Inapim Wok Bilong Yu Olsem Papa o Mama

OL PAPAMAMA i gat bikpela wok tru long mekim, na moa yet long nau, winim olgeta taim bipo. Bilong wanem yumi tok olsem? Bikos nau i gat kain kain samting i kamap, em ol samting i no bin stap taim yu stap pikinini. Sampela samting i save traim stretpela pasin bilong ol pikinini—kain olsem taim ol i yusim Intenet—em i no bin i stap 20 o 30 yia i go pinis.

Yu ken mekim wanem bilong helpim pikinini bilong yu long abrusim ol pasin nogut bilong nau? Skelim dispela 3-pela gutpela tok yu ken bihainim.

1 Tokaut klia long tingting bilong yu long wanem samting i stret long mekim.

Taim ol pikinini i wok long i go bikpela, ol i harim planti paul tok long wanem samting i stret long mekim—long rot bilong ol wankrismas na ol buk, ol nius, TV, na ol muvi samting. Ol kain tok inap pulim ol yangpela na dispela i kamap strong moa yet taim ol i kamap tineja. Wok painimaut i soim olsem taim ol yangpela i mas wokim ol bikpela disisen, ol i save tingim moa yet tingting bilong papamama bilong ol, winim tingting bilong ol wankrismas.

Samting yu inap mekim. God i bin kirapim ol papamama bilong Israel bilong bipo long toktok wantaim ol pikinini bilong ol long olgeta taim, na putim stretpela tingting i go daun long bel bilong ol pikinini. (Lo 6:6, 7) Mekim olsem long pikinini bilong yu tu. Olsem, sapos yu save bihainim ol lo bilong Baibel long stretpela pasin, orait stori long pikinini long as na yu bilip olsem ol dispela lo i skulim yumi long nambawan gutpela rot bilong bihainim.

2 Helpim pikinini bilong yu long kliagut olsem samting em i mekim inap helpim o nogutim em.

Baibel i tok: “Samting man i planim, dispela samting tasol em bai kamautim.” (Galesia 6:7) Olgeta samting i kamap, i gat wanpela samting i bin mekim na em i kamap, yumi inap luksave long dispela long klostu olgeta samting i save kamap long laip bilong yumi. Tingim taim yu yet i bin i stap pikinini. Ol skultok yu bin kisimgut na yu tingim yet, em long wanpela pasin kranki yu bin mekim na yu bin karim hevi long en.

Samting yu inap mekim. Kamapim ol eksampel bilong ol samting i bin kamap tru tru, na stori gut long ol pikinini long hevi ol man i bin karim taim ol i bihainim rot nogut o stori long gutpela samting i bin painim ol man i bihainim stretpela rot. (Luk 17:31, 32; Hibru 13:7) Na tu, yu mas larim pikinini i karim hevi long ol rong bilong en. Olsem, sapos pikinini man bilong yu i mekim nabaut na brukim wanpela toi bilong narapela mangi, orait yu inap tokim pikinini long em i mas givim wanpela toi bilong em yet long dispela mangi. Long dispela rot pikinini i no inap lusim tingting olsem em i mas rispektim ol samting bilong ol arapela man.

3 Helpim ol long kamapim ol gutpela pasin.

Wanpela savetok bilong Baibel i tok: “Ol pikinini i kamapim klia ol i wanem kain man long rot bilong ol samting ol i mekim; yu inap luksave olsem ol i onest na mekim gutpela pasin.” (Sindaun 20:11, Good News Translation) Taim ol pikinini i wok long i go bikpela, ol i kirap bihainim ol pasin we i kamapim klia ol i wanem kain man o meri. Sori tru, sampela i kisim nem nogut. (Song 58:3) Tasol sampela i wok strong na kisim gutpela nem. Olsem, aposel Pol i raitim pas long wanpela kongrigesen na em i stori long yangpela man Timoti olsem: “Mi no gat narapela man i gat wankain pasin olsem em, bai em i tingim tru yupela.”—Filipai 2:20.

Samting yu inap mekim. Olsem yumi stori pinis, strongim pikinini long tingim hevi em bai karim long ol samting em i mekim, na tu, helpim em long tingim nem em bai kisim long ol pasin em i save bihainim. Taim samting i kamap bilong traim ol yangpela, ol inap kamapim ol gutpela disisen sapos ol i givim dispela tupela askim long ol yet:

• Mi laik i stap wanem kain man?—Kolosi 3:10.

• Kain man olsem bai mekim wanem long kain taim olsem?—Sindaun 10:1.

Baibel i kamapim stori bilong planti man na meri. Na ol samting ol i bin mekim i makim olsem ol i gutpela man o man nogut. (1 Korin 10:11; Jems 5:10, 11) Yusim ol dispela eksampel bilong helpim pikinini man o pikinini meri bilong yu long kisim ol gutpela pasin.

Ol buk na nius bilong ol Witnes Bilong Jehova inap helpim yu long bihainim ol stiatok bilong Baibel insait long famili bilong yu na bilong helpim ol pikinini bilong yu tu long mekim olsem.