Lek Bilong Hos

OL HOS (Equus caballus) i save ran spit tru inap olsem 50 kilomita insait long wanpela aua. Maski em i ran spit tru insait long liklik haptaim, em i no yusim olgeta strong bilong em. Wanem samting i helpim ol hos long mekim olsem? Strong i stap long lek bilong ol i helpim ol long ran spit olsem.

Yumi ken stori long olsem wanem lek bilong ol hos i save helpim ol long ran. Taim hos i krungutim graun, ol rop masol long lek bilong em i save mekim wok olsem wanpela spring, dispela i helpim hos long ran strong moa.

Taim hos i krungutim graun, lek bilong en i save guria na dispela inap bagarapim ol rop masol bilong en. Tasol dispela i no kamap, long wanem, ol rop masol long lek bilong hos i strong na ol inap long daunim presa long lek. Ol saveman i tok dispela “strong i stap long ol rop masol” long lek bilong hos i mekim na em inap ran spit tru.

Ol ensinia i traim long wokim wanpela robot i gat 4-pela lek wankain olsem bilong ol hos. Tasol ol ensinia bilong lain Biomimetic Robotics Laboratory bilong Massachusetts Institute of Technology i tok, i hatwok long mekim kain robot olsem, long wanem, i nogat ol masin samting, na tu, ol ensinia i no kliagut long hau ol bai wokim kain samting olsem.

Yu ting wanem? Strong i stap long lek bilong hos i kamap long rot bilong evolusen? O wanpela i bin wokim?