stap nau long haus kuk bilong yu. Em wanem samting? Em lemon!

Ol i ting lemon i kam long Saut-is Esia. Na isi isi ol man i karim i go long ol hap klostu long Mediterenian. Ol diwai lemon i save kamap gut long ol ples we i no kol o hat tumas, olsem na ol i gro gut long ol ples olsem Ajentina, Itali, Meksiko, Spen, na sampela hap bilong Afrika na Esia. Sampela kain diwai lemon, sapos ol i sanap long gutpela hap, ol inap karim 200 i go 1,500 lemon long wanpela yia. Ol lemon em ol man i planim ol i save karim olgeta taim long yia, olsem na long yia olgeta i gat lemon.

Lemon Long Itali

Ol Rom i bin planim ol diwai lemon o nogat, dispela em samting ol man i tok pait long en. I gat ol rait i kamapim olsem ol Rom i save long sitron, em tu i wanpela kain muli, na i luk olsem wanpela bikpela lemon. Long buk Natural History, saveman bilong Rom, em Plini Namba 1, i bin stori long diwai sitron na prut bilong en. Tasol sampela saveman i tok ol Rom i save tu long lemon. Bilong wanem ol i tok olsem? Long wanem, planti piksa ol man i bin wokim i gat ol lemon long en, na i no ol sitron. Wanpela kain piksa olsem ol i bin painim long wanpela haus insait long graun long Pompei. I stret ol i kolim nem bilong haus olsem The Orchard House, olsem haus we i gat ol diwai prut, long wanem, ol i bilasim long ol piksa bilong kain kain plaua, na wanpela diwai lemon. Ating long dispela taim, ol man i save em i no diwai bilong ples bilong ol na ol i yusim tasol olsem marasin. Ol diwai lemon i bin gro gut long dispela hap na i kamap planti o nogat, em yumi no save.

Ailan Sisili i gat gutpela san na i no save kol tumas, na i save groim planti muli, na lemon tu, winim ol narapela hap. Tasol i gat ol narapela hap, moa yet long ol ples nambis, we ol i save kamapim ol gutpela lemon tru.

Naispela taun Sorrento i stap saut long Naples, na long hap saut bilong en em nambis bilong Amalfi—em wanpela bikpela hap nambis inap olsem 25 kilomita. Long dispela hap long nambis, i gat ol naispela taun olsem Amalfi, Positano, na Vietri sul Mare, em sampela taun tasol mipela i kolim. Ol lemon ol i kamapim long Sorrento na ol ples nambis bilong Amalfi, i gat setifiket i soim olsem tru tru ol dispela lemon i kamap long dispela hap. Ol asples i save lukautim gut ol diwai lemon bilong ol, long wanem, ol i bin planim gut arere long ol maunten, we ol lemon inap kisim gut san na kamapim lemon i gat naispela smel na jus.

Yu no nidim bikpela spes bilong planim lemon. Ol sotpela diwai lemon inap gro insait long pot long veranda we san i sut i kam long en, na em i gutpela bilas. Diwai lemon i laikim hap i gat san, na i no gat win, we em i ken kisim gut hat bilong san, ating klostu long banis samting. Tasol sapos ples i kol tumas, karamapim ol o putim insait long haus.

Em i No Bilong Kaikai Tasol

Yu save yusim lemon hamas taim? Sampela i save katim hap lemon na putim long kap ti bilong ol, sampela i save putim liklik jus bilong en long kek. Ating yu bengim bilong kisim jus bilong wokim kol dring. Long olgeta hap bilong graun, ol saveman bilong kuk ol i gat lemon long olgeta taim, bilong yusim long kukim kaikai. Tasol olsem wanem? Yu bin yusim jus bilong lemon long kilim ol binatang jem o rausim ol mak mak long klos?

Sampela man i save rapim hap lemon long ol samting bilong klinim na long hap plang bilong katim abus, bilong kilim ol binatang. Na sampela i save mixim jus bilong lemon wantaim backing soda bilong rausim ol mak mak na klinim sink, na ol i no mekim wok long snowait. Sampela i tok taim yu putim hap lemon long frits o masin bilong wasim plet samting, dispela bai rausim smel nogut na mekim ol samting i smel nais.

Lemon i save kamapim sitrik asit, we i save mekim ol kaikai i stap gut na i no bagarap, na mekim kaikai o wara i pait liklik long maus. Skin bilong lemon i gat marasin pektin long en, ol faktori bilong wokim kaikai i save yusim pektin bilong wokim sup i kamap strong liklik, na bilong helpim kaikai i miks gut, na bilong wokim jeli. Na tu, oil ol i kisim long skin bilong lemon ol i save yusim long kaikai, wokim ol marasin, na oil samting bilong skin. I gat planti samting tru ol i mekim long lemon. I gat naispela kala, teis, na planti wok bilong en.