Mesaia

Olsem wanem ol man bai luksave long Mesaia?

Baibel i tok profet olsem Mesaia o Krais bai mekim tupela kain wok. Na ol dispela wok bai kamap insait long narapela narapela haptaim.a Namba 1, em bai stap olsem wanpela man bilong graun na long dispela rot ol man inap kisim save long em. Ol man bilong raitim Baibel i stori long ol samting long i stap bilong em, na tu, wok autim tok bilong em. Nambawan wok bilong ol tok profet bilong Baibel em long “autim tok bilong Jisas.”—Revelesen 19:10.

BAIBEL I TOK

Mesaia bai . . .

• Kamap long lain tumbuna pikinini bilong King Devit.—Aisaia 9:7; Luk 3:23-31.b

• Bon long taun Betlehem.—Maika 5:2; Luk 2:4-7.

• I gat pasin daun taim em i autim “gutnius.”—Aisaia 61:1; Luk 4:43.

• Stap olsem man nating na ol man bai givim baksait long em.—Aisaia 53:3; Matyu 26:67, 68.

• Go long han bilong ol birua na ol bai baim em long 30 mani silva.—Sekaraia 11:12, 13; Matyu 26:14, 15.

• I no bekim wanpela tok taim ol man i sutim tok bilong kilim em i dai.—Aisaia 53:6, 7; Matyu 27:12-14.

• Kamap olsem “Pikinini Sipsip” em ol man i kilim i dai olsem ofa bilong rausim sin bilong ol man, na bai ol inap stap klin long ai bilong God.—Aisaia 53:7; Jon 1:29, 34, 36.

• I dai, tasol ol man i no inap brukim ol bun bilong en.—Song 34:20; Jon 19:33, 36.

• Dai na ol bai planim bodi bilong em long matmat bilong ol maniman.—Aisaia 53:9; Matyu 27:57-60.

• Kirap bek long namba 3 de.—Matyu 16:21; 28:5-7.

Jisas i inapim ol dispela tok profet na ol narapela tok profet tu. Na tu, em i oraitim ol sikman na kirapim bek ol man i dai pinis. Ol samting em i mekim i no kamapim tasol olsem em i Mesaia, nogat, dispela i strongim bilip bilong yumi olsem ol tok promis bilong Baibel bai kamap tru long bihain. (Luk 7:21-23; Revelesen 21:3, 4) Bihain long Jisas i kirap bek, em i sindaun long “han sut” bilong God na wetim taim Em i makim bilong pinisim wok olsem Mesaia.—Song 110:1-6.

“Taim Krais i kam, ating em bai wokim planti mirakel moa winim ol mirakel dispela man i wokim, a?”—Jon 7:31.

Mesaia bai pinisim wok bilong em olsem wanem?

Lain Juda long taim bilong Jisas i ting olsem Mesaia bai helpim ol long lusim kalabus long wok bos bilong Rom, na kamapim gen kingdom bilong Israel. (Aposel 1:6) Tasol bihain ol disaipel Juda bilong Jisas i klia olsem Jisas bai pinisim wok bilong em long heven olsem wanpela strongpela spirit em God i givim namba long em long mekim wok bos.—Matyu 28:18.

BAIBEL I TOK

Long Namba 2 wok bilong Mesaia, em bai . . .

• Mekim wok king long Kingdom Bilong God, em wanpela gavman bai bosim graun olgeta.—Daniel 7:13, 14; Revelesen 11:15.

• Mekim gut long olgeta man husat i bilip long em.—Stat 22:17, 18; Song 72:7, 8.

• Daunim na bagarapim ol gavman na “ol manmeri bilong planti kantri bai i kirap nogut tru.”—Aisaia 52:15; Revelesen 19:19, 20.

• Lukautim “bikpela lain manmeri,” em ol manmeri husat i bihainim stretpela pasin na ol bai stap long dispela nupela taim.—Revelesen 7:9, 10, 13-17.

• Kisim namba long God Jehova na kirapim bek ol man i dai pinis na bai ol i ken stap long paradais long graun.—Luk 23:43; Jon 5:21, 28, 29.

• Skulim ol manmeri em i bosim long stap wanbel.—Aisaia 11:1, 2, 9, 10.

• Pinisim sin na ol manmeri bai i no sik na dai moa.—Jon 1:29; Rom 5:12.

• Daunim wok bos bilong Satan na ol manmeri bai i stap wanbel na lotuim God Jehova.—1 Korin 15:25-28; 1 Jon 3:8.

Jisas i inapim namba 1 wok bilong em olsem Mesaia. Na tu, em bai inapim namba 2 wok bilong em. Olsem na ol man i gat savetingting bai kisim save na bihainim gut ol pasin bilong em. Jisas i tok: “Mi yet mi rot na tok i tru na laip.”—Jon 14:6.

“Na taim em i stap yet ol manmeri i ken bihainim stretpela pasin tasol. Taim mun i lait yet, planti gutpela samting i ken kamap. Em bai i stap king na bosim olgeta manmeri . . . i go inap long olgeta hap bilong graun.”—Song 72:7, 8.