Draiva i Bung Wantaim Ol Man Em i Rongim Ol

LONG hap bilong Provins Nu Yok wanpela lain (Genesee County DWI) i bung: Em 6-pela manmeri, ol i gat wankain hevi na ol i bung wantaim long dispela hap. Ol i holim piksa bilong sampela long famili bilong ol i bin kisim bagarap long ka, em ol draiva i bin dring ol i as bilong ol dispela bagarap i bin painim ol. Dispela lain i bung wantaim bilong givim tok long ol dispela draiva i gat kot long dispela, na bai ol i ken kisim sampela tingting na pilim tru dispela bikpela rong ol i bin mekim, em ol i bin dring na draivim ka.

Dispela nius Kirap! i kamapim sampela hap tok bilong ol, olsem:

Famili Bilong Ol Man i Kisim Bagarap

Wanpela papa: “Em pikinini man bilong mipela, nem bilong em Erik. Em i gutpela pikinini tru, na em i man bilong amamas. Nau bel bilong mi i bagarap stret, long wanem, dispela pikinini bilong mi i gat 17 krismas em i dai pinis. Ol gutpela samting bilong bihain em mipela i tingting long en, na dispela pikinini mipela i laikim tumas, i pinis wantu tasol​—em asua bilong wanpela draiva i bin dring longlong.

“Mi wantaim meri bilong mi i save go long ples matmat, na mipela i kaunim rait i stap long matmat bilong Erik, olsem: ‘Yu lusim mi na mi bel hevi nogut tru, na mi no laik i stap longwe long yu; sapos olsem, bai mi krai, long wanem mi no bin laik long tok gutbai long yu.’ Na mipela tu i no laik tok gutbai.”

Wanpela meri em man bilong em i bagarap: “Dispela em i famili bilong mi. Wanpela yangpela man i gat 22 krismas, em i lusim pati bilong marit. Em i bin dring, tasol em i tok em i no spak. Em i draivim trak bilong em na em i spit nogut tru long wanpela rot bipo em i no bin raun long en, na rot i tudak. I gat wanpela toksave long rot, tasol em i no tingim​—em i go tasol. Na em i no pasim ka taim em i kamap long toksave olsem STOP​—em i spit i go na bam long ka bilong mipela. Tingting bilong mi i dai, tasol bihain tingting bilong mi i wok long kam bek na mi pilim pen long bros bilong mi. Mi wok strong long traim opim ai bilong mi, na mi lukim man bilong mi i slip long stia. Mi harim liklik pikinini bilong mi i krai. Mi askim olsem: ‘Wanem samting i kamap?’

“I no gat wanpela i bekim. Man bilong mi Bil, em i gat 31 krismas, na namba wan pikinini man bilong mi em i gat 6-pela krismas na 2-pela pikinini man i gat 4-pela krismas, em mi bin karim tupela wantaim​—olgeta i dai pinis. Wanpela tasol i stap, em dispela liklik pikinini meri bilong mi i gat 9-pela mun, em i kisim bikpela bagarap long het bilong em na ol i kisim em i go long haus sik.

“Long Trinde long moningtaim ren i kam daun na mi slip long bet long haus sik, na ol i planim man bilong mi wantaim 3-pela pikinini man bilong mi. Mi wok long tingim 4-pela bokis i gat skin bilong 4-pela man i bagarap nogut tru​—em 4-pela man mi no inap lukim ol moa, na mi no inap harim toktok bilong ol moa o holim ol. Olsem wanem mi inap karim dispela bikpela hevi?

“Mi wantaim liklik pikinini meri bilong mi i mas kirap lusim haus bilong mipela, long wanem, mi wok long lukim ol samting bilong man wantaim ol pikinini i stap long haus na bel bilong mi i bagarap stret. Oltaim mi save tingim man bilong mi wantaim dispela 3-pela gutpela pikinini man ol i stap long matmat. Mi bin lukautim ol gut na tingim ol na mi laikim tumas ol, tasol ol i lus. Mi no inap kamapim dispela bikpela bel hevi bilong mi na bai ol man inap pilim tru​—em i bikpela hevi tumas. Tarangu ol i no bin i stap longtaim​—ol i stap sotpela taim tasol na ol i dai.

“Dispela man i bin bagarapim famili bilong mi na ol i dai, em i no wanpela raskol o spakman, na bipo em i no gat asua long dispela kain samting​—em i wanpela man nating i bin i go long wanpela pati. Nau dispela bikpela hevi tru i stap long mi, long wanem, wanpela man i ting i orait long em i ken dring na draivim ka. Mi no laik bai wankain hevi i painim yu o wanpela long famili bilong yu.”

Wanpela mama: “Pikinini meri bilong mi, nem bilong em Ronda Lin. Em i winim hai-skul na em i laik kisim mak bilong dispela long Jun 21. Em i lain long draivim ka, na Jun 10 em i laspela de bilong em long lain. Long dispela de tupela man i bin pati na ol i dring planti, na ol i ting ol inap draivim ka. Wantu tasol laip bilong Ronda, na laip bilong tisa i bin lainim em long draiv, na laip bilong tupela wanskul bilong em i pinis.

“Long apinun sampela i telefon long mi na i tok, wanpela bagarap i painim Ronda. Mi gat wanpela tingting tasol​—mi mas i go long em. Mi kamap long haus sik, tasol ol i tokim mi, mi no ken i go insait long lukim Ronda. Tasol mi laik save, tru Ronda i bin kisim bagarap? Ol i bin karamapim sit bet long em, tasol mi strong na ol i tekewe sit bet. Pes bilong em i solap nogut tru na i gat planti bagarap long en. Mi wok long lukim naispela ai bilong em na mi holim han bilong em, tasol mi no inap mekim wanpela samting bilong oraitim em gen. Mi holim gutpela gras bilong em, tasol em i no meknais liklik. Em i dai pinis.

“Em nau, mi mas mekim wanpela wok i gat bikpela hevi long en​—mi mas tokim papa bilong em wantaim ol brata bilong em olsem em i dai pinis. Nau sindaun bilong mipela i no gat amamas long en, long wanem, Ronda i no stap moa wantaim mipela. Mi laik tru bai mi ken holim em wanpela taim moa. I stap bilong mipela i no ken gutpela moa olsem bilong pastaim. Nau em i stap tasol long tingting bilong mipela.”

Man i Gat Rong

Wanpela yangpela man: “Stori bilong mi i narapela kain long ol stori nau yupela i bin harim. Mi laik stori pastaim long samting i bin kamap inap 23 mun bipo. Dispela samting i stap strong yet long tingting bilong mi​—i olsem em i kamap asde tasol. Gelpren bilong mi i insait long wanpela spot na long dispela nait ol i pilai, olsem na mi tingting long kisim sampela dring na lukim dispela pilai bilong em. Orait, insait long 2 na hap aua mi dring 5-pela o 6-pela bia. Mi ting bai mi wet wanpela aua pastaim na bihain mi ken draivim ka i go bek long haus.

“Mi draiv i go inap 30 minit na mi lukim wanpela ka bilong haus sik i stap long rot, na wanpela man i sanap long namel bilong rot na i mekim wok olsem trafik bilong stiaim ran bilong ol ka. Tasol pastaim mi no lukim dispela man​—mi kamap pinis long em na mi lukim em. Mi traim long tanim stia bilong abrusim em na putim brek, tasol ka i bamim em. Bikpela glas long haus kepten i bruk na wantu mi tingting: ‘Ating mi bamim wanpela dia o wanpela dok!’ Tasol mi save pinis, i no olsem. Wantu mi lusim ka na mi go long dispela man i slip long rot, na mi singaut, ‘Yu orait? Yu orait?’ Tasol em i no bekim. Mi sanap klostu long em na mi lukluk long pes bilong em. Mi bel hevi stret.

“Ol polis i kam na ol i givim sampela askim long mi. Bihain ol i tok, ‘Yu helpim gut mipela na yu no bikhet. Tasol mipela lukim wokabaut bilong yu i kranki liklik, na toktok bilong yu tu i no klia. Olsem wanem? Yu bin dring?’ Ol i kisim mi i go long polis-stesin na ol i putim wanpela samting long maus bilong mi bilong glasim mi, mi bin dring o nogat. Ol i glasim pinis na mak bilong en em 0.08 [long planti hap bilong Amerika, sapos man i dring inap long dispela mak, em i brukim lo bilong gavman]. Mi bin ting dispela kain samting i no inap painim mi. Tasol nau mi gat kot long mi bin dring na draivim ka na kilim i dai wanpela man.

“I gat wanpela mun moa na bai mi kisim namba long mekim wok tisa. Yu save long tingting bilong ol man, ol i ting olsem wanem long ol tisa. Ol i laik bai ol tisa i mas bihainim stretpela pasin tasol na i no ken mekim wanpela pasin i nogut liklik. Mi bin wok strong long winim dispela kain mak, tasol nau i olsem mi bai lus long dispela samting.

“Kot i makim wanpela yia bilong traim mi, na ol i tekewe laisens bilong mi long draivim ka inap 19 mun, na mi mas baim kot inap long 250 dola. Na tu, mi kalabus inap tupela de, olsem Sarere Sande, na mi mekim wok bilong kaunsil olsem stretim ol rot samting bilong taun, na mi mekim inap 600 aua (olsem 25 de), na inap 9-pela wik mi go long wanpela skul bilong ol man i save dring planti. Ol dispela samting i olsem strafe bilong mi. Na planti nait mi save lusim slip wantu na skin bilong mi i guria, na long tingting bilong mi i olsem mi lukim pes bilong dispela man. Na mi sem long i go bek long haus bilong mi na lukim famili na ol pren bilong mi, em ol i save pinis long samting mi bin mekim. Mi hatwok tru long i stap bilong mi, na mi tingting, sapos mi no i stap laip, mi no gat hatwok moa. Mi kirap gen na mekim wok tisa long skul, na mi tingim ol dispela pikinini​—hamas ol i save pinis long dispela samting mi bin mekim? Na bel bilong mi i gat tok long dispela bikpela asua bilong mi, na bel bilong mi i bagarap stret long dispela bikpela hevi mi bin kamapim long famili bilong dispela man.

“Long nait stret bilong dispela bagarap, mi mas mekim wanpela samting mi hatwok tru long mekim, winim olgeta samting mi mas mekim bipo​—Mi mas telefon long mama na tokim em, ‘Mama, wanpela bagarap i kamap taim mi draivim ka na mi kilim i dai wanpela man. Plis yu ken i kam kisim mi long ka​—mi no gat rot bilong i go bek long haus.’ Taim mama i kamap, em i holim mi na mi holim em na mitupela i krai. Dispela bikpela hevi i bin painim mi, mi no laik tru long kain hevi olsem i painim narapela man, maski em i wanpela bikpela birua bilong mi. Ol man i save dring na draivim ka, mi laik helpim ol dispela kain man long lusim dispela pasin. Taim yupela lusim dispela miting, yupela i mas tingim mipela. Yu no ken lusim tingting long mipela.”

Laspela Tok Bilong Dispela Bung

Meri bilong bosim dispela bung, em Patricia Johnston, em i mekim laspela stori bilong en, na em i stori long bikpela hevi i bin painim em yet taim papa bilong em, em man bilong dring, em i bin kisim bagarap long taim em i draivim ka. Dispela meri i tok, ‘Dispela bikpela hevi em dring i save kamapim, sapos mi inap givim long ol dispela man na ol i mas dring, bai ol i pilim tru dispela bikpela hevi em dring i save kamapim, na bai i no gat wok moa long mekim wanpela bung olsem nau yumi mekim!’

Na laspela tru, em siaman i askim ol, husat i gat sampela tingting o askim? I no gat wanpela i mekim askim. Tasol aiwara i stap long ai bilong planti na ol i tok, “Nau bai yu no inap harim moa olsem mi save dring na draivim ka. Nogat tru.”

Wanem gutpela samting dispela kain bung bai kamapim bihain, em yumi no save; ol dispela man i bin kot long dring na draivim ka, ol bai mekim gen o nogat, em yumi mas wet pastaim na bai yumi lukim. Tasol yumi tingting planti, long wanem, planti milion man ol i save dring na draivim ka na ol polis i no holim ol.

Long nau sampela ripot i kam long wanpela hap bilong Dipatmen Bilong Bosim Ol Lo na Kot long Amerika na i tok, insait long wanpela yia tasol, klostu olsem 2 milion man em polis i holim ol, long wanem ol i bin dring na draivim ka. Tasol long ol dispela wanpela wanpela man em polis i holim ol, i gat olsem 2,000 samting ol i raun long ka long ol hap em ol polis i no patrol long en, na ating sampela bilong ol dispela lain tu bai bagarapim sampela man long rot.

Wanem samting i bin kamapim dispela pasin nogut bilong dring na draivim ka, em i save bagarapim planti manmeri? Bilong wanem planti lain i wok strong long daunim dispela pasin bilong dring na draivim ka, tasol ol i no inap? Orait, kaunim ol stori i kam bihain long dispela, em ol i kamapim bekim bilong ol dispela askim.

[Piksa long pes 7]

Em wanpela soim long man i gat asua i bung wantaim ol manmeri em i bin rongim ol