‘Ol i No Save Wokim Gut Olsem Bipo’—O Olsem Wanem?
Papa bilong wanpela nupela ka i lusim woksop na em i tok: “Kompyuta long ka i no wok gut. Ol i no save wokim gut ka olsem bipo ol i save mekim!” Meri bilong em i wanbel na i tok: “I hatwok long save long ka bilong yumi i wanem kain. Em i wankain olsem ol narapela ka.”
MI SAVE bungim na stretim ol olpela ka bilong bipo, olsem na planti taim mi save harim dispela tok i kamap long maus bilong ol man i gat nupela ka. Planti ol i laikim yet ka ol i bin holim long bipo, maski ka ol i holim long nau em i gutpela moa na i no hatwok long lukautim. Ating ol i tingim yet planti gutpela amamas ol i bin kisim long taim ol i raun long ka bilong ol bilong bipo, maski em i no wankain olsem ol ka bilong nau.
Bungim Ol Olpela Ka
Mi laikim ol olpela ka—na mi save stretim na lukautim gut, long wanem, mi lukim ol i olsem samting bilong kisim amamas long en, na olsem samting i kamapim save bilong ol man em ol i bin wokim, na wanem kantri dispela ka i kamap long en long bipo.
Sapos ol man bilong baim na lukautim ol ka bilong bipo ol i painim wanpela, na i no gat planti olsem dispela i stap, orait, pe bilong en bai i go antap tru. Dispela samting i kamap long wanpela oksen bilong ol ka long hap bilong Inglan long Novemba 19, 1987. Taim ol i oksenim wanpela ka (Bugatti Royale Sports Coupe) ol man i bin wokim long yia 1931, pe bilong en i go antap inap 9,900,000 kina!
Taim man i baim ka olsem na pulim i kam long haus bilong em, ol pren bilong em i save kirap nogut taim ol i lukim dispela samting. Ol i ting, mobeta dispela man i lusim dispela pipia ka i stap. Tasol dispela man i tingting long taim em bai stretim ka na ka i kamap olsem nupela gen. Olsem na em i lap na i tok: ‘Ol i no save wokim gut ka olsem bipo ol i save mekim.’
Dispela Tok i Stret?
Em i stret. Yumi amamas long dispela samting, tasol yumi tingim sampela gutpela samting bilong ol ka bilong bipo na yumi sori tu. Yumi ken stori liklik long sampela bilong ol dispela ka bilong bipo. I gat wanpela em ol i kolim Rolls Royce, na ol man i tok, dispela ka i “Nambawan Ka Long Graun,” na “yu raun long en bai yu amamas tru.” Sapos ka i kirap na spit i go, insait long 24 sekon samting em ka inap spit i go inap 100 kilomita insait long wanpela aua. Tasol mak tru bilong spit em 130 kilomita insait long wanpela aua tasol. Tasol hevi bilong en em 2.5 ton! Tasol dispela ka inap brek olsem wanem? Man i wokim dispela ka i tok i gat wanpela samting i stap long giaboks, na “dispela samting inap helpim ka long brek hariap moa yet.” Wanpela ka olsem i stap nau, tasol i no gutpela bilong draivim long ol rot long nau.
Maski ka Rolls Royce i kamapim save bilong man i bin wokim, ol ka bilong nau i winim. Ol dispela ka bilong pastaim i no gat ol haidrolik na antilok paua-brek, na i no gat let long sia na i no gat ol stop-lait na signel-lait na het-lait na gutpela sia samting na ol kain kain nupela samting em i helpim ka long ran gut na man i no ken kisim bagarap—em ol samting ol save bilong nau i kamapim.
Em Samting Ol Save Bilong Nau i Kamapim?
Ating olgeta samting i stap long ka long nau, em save bilong nau i kamapim? Nogat. Ol ka bilong bipo tu i gat planti gutpela samting. Dispela ka ol i bin wokim long 1936, ol i kolim Packard, em i gat ol samting olsem: Samting bilong givim wel long bun bilong en, na samting bilong stretim sok-apsoba na bai ka i no kalap tumas, na samting bilong holim wel.
Long 1960 i go 1969, ol i senisim na putim planti nupela samting long ka ol i wokim, olsem ka Ford Mustang bilong 1966. Olsem na sapos yu tingting long putim samting moa long bilasim ka, yu inap mekim olsem, winim long bipo. Pe bilong ol ka i no bikpela tumas, na yu inap putim oda long kisim ka i gat traipela o liklik ensin o long kala em yu yet yu makim; na i gat planti arapela samting tu em yu inap baim na putim long ka bilong amamasim yu taim yu raun long en. Maski ol i wokim planti handet tausen ka, sapos yu makim wanem samting yu laik bai i stap long ka, ol bai wokim olsem.
Long Ai Ol i Olsem Wankain!
Long ai ol ka bilong nau i olsem wankain. Save bilong wokim ol masin na save bilong skelim hamas mani ol man inap tromoi long lukautim ka i kirapim ol saveman long wokim ol ka i wankain. Ol i skelim pastaim spit na strong bilong ka taim em i ran long rot, na sapos ka i gat gutpela skin em inap long ran gut na spit long rot. Sapos olsem, orait, ol man i no ken tromoi bikpela mani long baim bensin taim ka i ran long rot.
Ol kampani i wokim ka ol i mas tingim ol samting olsem strong bilong ensin, na hevi bilong ka, na bikpela bilong ka. Na ol i putim sampela samting long ka na bai man i no ken bagarap, na man i sindaun long ka em inap amamas taim em i raun long ka. Na nau taim ol i wokim ol ka i olsem ol i wankain. Tasol sapos ol man i senisim tingting bilong ol na ol i laik bai skin samting bilong ka i narapela kain liklik, orait lain bilong wokim ka ol i mas senisim pasin bilong wokim ka tu.
Olsem na sapos yumi tingim dispela samting, ating bai yumi tok, ‘Ol i no save wokim gut olsem bipo ol i save mekim.’—Wanpela man i salim dispela stori long Kirap!
[Ol Piksa long pes 16, 17]
1929 Rolls-Royce P1 Faux Cabriolet
[Kredit Lain]
Rolls Royce Heritage Trust
1936 Packard Model 1401
1966 Mustang GT Fastback
[Piksa Kredit Lain long pes 15]
Rolls Royce Heritage Trust