Nius i Kam Long Olgeta Hap

Ol man husat i save lusim olsem 6-pela aua long olgeta de bilong lukim TV, laip bilong ol bai sotpela moa (olsem 4.8 yia) long ol man i no save lukim TV. Taim ol i sindaun tasol na lukim TV, i olsem ol i tekewe 22 minit long olgeta wan wan aua long laip bilong ol.—BRITISH JOURNAL OF SPORTS MEDICINE, BRITEN.

Long kirap bilong 2011, i gat 5.4 bilion long olgeta hap bilong graun i yusim mobail fon.”—UN CHRONICLE, AMERIKA.

Insait long 10-pela yia i go pinis, “ol bikpela bagarap i bin kilim moa long 780,000 manmeri,” na 60 pesen bilong ol i dai long guria.”—THE LANCET, BRITEN.

Inap olsem 4 pesen tasol bilong ol bikpela paia bilong bikbus long olgeta hap em laitning o san samting i kamapim. Na ol narapela bikpela paia i save kamap, em ol man i as bilong en—ating ol i popaia o ating ol i min long kukim bikbus samting.—PRESSEPORTAL, JEMANI.

Ol Man i Go Lukim Dokta Long Esia

Planti sikman moa bilong ol narapela hap i save go long ol narapela kantri bilong lukim gutpela dokta. Planti taim, pe bilong ol dispela dokta i daun tru long pe ol i mas baim long ples bilong ol yet. Nius Business World i tok, ol i ting i kam inap long 2015, samting olsem 1 milion manmeri bai go long Filipins long olgeta yia bilong lukim dokta, na ol i ting long 2020, wankain namba bai go long Saut Korea. Planti man i save go tu long India, Malesia, Singapo, na Tailan. I no ol man long hap bilong Wes tasol i save go long ol dispela kantri bilong stretim ol kain sik olsem bodi i bagarap, na sik bilong klok, nogat. Dispela nius i tok, planti maniman bilong Saina tu i save go lukim ol dokta (plastic surgeons) na tokim ol long senisim pes bilong ol na bai ol i luk olsem piksa ol i holim bilong “ol man o meri i gat biknem.”

Skulim Ol Bikhet Draiva

Ol polis long India i bihainim ol nupela rot bilong skulim ol bikhet draiva, ol i givim wok long ol olsem ol trafik polis. Ol i laik helpim ol dispela draiva long save long hevi ol i kamapim taim ol i no bihainim lo bilong draiv long rot. Ol polis long Gurgaon, not-wes India, i no sasim tasol ol bikhet draiva, nogat, ol i tok ol draiva i mas joinim ol trafik polis long wok inap 30 minit o moa. Sampela draiva i tok skul ol i kisim i senisim tingting bilong ol. Bharti Arora, em komisina bilong polis long Gurgaon, i tok: “Long olgeta de, mipela i save sasim 1000 draiva long ol i brukim lo bilong trafik. Sapos ol dispela draiva i kamap trafik polis, orait long olgeta de mipela bai i gat 1000 trafik polis moa.”