Em Samting Bilong Bagarapim Man

“EM WANPELA bikpela hevi tru.” Em presiden Bush bilong Amerika i tok olsem. Na wanpela nius bilong Saut Afrika (The Star) i tok, em “samting nogut tru i kamap.” Narapela nius (U.S.News & World Report) i tok, “Em i kisim olgeta hap.” Na wanpela man i tingting planti na em i tok, dispela samting i nogutim tru ol man.

Olsem wanem? Ol i toktok long dispela sik nogut ol i kolim AIDS? Nogat. Ol i toktok long narapela samting nogut i kamap long planti kantri na i bagarapim planti manmeri tru, winim sik AIDS. Wanem dispela samting? Em samting i save kamap taim ol i bungim tupela samting wantaim, olsem dring na draivim ka. Dispela em samting bilong bagarapim man.

Long olgeta hap bilong graun long olgeta yia inap olsem 300,000 manmeri i save kisim bagarap long ka na ol i dai. Planti milion ol i kisim sampela bagarap long skin, na insait long dispela lain planti tausen ol i kisim bikpela bagarap na ol i no inap wokabaut moa o kain samting olsem. Ol dispela bagarap i pinisim bikpela mani tru long olgeta yia, inap planti milion kina. Planti bagarap i painim ol man long ka, as bilong en em ol man i dring na draivim ka.

Kirap long 1980 na i kam inap 1990, inap olsem 100,000 manmeri i bin i dai long sik AIDS long Amerika. Tasol insait long dispela 10-pela yia, inap olsem 250,000 manmeri ol i kisim bagarap long ka na ol i dai​—em ol draiva i bin dring na kamapim ol dispela bagarap. Dispela sik AIDS i painim planti manmeri ol i save pamuk nabaut o ol i kisim drak long rot bilong sut. Tasol man i dring na draivim ka em inap bagarapim em yet na narapela man i stap long rot, na dispela narapela man i no gat asua.

Taim man i dring na draivim ka na em i bagarapim wanpela man, dispela kain dai em i nogut tru, na dispela samting i brukim ol famili, olsem pikinini i bagarap na nau papamama i no gat pikinini, o papamama i bagarap na ol pikinini i no gat papamama, o wanpela marit i bagarap na nau narapela i lus long poroman.

Ol i Painim Rot Bilong Stretim Dispela Hevi

Ol kantri i wok long painim rot bilong stretim dispela samting nogut i save bagarapim planti man. Long Amerika planti lain o oganaisesen i kamap bilong kirapim ol man long tingim dispela samting, na ol dispela lain i gat nem bilong ol, olsem Rausim Ol Draiva i Bin Dring, na Ol Mama i Birua long Ol Draiva i Spak. Na long televisen samting ol i putim sampela program olsem Pasin Bilong Dring na Draivim Ka. Ol kain oganaisesen olsem i kamap long sampela ol narapela kantri tu. Ol dispela lain i save helpim famili bilong ol man i bin bagarap long ka, o ol man em ol i bin kisim bikpela bagarap, na bai ol inap kisim ol samting i stret ol i ken kisim. Ol dispela lain i laik kirapim gavman long senisim sampela lo bilong en.

Nau ol polis samting i wok strong long painim ol draiva i bin dring, olsem na long sampela hap bilong rot ol i save pasim ol ka na skelim gut ol draiva, na sapos ol i bin dring, ol bai kot. Na gavman i kamapim sampela lo i tok, sapos haus dring i givim dring long ol man taim ol i mas draivim ka, ol inap kot. Na ol i pasim ol toksave long ol banis samting bambai ol draiva i ken lukim na ol i no ken lusim tingting long ol lo bilong gavman long draivim ka.

Bagarap i Wok long Painim Planti Moa long Rot

Tasol maski gavman samting i mekim ol dispela kain kain wok, planti draiva i wok yet long dring, olsem na bagarap i painim planti manmeri moa yet long rot. Long hap bilong Brasil, wanpela i save bagarap long rot long olgeta 21 minit 21 minit​—em olsem 25,000 long olgeta wan wan yia, na ol man i bin dring na draivim ka ol i as bilong ol dispela bagarap. Long Inglan na Jemani, long olgeta 10-pela 10-pela bagarap i painim ol man long rot na ol i dai, 2-pela i bin kisim bagarap long ol man i bin dring na draivim ka. Sampela ripot i kamap long wanpela nius (El Universal) bilong Meksiko i tok, long olgeta yia long Meksiko i gat 50,000 manmeri i save bagarap long rot na ol i dai, na inap olsem 40,000 samting ol i bin kisim dispela bagarap long ol man i bin dring na draivim ka na ol i draiv kranki.

Ol ripot i tok, long Saut Afrika olsem 25 pesen samting bilong ol man i kisim bagarap long rot, em ol man i bin dring na draivim ka i as bilong en. Long Amerika, insait long ol wan wan yia, pasin bilong dring na draivim ka i mekim na 650,000 ol i save kisim sampela bagarap long rot, na insait long dispela lain, inap olsem 40,000 i kisim bikpela bagarap, na 23,000 samting ol i dai.

Bilong daunim dispela pasin bilong dring na draivim ka, sampela lain i wokim wanpela kain pasin long hap bilong Wosington, na nau ol i kamapim dispela pasin long ol haus kot taim ol i mekim kot long ol man i bin dring na draivim ka. Dispela pasin ol i kamapim i olsem: Draiva i bin bagarapim wanpela man, em i mas sindaun wantaim famili bilong dispela man i bin kisim bagarap, na ol i toktok long dispela bikpela rong tru em i bin mekim, olsem em i bin bagarapim wanpela long famili bilong ol, o ol yet i bin kisim bikpela bagarap, na bikpela hevi tru i bin painim ol long dispela. Em i mas harim ol dispela tok na bai em i ken pilim tru dispela bikpela rong em i bin mekim. Taim ol i wokim wanpela kot olsem, ol i bin singautim wanpela man bilong Kirap! i kam harim ol tok.

[Piksa Kredit Lain long pes 4]

Dominic D. Massita, Sr./Accident Legal Photo Service of New York