Helpim Pikinini i Krai na Bikhet Nabaut

HATWOK BILONG EN

Taim liklik pikinini bilong yu husat i gat tupela krismas i no amamas long wanpela samting, em i save singaut bikmaus, paitim lek bilong em strong long graun na tromoi nabaut hanlek. Yu tingting planti: ‘Pikinini bilong mi em i nomol o olsem wanem? Mi mekim sampela samting i no stret na em i krai na bikhet nabaut? Bihain em bai lusim dispela pasin?’

Yu inap helpim pikinini bilong yu i gat tupela krismas long senisim pasin bilong em. Tasol pastaim yu mas painimaut as na pikinini i mekim olsem.

AS NA DISPELA I KAMAP

Ol liklik pikinini i no save gut long kontrolim filings bilong ol. Dispela inap mekim na sampela taim ol i krai na bikhet nabaut. Tasol i gat sampela samting moa inap kirapim pikinini long mekim olsem.

Tingim senis i kamap taim pikinini i gat tupela krismas. Kirap long taim mama i karim em, papamama i save givim em olgeta samting em i nidim. Olsem, sapos bebi i krai, wantu tasol papamama i save sekim em olsem, ‘Bebi i sik? Em i hangre? Em i laik ol i holim em? Ol i mas senisim nepi bilong em?’ Ol papamama i mekim olgeta samting bilong helpim bebi long i stap gut. Na dispela em i stret bikos bebi i no inap helpim em yet.

Tasol taim pikinini i gat tupela krismas, em i luksave olsem papamama i no moa mekim olgeta samting em i laikim. Ol i no bihainim laik bilong em moa, ol i laik em i mas bihainim tok bilong ol. Ol samting i senis na pikinini i no amamas long dispela na em i soim dispela long rot bilong krai na bikhet nabaut.

Sampela haptaim i mas lus na isi isi pikinini bai i lain olsem papamama i no stap bilong lukautim em tasol, ol i gat wok tu long skulim em. Na bihain ating pikinini bai luksave olsem em i gat wok long “bihainim tok bilong papamama” bilong em. (Kolosi 3:20) Tasol long nau yet, planti taim pikinini bai krai na bikhet nabaut na dispela bai traim tru pasin bilong papamama long i no les kwik.

SAMTING YU KEN MEKIM

Pilim tingting bilong em. Yu mas save olsem pikinini bilong yu i no gat tingting olsem bilong wanpela man o meri i bikpela pinis. Em i no save gut long bosim filings bilong em yet, olsem na taim em i no amamas long wanpela samting em bai krai na bikhet nabaut. Traim long pilim tingting bilong em.—Stiatok bilong Baibel: 1 Korin 13:11.

Stap isi. Taim pikinini bilong yu i krai na bikhet nabaut, no ken belhat kwik bikos dispela i no inap kamapim wanpela gutpela samting. Wok strong long no ken tingim tumas dispela pasin bilong em na bosim gut bel. Taim yu save long as na pikinini i krai na bikhet nabaut dispela bai helpim yu long stap isi.—Stiatok bilong Baibel: Sindaun 19:11.

No ken bihainim laik bilong em. Sapos yu bihainim laik bilong pikinini na givim samting em i laikim, orait neks taim em i laikim narapela samting em bai krai na bikhet nabaut inap long yu givim dispela samting long em. Long gutpela pasin, soim pikinini olsem yu bai bihainim tok bilong yu na yu no inap senisim tingting.—Stiatok bilong Baibel: Matyu 5:37.

No ken les kwik. No ken ting pasin bilong pikinini long krai na bikhet nabaut bai pinis wantu tasol, na moa yet taim yu tokim em long as na yu no inap bihainim tingting bilong em maski em i bikhet. Sapos yu tok nogat long pikinini na yu mekim olsem long olgeta taim, orait isi isi pikinini bai lusim dispela pasin. Bihain dispela pasin bilong em long krai na bikhet nabaut bai pinis olgeta. Baibel i tok: “Man i gat pasin laikim em i no save les kwik.”—1 Korin 13:4.

Na tu, traim mekim olsem:

• Taim pikinini i stat long krai na bikhet nabaut, sapos inap, apim pikinini na holim em na bai em no inap krai bikmaus na tanim tanim long graun. No ken bikmaus long pikinini. Wetim em long pinisim straik bilong em. Bihain, pikinini bai luksave olsem pasin bilong em long krai na bikhet nabaut i no kamapim wanpela gutpela samting.

• Makim wanpela hap bilong putim pikinini bilong yu long en taim em i krai na bikhet nabaut. Putim em long dispela hap na tokim em olsem sapos em i stap isi, orait em bai lusim dispela hap.

• Sapos pikinini bilong yu i krai na bikhet nabaut long pablik ples kisim em i go long hap we ol narapela i no inap lukim em. No ken bihainim laik bilong em taim em i mekim samting bilong pulim ai bilong ol narapela. Dispela bai mekim na pikinini bai kisim tingting olsem sapos em i laikim wanpela samting em bai kisim long rot bilong krai na bikhet nabaut.