NIUS I KAM LONG OLGETA HAP

Yunaitet Stets

Lain U.S. Department of Homeland Security i tok insait long 10-pela yia i go pinis, ol wokman bilong sekim ol kago i bin kisim inap olsem 50 milion ol samting lo i tambuim long kisim i go long balus. Long 2011 tasol, ol dispela wokman i bin kisim olsem 1,200 gan na ol man i no kisim i go long balus. Ol papa bilong ol gan i tok ol i lusim tingting olsem ol i bin karim gan.

Brasil

Bilong pasim ol sumatin long no ken lusim nating skul, ol bikman bilong ediukesen i kirap long pasim wanpela liklik masin long yunifom bilong ol pikinini. Liklik masin bai salim teks mesis long papa o mama olsem pikinini i kamap pinis long skul o sapos em i go leit long skul olsem 20 minit bihain, em bai kisim narapela teks mesis.

Nowe

Gavman bilong Nowe i no tingim moa Misin Luteran olsem bikpela lotu bilong kantri. Dispela em namba 1 taim Gavman bilong Nowe i vot long stretim gen ol lo bilong kantri na bai Lotu na Gavman i no ken pas tumas wantaim.

Ripablik Sek

Wanpela wok painimaut i soim olsem, inap 60 pesen bilong ol wokman bilong Sek i tok, ol i pilim olsem em wok bilong ol long ansarim na bekim telefon, ol e-mail, o teks mesis bilong kampani taim ol i no wok. Na 30 pesen i ting olsem em i pasin nogut sapos ol i no bekim hariap telefon samting.

India

Maski ol i bungim planti kaikai tru, olsem 50 pesen bilong ol kaikai ol i bin kamapim insait long 20 yia i go pinis na 71 milion ton rais na wit, gavman bilong India i no inap yet long givim kaikai long olgeta manmeri bilong kantri. Ol pipol i kisim tasol 40 pesen bilong ol dispela kaikai. Pasin korapsen na westim kaikai em wanpela as bilong dispela hevi.