FRAN PES STORI

Go Stap Long Narapela Kantri—Driman Nating na Samting Tru

Painim Gutpela Sindaun

GEORGE i wari tru. Em i no inap painim kaikai inap long famili bilong em. Long wankain taim, ol neiba i sik na sampela bilong ol i stap hangre. Tasol wanpela kantri i gat planti wok bisnis samting i stap sampela handret kilomita tasol long hap saut. Em i tingting, ‘Bai mi go sindaun long narapela kantri, kisim wok mani, na bai famili bilong mi i kam stap wantaim mi.’

Patricia tu i tingting long kisim nupela sindaun long narapela kantri. Em i no gat wok mani na i no gat planti rot i op long em i ken kisim skul o gutpela sindaun. Em na boipren bilong em i tingting long lusim Naijiria na i go olsem long Aljiria bilong go long Spen, tasol ol i no tingim ol hatwok bilong ron long ples wesan nating bilong Sahara. Em i tok: “Mi gat bel na mi tingting strong long pikinini bilong mi bai i gat gutpela sindaun.”

Rachel i laik kisim nupela sindaun long Yurop. Ol i pinisim em long wok bilong em long Filipins na ol wanblut i tok em i isi long kisim wok olsem hausmeri long narapela kantri. Em i dinau long mani na baim tiket bilong balus na tok gutbai long man na pikinini meri bilong em, na i promisim ol olsem, “I no longtaim na bai yumi stap wantaim gen.”

Insait long 20 yia samting i go pinis ol man i ting winim 200 milion manmeri olsem George, Patricia, na Rachel i bin go sindaun long narapela kantri. Sampela i bin ranawe long ol pait, ol bikpela disasta, o ol man i mekim nogut long ol, tasol planti i go bilong painim wok mani. Ol dispela manmeri i save bungim wanem ol hevi long nupela kantri? Yu ting olgeta i kisim dispela gutpela sindaun ol i bin painim? Wanem samting i save painim ol pikinini taim papa o mama i go kisim wok mani long narapela kantri? Lukim bekim bilong ol dispela askim.

Hatwok Bilong I Go Na Statim Nupela Sindaun

Namba 1 hatwok bilong go long narapela kantri, em dispela raun bilong i go. George em yumi bin stori long en long fes atikol, em i raun inap planti handret kilomita na em i gat liklik kaikai tasol. Em i tok: “Dispela raun em i nogut tru.” Planti man i no save go kamap long kantri ol i laik i go long en.

Patricia i laik go long Spen. Em i ron long wanpela trak i go olsem long ples nating bilong Sahara. Em i tok: “Mipela i lusim Naijiria na raun inap wanpela wik bilong i go long Aljiria, na mipela 25 manmeri i paspas insait long trak. Taim mipela i ron long rot, mipela i lukim planti bodi bilong ol man i dai pinis i stap nabaut, na tu, ol man i wokabaut nabaut long ples drai nating na wetim dai bilong ol. I luk olsem sampela draiva bilong ol trak i bin rausim ol dispela pasindia na lusim ol i stap long rot.”

Raun bilong Rachel i narapela kain long George na Patricia, em i flai long balus i go stret long Yurop we wok i wetim em. Tasol em i no ting olsem em bai misim tru pikinini meri bilong em i gat 2-pela krismas. Em i tok: “Taim mi lukim wanpela mama i lukautim liklik pikinini bilong em, mi save wari tru.”

George i hatwok long sindaun long dispela nupela kantri. Planti mun i bin lus paslain long em i salim mani i go long ples. Em i tok: “Planti nait mi save krai, long wanem, mi stap wanpis na mi bel hevi.”

Bihain long Patricia i stap sampela mun long Aljiria, em i go kamap long boda bilong Moroko. Em i tok: “Long hap mi karim pikinini meri bilong mi. Mi mas hait long ol man bilong stilim ol meri bilong ol narapela kantri na subim ol long mekim wok olsem pamukmeri. Bihain, mi kisim inap mani bilong kalap long bot i go long Spen. Bot i gat sampela bagarap long en na i no gat ol samting bilong olgeta pasindia i ken yusim. Mipela i mas yusim ol su bilong mipela long rausim wara long bot! Taim mipela i go kamap long Spen, mi no gat strong long lusim bot na wokabaut i go.”

Tru tumas, ol man husat i tingting long go sindaun long narapela kantri, ol i mas tingim samting nogut i save kamap long raun bilong i go long dispela kantri, na sampela samting moa. Ol i mas tingim olsem tokples na kalsa bilong nupela kantri i narapela, na tu, mani ol bai tromoi na ol lo bilong gavman long kamap sitisen o bilong stap longpela taim long kantri. Ol lain em ol i no kisim tok orait long gavman long i stap, ol i save hatwok tru long kisim gutpela wok mani, gutpela haus, ediukesen, na helt. Ol i hatwok tu long kisim laisens bilong draivim kar na opim benk akaun. Planti taim ol manmeri i go sindaun nating long kantri, ol man i save mekim nabaut long ol na yusim ol olsem wokboi nating.

Narapela samting tu long tingim em mani. Yu ting yu mas trastim mani? Baibel i tok: “Yu no ken hatwok tumas long kamap maniman. Sapos yu gat gutpela tingting, bai yu no ken mekim olsem. Maski yu kisim planti mani, wantu em bai i pinis. I olsem mani i gat wing na i flai i go antap olsem tarangau.” (Sindaun 23:4, 5) Tingim ol bikpela samting yumi nidim em ol samting mani i no inap baim olsem pasin laikim, bel na tingting i stap gut, na pasin wanbel insait long famili. Sori tru olsem planti papamama i tingim mani olsem bikpela samting moa winim pasin bilong ol long laikim poroman marit o pasin bilong laikim ol pikinini bilong ol!—2 Timoti 3:1-3.

God i wokim yumi ol man na inapim yumi long dispela laik bilong kisim save long em. (Matyu 5:3) Olsem na ol gutpela papamama i save mekim olgeta samting bilong inapim wok God i givim long ol bilong skulim ol pikinini bilong ol long God, long ol samting God i tingting pinis long mekim, na long ol lo bilong em.—Efesus 6:4.

“I GUTPELA SAPOS OL I BIN MEKIM NARAPELA DISISEN”

Airen i save stap long Filipins i tok: “Mi bikpela bilong 3-pela pikinini meri na taim mi gat 9-pela krismas mama i bin lusim mipela na go long Yurop. Em i promisim mipela olsem mipela bai i gat gutpela kaikai, gutpela ediukesen, na gutpela haus. Mi tingim yet dispela de em i laik i go. Em i holimpasim mi na tokim mi long lukautim 2-pela susa bilong mi em Rhea na Shullamite. Mi krai longpela taim tru.

“Fopela yia bihain, papa i lusim mipela na i go long mama. Taim em i stap wantaim mipela, mi save bihainim em long olgeta hap em i go long en. Taim em i tok gutbai, mi na tupela susa bilong mi i holimpasim em inap long em i kalap long bas. Mi krai gen inap longpela taim tru na i no gat wanpela samting inap mekim gut bel bilong mi.”

Shullamite em las bon bilong dispela 3-pela pikinini meri i tok: “Taim Airen i gat 9-pela krismas, em i lukautim mi olsem em i mama bilong mi. Mi save kamapim ol hevi bilong mi long em na em i skulim mi long wasim ol klos bilong mi yet, stretim bet bilong mi, na mekim ol narapela samting. Taim papamama i ringim mipela, sampela taim mi traim long kamapim filings bilong mi long ol, tasol mi no inap stori gut long samting mi pilim. Mi no ting ol i kliagut long tingting bilong mi.

“Planti taim ol manmeri i save askim mi sapos mi misim papamama bilong mi. Mi save tok, ‘yes.’ Tasol tru tru mi no save gut long mama bilong mi. Em i lusim mi taim mi gat 4-pela krismas na mi lain long stap olsem.”

Airen i tok: “Taim mi gat 16 krismas, mi na tupela susa bilong mi i go bilong bungim gen papamama bilong mipela. Mi amamas tru! Tasol taim mipela i go kamap, mi luksave olsem mipela i no save gut long ol.”

Rhea i tok: “Mi no save tokaut long ol hevi bilong mi. Mi save sem na mi painim hat long kamapim pasin laikim. Long Filipins, mipela i save stap wantaim ankol na anti bilong mipela em ol i gat 3-pela pikinini bilong ol yet. Maski ol wanblut bilong mipela i lukautim mipela, ol i no olsem ol papamama tru.”

Airen i pinisim tok olsem: “Mipela i no gat hevi taim famili i stap rabis—i no gat wanpela taim mipela i stap hangre. Tasol mi na ol susa bilong mi i karim hevi taim ol papamama i lusim mipela. Inap 5-pela yia nau mipela i stap wantaim olsem famili, tasol ol yia mipela i stap longwe i mekim na long bel na tingting, mipela i no pas gut wantaim. Mipela i save olsem papamama i laikim mipela, tasol mipela i ting i gutpela sapos ol i bin mekim narapela disisen na ol i no bin lusim mipela.”

Famili i Pas Gut Wantaim—Bikpela Samting Moa Winim Mani

Stori bilong ol man i go sindaun long narapela kantri i narapela narapela, tasol olgeta i gat wankain samting i painim ol olsem George, Rachel, na Patricia, em stori bilong ol i stap long ol atikol i stap paslain long dispela. Famili i karim hevi taim papa, mama, o poroman marit i lusim ol inap planti yia paslain long ol i bung gen wantaim. Long stori bilong George, em i bung gen wantaim famili bilong em bihain long 4-pela yia.

Rachel i bin stap longwe long pikinini meri bilong em na inap 5-pela yia bihain em i go bek long Filipins bilong kisim em. Patricia i go kamap long Spen wantaim bebi gel bilong em. Patricia i tok: “Bebi gel bilong mi em wanpela famili tasol mi gat, olsem na mi traim long lukautim em gut.”

Planti kain man olsem i save stap long nupela kantri, maski ol i pilim wanpis, ol i gat hevi bilong mani, o ol i stap longwe tru long famili bilong ol. Ol i bin tromoi bikpela haptaim, mani, na strong long dispela raun bilong ol, tasol taim ol samting i no wok gut, sampela i strongim bel na redi long go bek long ples, maski dispela i givim sem long ol o i daunim ol.

Wanpela man husat i bin strongim bel na mekim olsem, em Allan long Filipins. Em i kisim wanpela gutpela wok mani long Spen, tasol bihain long 18-pela mun, em i go bek long ples. Em i tok: “Mi misim tru meri na liklik pikinini meri bilong mi. Olsem na mi pasim tok olsem mi no ken wok long narapela kantri sapos mi no inap kisim famili olgeta i go wantaim mi. Na bihain mipela i mekim olsem. Famili i bikpela samting moa winim mani.”

Patricia tu i luksave long narapela samting i bikpela samting moa winim mani. Taim em i go kamap long Spen, em i bin bringim wanpela Baibel Nupela Testamen o Ol Skripsa Grik i go wantaim em. Em i tok: “Mi ting dispela buk bai lukautim mi. Bihain mi bungim wanpela meri na em i wanpela Witnes Bilong Jehova. Pastaim, mi no gat laik long toktok wantaim ol man bilong dispela lotu. Olsem na mi givim planti askim long dispela Witnes bilong kamapim olsem ol bilip bilong em i no stret. Tasol em i sambai long bilip bilong em na bekim olgeta askim bilong mi long Baibel stret.”

Patricia i kisim save olsem bilong kisim amamas tru na wetim gutpela samting i kamap bihain, em i mas save gut long God na long ol samting God i tingting pinis long mekim, na i no olsem em i mas i go sindaun long narapela kantri o i gat planti mani. (Jon 17:3) Long ol narapela samting tu, Patricia i kisim save olsem God tru i gat nem bilong em—em Jehova. (Song 83:18, NW) Em i ritim tu long Baibel olsem klostu nau Kingdom gavman bilong God long han bilong Jisas Krais bai pinisim tru pasin bilong i stap rabis. (Daniel 7:13, 14) Song 72:12, 14 i tok: “[Jisas] i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Sapos ol man nogut i laik daunim ol na bagarapim ol, em i save kisim bek ol.”

I gutpela yu lusim sampela haptaim long skelim gut ol tok bilong Baibel. Dispela buk i gat savetingting bilong God na inap helpim yu long save long ol bikpela samting long laip bilong yu, long mekim ol gutpela disisen, na long karim ol hevi bilong nau na wetim ol gutpela samting i kamap bihain.—Sindaun 2:6-9, 20, 21.