Rot Bilong Pinisim Pasin Bilong Pasim Maus Tasol na i No Laik Toktok

HATWOK BILONG EN

Tupela marit em ol i bin tok promis long laikim narapela narapela, hau na tupela i pasim maus tasol na i no laik toktok wantaim inap sampela aua o sampela de? Ol i tokim ol yet olsem: ‘I no gat wok long toktok, bikpela samting em olsem yumi no pait moa.’ Maski ol i mekim olsem, dispela hevi i stap yet na tupela wantaim i no amamas.

AS NA DISPELA I KAMAP

Bekim rong. Sampela i save pasim maus bilong bekim rong poroman marit i mekim long ol. Olsem, man marit i mekim plen bilong wiken na i no toktok wantaim meri bilong em pastaim long dispela samting. Taim meri i painimaut, em i belhat na tok long man bilong em olsem em i no save tingim ol narapela. Man i bekim na tok long meri bilong em olsem em i save bel hevi hariap long olgeta liklik samting. Meri i belhat na i pasim maus na i no laik toktok moa long em. I olsem meri i tok, “Yu bagarapim bel bilong mi, so mi bai bagarapim bel bilong yu tu.”

Strong long narapela poroman i mas bihainim tingting bilong em. Sampela i save pasim maus na i no laik toktok bilong mekim poroman marit i bihainim tingting bilong ol. Olsem, tingim tupela marit em ol i pasim tok long i go holide na meri i laik bai papamama bilong em tu i go wantaim ol. Tasol man i no orait long dispela. Man i tok: “Yu maritim mi, yu no maritim papamama bilong yu.” Nau man i pasim maus na i no laik toktok, em i mekim olsem bambai meri i givap na bihainim tasol laik bilong em.

I tru olsem sampela taim i gutpela long tupela marit i pasim maus taim kros i go bikpela na bihain taim bel bilong ol i kol, orait ol i ken stretim hevi. Dispela kain pasin bilong pasim maus em i gutpela. Baibel i tok olsem i gat “taim bilong pasim maus na taim bilong toktok.” (Saveman 3:7) Tasol sapos yu pasim maus bambai yu ken bekim rong o bilong mekim poroman i bihainim laik bilong yu, dispela inap pulim hevi i go moa yet, na tu, inap pinisim pasin rispek namel long yutupela. Yu inap mekim wanem bilong stopim kain pasin olsem?

SAMTING YU KEN MEKIM

Namba 1 samting yu ken mekim bilong pinisim dispela pasin bilong i no toktok long poroman marit, em yu mas luksave olsem dispela pasin i no inap pinisim tru ol hevi bilong yu. Tru, taim yu pasim maus na i no laik toktok, ating yu pilim olsem yu bekim rong bilong poroman bilong yu na ating dispela i kirapim em long bihainim laik bilong yu. Tasol yu ting em gutpela pasin long mekim olsem long man o meri yu bin tok promis long laikim em? I gat gutpela rot moa bilong stretim tok pait.

Pilim tingting bilong poroman. Baibel i tok man i gat pasin laikim “em i no save belhat kwik.” (1 Korin 13:4, 5) Olsem na no ken kirap nogut na kros long poroman marit bilong yu taim em i belhat na mekim kain tok olsem, “Yu no save putim yau liklik long ol tok bilong mi” o “Oltaim yu save kam leit.” No ken tingim tok bilong em, pilim tingting bilong em. Olsem, taim em i tok, “Yu no save putim yau liklik long ol tok bilong mi,” i olsem em i laik tok “Mi pilim olsem yu no save tingim tumas ol tingting mi kamapim.”—Stiatok bilong Baibel: Sindaun 14:29.

Kolim isi ol tok. Taim yu pulim kros, dispela inap mekim kros i go bikpela. Tasol i gat sampela samting yu inap mekim bilong stopim kros long i go bikpela. Yu inap mekim wanem? Buk Fighting for Your Marriage i tok: “Taim yu kolim isi ol tok na putim gut yau long tingting poroman bilong yu i kamapim, dispela em gutpela rot bilong daunim kros long i go bikpela. Planti taim dispela tasol inap pinisim kros.”—Stiatok bilong Baibel: Sindaun 26:20.

No ken tingim yu yet, tingim yutupela wantaim. Baibel i tok: “Olgeta wan wan i mas wok long tingim ol samting bilong helpim narapela, na ol i no ken tingting long ol samting bilong helpim ol yet, nogat.” (1 Korin 10:24) Sapos yu tingim poroman bilong yu olsem gutpela pren bilong yu na i no birua bilong yu, dispela bai mekim na bai yu no bel hevi hariap, kros, o pasim maus na i no laik toktok long em.—Stiatok bilong Baibel: Saveman 7:9.

Pasin bilong pasim maus na i no laik toktok em i no stret wantaim tok Baibel i mekim olsem: “Yupela olgeta wan wan i mas laikim ol meri bilong yupela olsem yupela i save laikim yupela yet. Na maritmeri i mas i gat bikpela rispek long man bilong en.” (Efesus 5:33) I gutpela long yutupela pasim tok olsem pasin bilong pasim maus na i no laik toktok i no ken kamap insait long marit bilong yutupela.