NIUS I KAM LONG OLGETA HAP

Saut-Is Esia

Lain World Wildlife Fund i tok, namel long 1997 na 2011, ol man i kisim save olsem i gat planti nupela kain diwai na ol animal samting, olsem snek ruby-eyed pit viper (Trimeresurus rubeus) em ol i painim long Greater Mekong, em wanpela ples i stap long boda bilong Kambodia, Laos, Myanmar, Tailan, Vietnam, na provins bilong Yunnan long Saina. Long 2011, ol i painim 82 nupela kain diwai samting, na 44 nupela kain animal na pis samting.

Yurop

Nius The Moscow Times i tok pasin bilong baim na salim ol man em wanpela bikpela hevi tru long “olgeta hap bilong Yurop.” Ol i salim ol man long wok long ol haus pamuk, wok sleiv, na tu, ol i “salim ol hap bilong bodi olsem kidni samting.” Ol man i mekim dispela wok bisnis i save salim ol man i stap rabis, nogat wok mani, na ol man o meri em ol narapela i daunim ol.

Nu Silan

Ol saveman i mekim wok painimaut long pasin bilong ol pikinini na ol tineja long watsim TV, ol i tok pasin bilong lusim bikpela haptaim long watsim TV “em as na taim ol pikinini i go bikpela ol i no laik bung wantaim ol narapela.” Ol dispela saveman i tok wok painimaut bilong ol i sapotim dispela tingting olsem ol pikinini i mas watsim “ol gutpela program inap wanpela o 2-pela aua tasol long wan wan de.”

Alaska

Klostu olgeta viles long Alaska i stap klostu long ol nambis na ol wara, 86 pesen bilong ol i bungim hevi bilong tait wara o wara i rausim ol hap ston na graun samting. Ol ripot i soim olsem ples i hat tumas, olsem na solwara i no kamap ais hariap, dispela i mekim na taim bikpela win na ren i kamap, i no gat samting bilong banisim ol viles.

Graun Olgeta

Dairekta bilong lain International Energy Agency, Maria van der Hoeven, i tok ol kampani i tromoi bikpela mani long wokim ol gutpela masin bilong givim pawa, olsem pawa i kam long win na san, tasol “ol masin i kamapim pawa we i bagarapim graun long nau wankain long ol masin ol i yusim inap 20 yia i go pinis.”