Ol Gutpela Samting i Kamap Long Bosim bel

BOSIM BEL EM WANEM SAMTING?

Bosim bel inap makim tu pasin bilong

• wet liklik long kisim samting

• daunim laik bilong kisim samting yu no nidim

• pinisim gut wok maski yu no laikim

• putim laik bilong ol narapela i go pas

WAI NA BOSIM BEL I BIKPELA SAMTING?

Ol pikinini i gat pasin bilong bosim bel inap sakim traim, maski i luk olsem ol bai kisim amamas inap sotpela taim. Tasol, ol pikinini i no gat pasin bilong bosim bel inap

• belhat kwik

• kisim dipresen

• smok o dring planti alkohol o kisim drak

• makim ol kaikai we i no inap helpim bodi

Wanpela wok painimaut i soim olsem ol pikinini i save bosim bel i no inap gat hevi long helt, mani, na hevi long lo taim ol i kamap bikpela. Bihain long dispela wok painimaut, Profesa Angela Duckworth bilong Yunivesiti Bilong Pennsylvania i tok: “I no gat wanpela tok olsem pasin bilong bosim bel i ‘planti tumas.’”

SKULIM OL LONG BOSIM BEL

Lain long tok nogat na strongim tok.

STIATOK BILONG BAIBEL: “‘Yes’ bilong yupela i mas minim yes tasol, na ‘Nogat’ bilong yupela i mas minim nogat.”—Matyu 5:37.

Ating ol liklik pikinini i laik bai papamama i senisim tingting bilong ol taim ol i krai na bikhet nabaut—ating long pablik ples. Sapos papa o mama i harim tok bilong pikinini, em bai luksave olsem pasin bilong krai na bikhet nabaut i gutpela rot bilong kisim samting em i laikim.

Na tu, sapos papa o mama i tok nogat na em i strongim tok, pikinini bai lainim wanpela bikpela samting—oltaim yumi no inap kisim ol samting yumi laikim. Saveman David Walsh i tok: “Ol manmeri i lainim dispela pasin i save stap amamas. Yumi no helpim ol pikinini bilong yumi taim yumi skulim ol olsem oltaim ol samting bai kamap olsem ol i laikim.”a

Taim yu tok nogat long pikinini long nau dispela bai helpim em long bosim bel long bihain—olsem, sapos traim i painim em long kisim drak, mekim marit pasin paslain long marit, o mekim ol samting we inap kamapim bagarap.

Helpim ol pikinini bilong yu long kliagut long ol samting inap kamap, gutpela na nogut.

STIATOK BILONG BAIBEL: “Samting man i planim, dispela samting tasol em bai kamautim.”—Galesia 6:7.

Pikinini bilong yu i mas kliagut olsem ol samting em i mekim bai kamapim sampela samting, olsem na pasin bilong i no bosim bel inap kamapim hevi. Olsem, sapos pikinini man bilong yu i save belhat hariap taim em i bel hevi, ol narapela bai i no laik stap pren bilong em. Na sapos em i kisim pasin bilong bosim bel taim narapela i sikirapim bel bilong em—o stap isi na i no hariap long mekim samting—ol manmeri bai laikim em. Helpim pikinini bilong yu long save olsem taim em i bosim bel ol gutpela samting inap kamap.

Skulim pikinini long tingim ol bikpela samting.

STIATOK BILONG BAIBEL: “Skelim gut wanem ol samting i bikpela samting moa.”—Filipai 1:10.

Bosim bel i no makim tasol olsem yumi no laik mekim rong; dispela i makim tu olsem yumi mas mekim ol samting i gat wok long mekim, maski yumi no laikim. Em i bikpela samting long skulim pikinini long skelim wanem ol samting i bikpela samting na strong long bihainim. Helpim pikinini long mekim ol bikpela samting pastaim. Olsem, em i mas putim homwok paslain long pilai.

Stap gutpela piksa.

STIATOK BILONG BAIBEL: “Mi soim pasin long yupela, samting mi mekim long yupela, yupela tu i mas mekim.”—Jon 13:15.

Pikinini bilong yu bai lukim pasin yu mekim taim wanpela samting i mekim yu belhat. Soim long eksampel bilong yu olsem pasin bilong bosim bel inap kamapim ol gutpela samting. Olsem, taim pikinini i mekim samting yu no laikim, yu save toktok long em wantaim belhat o yu mekim long pasin isi?