NIUS I KAM LONG OLGETA HAP

AMERIKA

Long olgeta wan wan de, winim 20 manmeri em bipo ol i soldia long ami bilong Amerika, ol i save suasaid. Long olgeta mun, 950 manmeri em bipo ol i soldia na nau ol i stap aninit long lukaut bilong U.S. Department of Veterans Affairs, ol i traim long suasaid.

Saina

Nius China Daily i tok: “Klostu 50 pesen bilong ol meri i gat 30 krismas na i lusim ples bilong ol long go kisim wok long narapela hap bilong kantri, ol i kisim bel paslain long ol i marit, dispela namba bilong ol meri [Saina] i kisim bel nating i bikpela tru taim yu skelim wantaim namba bilong ol lain meri i bin stap paslain long ol.” Ol manmeri long Saina “i orait long . . . man o meri husat i no marit stret long sindaun wantaim.”

Grik

Sik malaria i wok long kamap bikpela gen long kantri Grik, em wanpela sik kantri i bin daunim long 1974. Dispela samting i kamap bikos long hevi bilong mani long kantri, na ol i katim baset bilong mani ol i save yusim bilong baim marasin samting bilong ol pablik haus sik.

India

Wanpela wok painimaut i soim olsem maski i gat planti senis i kamap long i stap bilong ol man, 74 pesen bilong ol manmeri ol i intaviuim i tok ol i laik maritim poroman em papamama i makim, na i no man o meri ol yet i laikim. Na inap 89 pesen bilong ol manmeri i tok ol i laik sindaun wantaim olgeta famili wanblut long wanpela haus, na ol i no laik sindaun ol yet wantaim poroman marit na pikinini bilong ol.

Itali

“I gat planti samting tumas bilong mekim insait long Misin [Katolik] long Yurop we i gat planti wok bisnis na long Amerika. Ol pasin bilong lotu bilong mipela i kamap olpela pinis, ol haus lotu bilong mipela i bikpela, ol haus bruder na haus sister i no gat man long en na i gat planti wok moa bilong bosim ol samting bilong Misin, na ol bung bilong mipela i bikpela na ol bilas bilong mipela i gat namba. . . . Misin i bihainim yet ol pasin bilong bipo olsem 200 yia i go pinis.”—Interview with Catholic cardinal Carlo Maria Martini, published posthumously by Corriere della Sera.