Bipo Mi Bin Wok Olsem Raskol

JAS i paitim strong wanpela kain hama em i save holim na em i mekim bikpela pairap insait long rum kot. Bihain em i tok: “Nau yu mas kalabus inap 15-pela krismas.” Mi no inap lusim tingting long dispela tok na ol samting i kamap bihain. Nau kwiktaim wanpela ofisa bilong polis i kisim mi long haus kot i go bek long rum kalabus mi bin i stap long en inap 3-pela mun pinis.

Long bikmoning tru, ol i kisim mi long dispela rum kalabus i go long narapela liklik rum, na ol i pasim wanpela traipela let long mi. Long poret i gat tupela traipela ring i stap na ol i pasim han bilong mi long en. Nau dispela tupela ofisa i kisim mi i go long wanpela hap i gat wanpela lain kalabusman em ol polis i pasim han bilong ol pinis long wankain pasin olsem ol i bin mekim long mi. Ol dispela kalabus i sanap long tupela lain na ol i sanap klostu klostu. Nau ol i putim mi insait long dispela lain, na ol i kisim wanpela sen i stap namel long ol na pasim long namba 3 ring i stap long let bilong mipela olgeta wan wan.

Bihain dispela 6-pela ofisa ol i kisim mipela i go long wanpela kain bas. Mi sindaun klostu long wanpela man em i bin kilim man i dai, na baksait long mi i gat ol man i bin wok hait long baim ol drak i go long ol man, na ol man bilong bagarapim meri, na ol stilman. Mipela olgeta i go long wanpela ples tasol​—long kalabus!

Ating yu tingting, bilong wanem ol dispela samting i painim mi? Orait, nau bai mi stori long sindaun bilong mi long bipo na ol samting mi bin mekim na long dispela as mi kalabus.

Mama i No Karim Mi Olsem Wanpela Raskol

Bihain tasol long Namba 2 Pait papamama i marit na long 1947 mama i karim bikbrata bilong mi. Tupela yia bihain mi kamap, na 18-pela mun bihain liklik brata bilong mi i kamap. Mipela i liklik yet na papamama i lusim taun Rismon long Vejinia, Amerika, na ol i go sindaun long provins Oregon. Bihain mipela lusim dispela hap gen na go long hap not long Wosington long taun Beleviu. Long dispela taim i stap bilong mipela i gutpela tasol. Tru mipela famili i no pas gut wantaim, tasol planti taim mipela mekim ol samting wantaim olsem piknik samting na go lotu long lotu Luteren. Planti famili long Vejinia ol i save tingim tru God na Jisas na tok bilong Baibel. Long 1960 mama i karim liklik susa bilong mi. Man! Mama i amamas nogut tru, long wanem em i bin laikim wanpela pikinini meri inap longpela taim pinis.

Tasol 6-pela mun bihain bikpela senis tru i kamap long sindaun bilong mipela. Mipela lusim gen dispela hap na mipela i go long nupela hap i gat bikpela hap bus long en, ol i kolim Mepel Veli. Long dispela hap mipela i lusim lotu, na famili i no moa go piknik samting wantaim, na papa i kirap long dring planti. Inap long nau bel bilong mi i hevi yet long dispela samting. Inap longtaim tru mipela i bin stap bel hevi. Na mi ting dispela samting i kirapim mi long mekim pasin bikhet taim mi yangpela yet.

Mi Kamap Raskol

Dispela ples Mepel Veli, em i no gutpela ples tumas long kain yangpela olsem mi; namel long yia 1960 i go 1970 mi yangpela man na mi laik mekim kain kain samting bilong painim amamas. Long ples skul mi poroman wantaim ol manki nogut. Mipela mekim ol pati bihain long skul na planti taim mipela dring spak na pait i kamap na mipela i kisim ol drak. Sampela taim bihain long ol kain pati olsem, long 3 o 4 klok samting long moningtaim mi spak pinis na mi wokabaut kranki i go long haus. Sampela taim mi stap wantaim ol poroman na mi no save kam long haus inap sampela de bihain. Mi save, ol pasin mi mekim em i no gutpela, tasol papamama i no tingting planti long ol samting mi mekim.

Sampela taim mipela stilim ol samting bilong traim ol polis, ol bai holim mipela o nogat. Wanpela taim mi laik kisim amamas na mi stilim wanpela ka na mi draiv nating i go. Tasol ol polis i holim mi na putim mi long wanpela kain skul bilong ol bikhet manki.

Bihain mi go long hai-skul. Mi ting bai mi mekim wok long ol samting mi bin “lain” long en long skul bilong ol bikhet manki. Mi no pilim tok bilong Baibel olsem: “Sapos yu poroman wantaim ol man nogut, bai ol i bagarapim ol gutpela pasin bilong yu.”​—1 Korin 15:33.

Taim mi gat 16 krismas mi bungim wanpela yangpela man nem bilong em Jim Carley, na em i narapela kain long mipela. Famili bilong Jim i bin stap long Aidaho na nau ol i kam long taun bilong mi. Sampela tasol ol i save, nem bilong em Jim; tasol planti ol i save kolim em Spad. Em i wanpela Witnes Bilong Jehova.

Mitupela Jim i go long wankain skul. Taim mi skelim ol pasin bilong em, mi save em i narapela kain tru long ol poroman bilong mi. Em i pas gut wantaim ol narapela, tasol em i no insait long ol pasin nogut ol i save mekim. Mi tingim wanpela tok bilong em olsem: Dispela pasin bilong nau i mas pinis, na Kingdom bilong God long heven bai kamapim gutpela sindaun na gutaim long graun.

Mi laik harim sampela tok moa bilong em, olsem na tupela taim mi go long haus lotu bilong em, ol i kolim Haus Kingdom. Em long yia 1967. Mi laikim tru ol samting mi bin harim, tasol mi ting nupela taim bai kamap bihain bihain tru. Na tu, nau mi wok long kisim planti kain amamas. Mi wok long stilim ol samting olsem: Ol tul bilong wok, na ol hap hap bilong ka, na ol traipela redio-kaset samting, na televisen, na mi baim i go long ol man olsem wok mani bilong mi. Olsem na bilong wanem mi mas go long wanpela kain lotu em i save tambu tru long ol dispela kain wok bilong mi?

Taim mi gat 19 krismas, mi lusim skul na mi maritim meri wanskul bilong mi. Wanpela yia bihain mi kamap papa bilong liklik pikinini meri, em Ronda Jean. Nau mi gat bikpela wok moa na mi mas lukautim gut ol, tasol mi mekim long olkain pasin giaman na stil.

Nau Mi Painim Tok i Tru!

Mi wok yet long “bisnis” nogut bilong mi long baim drak i go long ol man, na stilim ol ka samting, na brukim ol haus, tasol i no longtaim na ol polis i holim mi na ol samting i painim mi olsem mi bin kolim long kirap bilong stori bilong mi​—mi stap kalabus. Long dispela taim mi gat 20 krismas, na mi gat meri na liklik pikinini em i gat 6-pela mun tasol! Nau mi mas kalabus inap 15 yia! Mi save mi mas mekim sampela samting bilong stretim sindaun bilong mi. Nau mi tingim gen ol tok bilong Baibel em Spad i bin mekim.

Taim mi stap long kalabus, mi kirap long kaunim Baibel na ol narapela buk mi bin kisim. Mi ting ‘ol dispela buk bai helpim mi long kisim tingting olsem man i bikpela pinis na i gat gutpela save.’ Tasol nogat. I no gat wanpela samting i helpim mi inap long taim narapela wankalabus i tokim mi, sampela Witnes Bilong Jehova long kongrigesen long dispela hap ol i save kam givim tok bilong Baibel long sampela man long kalabus, na sapos mi laik mi ken sindaun wantaim ol. Ol i save kam wanpela taim tasol long wik. Mi orait long dispela. Na namba wan taim mi bungim tupela Witnes hia, mi save ol samting mi wok long lainim long Baibel na long buk Tok i Tru, ol i trupela tok. Nau mi save, mi painim pinis tok i tru!

Autim Tok Long Kalabus

Taim ol Witnes i stadi wantaim mi, sampela taim inap 15 kalabusman i kam sindaun. Mi wok long stadi wantaim ol Witnes, na meri bilong mi i ting mi stap long kalabus na nau mi longlong olgeta, olsem na em i kirap stretim ol pepa samting bilong katim marit. Dispela samting i traim tru nupela bilip bilong mi.

Tasol mi wok strong long kisim planti save bilong Baibel bilong strongim bilip bilong mi. Mi kaunim Baibel olgeta na ol buk na ol olpela nius Wastaua na Kirap! Dispela i helpim mi long kamap strong long bilip. Na tu, mi kirap autim tok long ol narapela kalabusman em ol i laik harim tok. I no longtaim na planti ol i no laik toktok wantaim mi. Tasol tok i tru i lukautim mi.

Maski planti ol i no laik harim, tasol i gat ol narapela ol i laik harim tok mi autim, na mi bin stori gut wantaim ol. Wanpela em pris bilong lotu Katolik, em i tok, ol samting ol Witnes i lainim mi long en i no trupela tok, na ol man i ken senisim tok bilong Baibel long laik bilong ol. Bilong truim tok bilong em, em i tok em bai soim wanpela tok bilong Baibel long mi, i tok i no gat God. Mi tok orait. Nau em i opim Baibel long Buk Song na em i putim han long Baibel na bai wanpela pinga i pasim hap tok bilong dispela skripsa. Mi tok: “Plis yu rausim pinga bilong yu na mi ken kaunim dispela tok olgeta.” Pris i tok: “Yu kaunim tasol dispela hap bilong ves i stap daunbilo long pinga bilong mi.” Mi kaunim na mi kirap nogut, em i tok: “I no gat God i stap.” Pris i tok, “Lukim! Baibel i tok klia olsem i no gat God.” Mi tokim em gen, mi laik kaunim dispela ves olgeta. Nau em i rausim pinga long Baibel na mi lukim narapela hap tok em i bin haitim, i tok: “Ol longlong man i save tok long ol yet olsem, ‘I no gat God i stap.’ ”​—Buk Song 14:1.

Mi Fri na Mi Stap Strong Long Bilip

Mi stap kalabus inap tupela yia tasol na ol i larim mi i lusim kalabus, long wanem, ol i lukim olsem pasin bilong mi i senis. Em long pinis bilong yia 1971. Sampela man i ting mi kamap ‘man bilong lotu’ bilong giamanim ol bos bilong haus kalabus na bai ol i orait long mi ken lusim kalabus. Nau mi tingting, mi lusim kalabus pinis na mi no ken tru bung gen wantaim ol poroman nogut. Olsem na mi gat strongpela tingting long mi mas i stap longwe long ol poroman nogut. Na ol i givim baksait long mi pinis, long wanem ol i harim olsem mi kamap wanpela kain ‘pris’ na mi wok long autim tok long olgeta manmeri.

Mi wok strong long stadi long Baibel na oltaim mi go long ol miting long kongrigesen Kovinton long Kent, Wosington. Bihain mi insait long wok autim tok na dispela i kamap bikpela samting tru long i stap bilong mi, na long Jun 1972 mi kisim baptais. Nau mi mas wok strong long skelim gut ol samting bilong skin, na tu, bihainim laik bilong God na skulim pikinini meri bilong mi long tok bilong Baibel. Klostu em i gat 3-pela krismas na em i stap wantaim mama bilong em, bipo em meri bilong mi. Dispela em i taim bilong bikpela traim long mi na mi hatwok tru inap 16 yia samting. Sampela taim mi pilim olsem ol samting i no kamap stret na kamap hariap olsem mi laikim. Long kain taim olsem mi save tingim ol tok bilong God long Baibel olsem: “Yupela i mas painim rot bilong i stap wanbel wantaim olgeta man. . . . ‘Bekim rong em i wok bilong mi. Mi yet bai mi bekim rong bilong ol na mekim save long ol.’ ”​—Rom 12:​18, 19.

Planti nait mi krai na beten long God long strongim mi. Kain kain hevi i wok long painim mi na mi bel hevi tru. Tasol mi amamas long autim tok, na go long ol miting, na go long ol kibung na bungim ol nupela pren, na mi amamas tu long lukim ol olpela pren bilong bipo. Long wanpela kibung mi bungim wanpela meri nem bilong em Mary Hughes, na 2-pela yia bihain, long Ogas 1974, mipela marit.

Long mun Julai long yia bihain, meri bilong mi i karim pikinini man, nem bilong em Trei. I no longtaim i go pinis ol i makim mi long kamap wanpela wokman bilong kongrigesen. Mi kisim dispela gutpela wok na nau rot i op long mi ken mekim bikpela wok moa bilong God na mi strong long mekim olsem. Oltaim mi mas larim God i skulim mi long kamap strong long spirit. Taim mi gat wok mi mas mekim, mi bilip tru long God i ken givim gutpela tingting long mi. Long 1987, mi kamap wanpela elda.

Insait long ol dispela taim mi lain long bihainim pasin bilong Jehova. Yumi no ken les kwik. Dispela samting i kamap ples klia long 1990; pikinini meri bilong mi Ronda i kam i stap wantaim mipela na em i kamap wanpela Witnes i baptais pinis. Mi tingim tok i tru i gat strong. Inap 8-pela yia mi no bin lukim Ronda, long wanem, kot i bin orait long em i stap wantaim mama bilong em. Sampela yia bipo kot i orait long mi ken lukim Ronda, na mi bin wok strong long putim tok i tru i go daun long bel bilong em na nau Jehova i blesim wok bilong mi.

Ronda i tingim planti tok bilong Baibel mi na meri bilong mi i bin lainim em long en. Sindaun bilong famili bilong mipela i olsem gutpela samting long Ronda. Kirap long dispela taim em i strong long kisim stretpela save long Baibel.

Mi skelim i stap bilong mi long bipo na long nau, na mi save taim mi wok strong long mekim wok bilong Jehova, em inap lukautim mi taim Satan i traim mi. Nau dispela let i no kalabusim mi moa​—mi stap fri tru long mekim wok bilong God.​—Em stori bilong Tom McDaniel.

[Piksa long pes 12]

Mi kalabusman namba 626023 long haus kalabus bilong Provins Wosington

[Piksa long pes 13]

Famili olgeta​—Mary, Tom, pikinini meri Ronda, pikinini man Trei