Mesaia! Rot Bilong God Long Kisim Bek Ol Man
“Olgeta man bilong lain bilong Adam ol i save dai. Na olsem tasol olgeta man bilong lain bilong Krais bai ol i kisim laip.”—1 KO. 15:22.
1, 2. (a) Andru na Filip i bin mekim wanem taim ol i bungim Jisas? (b) Bilong wanem yumi tok i gat planti samting i soim yumi olsem Jisas em i Mesaia?
ANDRU i tokim brata bilong em Pita, “Mipela i lukim pinis Mesaia.” Andru i bilip tru olsem Jisas bilong Nasaret em i dispela Man God i Makim. Filip tu i bilip na em i go painim pren bilong en Nataniel na i tokim em: “Mipela i lukim pinis dispela man bipo Moses i bin raitim tok bilong em long buk bilong lo, na ol profet tu i bin raitim tok bilong em. Em Jisas bilong taun Nasaret, em pikinini bilong Josep.”—Jo. 1:40, 41, 45.
2 Olsem wanem? Yu bilip tru olsem Jisas em i dispela Mesaia Jehova i bin promis long salim i kam, na em i “nambawan man tru bilong helpim ol manmeri”? (Hi. 2:10) Long taim bilong ol aposel, i no gat planti samting i soim olsem Jisas em i Mesaia, tasol long nau, i gat planti samting i soim yumi olsem em i Mesaia. Kirap long taim Jisas i bon na i go inap long taim em i kirap bek long indai, Baibel i kamapim planti samting bilong makim olsem em i dispela Krais. (Ritim Jon 20:30, 31.) Na tu, Baibel i kamapim olsem, long heven Jisas bai wok yet long inapim wok bilong em olsem Mesaia. (Jo. 6:40; ritim 1 Ko. 15:22.) Long rot bilong ol save yu kisim long Baibel, yu tu i ken tok olsem yu “lukim pinis Mesaia” long nau. Tasol pastaim yumi ken skelim olsem wanem ol disaipel long taim bilong Jisas ol inap tok ol i bin lukim pinis Mesaia.
‘Tok Hait’ Bilong Mesaia i Kamap Klia Isi Isi
3, 4. (a) Olsem wanem ol disaipel long taim bilong ol aposel ol i ‘lukim Mesaia’? (b) Bilong wanem yu inap tok olsem Jisas wanpela tasol i truim olgeta tok profet bilong Mesaia?
3 Bilong wanem ol disaipel bilong Jisas long taim bilong ol aposel, ol inap tok olsem Jisas em i Mesaia? Long rot bilong ol profet, isi isi Jehova i bin kamapim klia ol mak bilong dispela Mesaia husat bai kam. Wanpela saveman bilong Baibel i tok pasin bilong kamapim klia ol mak, dispela i olsem ol man i joinim joinim olgeta wan wan hap ston mabol na wokim wanpela stetiu. Tingim olsem planti man i bringim wan wan hap ston na ol i kam bung long wanpela rum; i no gat wanpela taim bipo we ol dispela man i bin bung o toktok wantaim. Sapos ol dispela hap ston i join gut wantaim na i kamapim wanpela gutpela stetiu, ating yu bai kisim tingting olsem wanpela man i bin katim ol dispela hap ston na salim i go long olgeta dispela man. Olsem olgeta wan wan hap ston bilong dispela stetiu, olgeta wan wan tok profet bilong Mesaia i helpim yumi long kliagut long Mesaia.
4 Orait, yu ting truim bilong olgeta tok profet bilong Mesaia bai kamap nating long wanpela man? Wanpela saveman i tok olgeta tok profet bilong Mesaia i no inap kamap nating tasol long wanpela man, nogat tru. Olsem na dispela man i tok: “Namel long olgeta man i bin stap long graun, Jisas wanpela tasol i bin truim olgeta dispela tok profet.”
5, 6. (a) Wanem kain strafe bai painim Satan? (b) Isi isi, olsem wanem God i bin kamapim long ples klia dispela lain em “pikinini” bilong promis bai kamap long en?
5 Ol tok profet bilong Mesaia i insait long wanpela “tok hait” i gat planti hap bilong en we i bikpela samting long ol lain long heven na graun. (Kl. 1:26, 27; Stt. 3:15) Na strafe bilong Satan—“dispela snek bilong bipo yet” husat i bringim sin na indai long olgeta manmeri—i insait long dispela tok hait. (KTH 12:9) Dispela strafe bai i kamap olsem wanem? Jehova i bin tok profet olsem wanpela “meri” bai kamapim wanpela “pikinini” husat bai krungutim het bilong Satan. Tok profet i tok dispela “pikinini” bai krungutim het bilong snek, olsem pinisim tru man i as bilong pasin bikhet, sik na indai. Tasol pastaim, God bai larim Satan i kaikaim lek bilong “pikinini” bilong meri.
6 Isi isi Jehova i tokaut long husat bai kamap dispela “pikinini” bilong promis. God i mekim strongpela promis long Abraham: “[“Long rot bilong pikinini bilong yu,” NW] olgeta lain pipel long graun bai ol i askim mi long givim blesing long ol na mekim gut long ol.” (Stt. 22:18) Moses i bin tok profet olsem dispela Man bai kamap wanpela “profet” i winim Moses. (Lo 18:18, 19) God i bin tokim Devit, na bihain ol profet i bin strongim dispela tok olsem Mesaia bai kamap long lain bilong Devit, na em bai kisim wok king bilong Devit na wok king bilong en bai i stap oltaim oltaim.—2 Sml. 7:12, 16; Jer. 23:5, 6.
Ol Samting i Soim Olsem Jisas Em i Mesaia
7. Olsem wanem Jisas i kamap long rot bilong oganaisesen i olsem “meri” bilong God?
7 God i bin kisim Pikinini bilong em—fesbon bilong olgeta samting em i bin wokim—long meri bilong em, olsem oganaisesen bilong em long heven em olgeta ensel i insait long en, na salim em i kam long graun bilong kamap dispela “pikinini” bilong promis. Bilong mekim olsem, dispela wanpela Pikinini bilong God i mas “lusim” laip bilong em long heven na kamap olsem wanpela man i gutpela olgeta. (Fl. 2:5-7; Jo. 1:14) Holi spirit i “karamapim” Maria na dispela i makim olsem dispela pikinini em bai karim, “ol bai i kolim em Pikinini Bilong God.”—Lu. 1:35.
8. Olsem wanem Jisas i truim tok profet bilong Mesaia taim em i go kisim baptais long wara?
8 Ol tok profet bilong Mesaia i makim ples na taim em Jisas bai kamap long en. Olsem tok profet i makim, Jisas i bon long Betlehem. (Mai. 5:2) Long taim bilong ol aposel, planti Juda i bin wetim dispela samting. Ol i wetim Mesaia long kam, olsem na sampela i bin askim long Jon Bilong Baptais olsem: “Ating Jon em i dispela man God i makim bilong kisim bek ol manmeri bilong en?” Tasol Jon i tok: “Bihain bai wanpela man i kam, na strong bilong en i winim strong bilong mi.” (Lu. 3:15, 16) Taim Jisas i kam long Jon long Oktoba samting long 29 C.E. bilong kisim baptais taim em i gat 30 krismas, dispela em taim stret bilong em long kamap Mesaia. (Dan. 9:25) Na em i kirapim wok autim tok bilong em na i tok: “Taim God i makim em i kamap pinis, na Kingdom bilong God em i kam klostu pinis.”—Mk. 1:14, 15.
9. Maski ol disaipel bilong Jisas i no kliagut long olgeta samting, ol i gat wanem strongpela tingting?
9 Tasol ol manmeri i mas stretim tingting bilong ol long samting ol i wetim. I stret ol man i litimapim Jisas olsem King, tasol long dispela taim ol i no bin kliagut yet olsem em bai mekim wok king bilong em long bihain na em bai mekim dispela wok long heven. (Jo. 12:12-16; 16:12, 13; Ap. 2:32-36) Tasol maski i olsem, taim Jisas i tok, “Yupela yet i tok mi husat?,” wantu Pita i bekim tok olsem: “Yu dispela man God i bin makim bilong kisim bek ol manmeri bilong en. Yu Pikinini Bilong God i gat laip.” (Mt. 16:13-16) Pita i bin bekim wankain tok taim planti i lusim Jisas, long wanem, ol i no wanbel long tok bilong em.—Ritim Jon 6:68, 69.
Harim Tok Bilong Mesaia
10. Bilong wanem Jehova i tok yumi mas harim tok bilong Pikinini bilong em?
10 Long heven, dispela wanpela Pikinini Bilong God, em i wanpela strongpela ensel. Long graun, Jisas i stap olsem “mausman bilong Papa.” (Jo. 16:27, 28; NW) Em i tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam.” (Jo. 7:16) Taim bodi bilong Jisas i senis na kamap narakain, Jehova i strongim dispela tok olsem Jisas em i dispela Mesaia, na em i tok: “Harim tok bilong em.” (Lu. 9:35) Yes, yumi mas harim na bihainim tok bilong dispela Man God i Makim. Bilong mekim olsem yumi mas bilip na mekim ol gutpela wok—tupela samting wantaim i bikpela samting bilong amamasim God na bilong helpim yumi long kisim laip oltaim.—Jo. 3:16, 35, 36.
11, 12. (a) Bilong wanem ol Juda long taim bilong ol aposel i bin sakim Jisas olsem Mesaia? (b) Husat i bin bilip long Jisas?
11 Maski i gat planti samting tru i soim klia olsem Jisas em i dispela Mesaia, planti Juda long taim bilong ol aposel i bin sakim em. Bilong wanem? Long wanem, ol yet i gat narapela tingting long Mesaia, na ol i ting olsem em bai kamap dispela man husat bai kisim bek ol long han bilong hatpela gavman bilong Rom na mekim ol i stap fri. (Ritim Jon 12:34.) Olsem na ol i no orait long Mesaia husat i bin truim ol tok profet olsem ol man bai givim baksait long em, na bai ol i no laik lukim em, rabisim em, na em bai kisim ol kain kain hevi, na bihain ol man bai kilim em i dai. (Ais. 53:3, 5) Sampela gutpela disaipel bilong Jisas, ol tu i no amamas taim em i no laik kisim bek ol manmeri long han bilong hatpela gavman bilong Rom, tasol ol i stap gut long em, na bihain God i givim stretpela save long ol.—Lu. 24:21.
12 Narapela as na ol manmeri i sakim Jisas olsem Mesaia em God i bin promis long en, em ol tok em i skulim ol man long en. Planti man i hatwok long bilipim ol dispela tok, olsem: Bilong i go insait long Kingdom, man i mas “daunim laik bilong em yet,” “kaikai bodi” bilong Jisas na “dringim blut bilong em,” em i mas “kamap nupela gen,” na em “i no bilong dispela graun.” (Mk. 8:34; Jo. 3:3; 6:53; 17:14, 16) Ol man i gat pasin antap, ol maniman, na ol man bilong tupela maus, ol i ting i hatwok tumas long ol i bihainim ol dispela tok. Tasol ol Juda husat i gat pasin daun, ol i bilip olsem Jisas em i Mesaia, na sampela Samaria tu i bin bilip na ol i tok: “Dispela man tasol em i man bilong kisim bek olgeta manmeri bilong graun.”—Jo. 4:25, 26, 41, 42; 7:31.
13. Olsem wanem snek i kaikaim lek bilong Jisas olsem tok profet i makim?
13 Jisas i bin tok profet olsem ol bikpris bai mekim kot long em na ol man bilong narapela lain bai nilim em long diwai pos, tasol long de namba 3, em bai i kirap bek. (Mt. 20:17-19) Long taim em i sanap long ai bilong ol kaunsil na i tok olsem em i dispela “man God i makim” na em i “Pikinini Bilong God,” ol i tok em i tok bilas long God. (Mt. 26:63-66) Pailat i tok, Jisas ‘i no bin mekim wanpela rong inap long em i mas i dai,’ tasol ol Juda i tok em i laik kirapim pait long gavman, olsem na Pailat “i bihainim laik bilong ol na i givim Jisas long han bilong ol soldia.” (Lu. 23:13-15, 25) Em nau, ol i bin “givim baksait long em” na ol i stretim rot long kilim i dai dispela “namba wan man bilong bringim yumi long rot bilong laip,” maski i gat planti samting i soim klia olsem God i bin salim em i kam. (Ap. 3:13-15) Olsem tok profet i makim, ol i “kilim” Mesaia i dai taim ol i nilim em long diwai pos long De Pasova long 33 C.E. (Dan. 9:26, 27; Ap. 2:22, 23) Em i kisim bikpela pen na em i dai, na i olsem snek i kaikaim “lek” bilong em olsem Stat 3:15 i bin tok profet long en.
As na Mesaia i Mas i Dai
14, 15. (a) Wanem tupela samting i as na Jehova i larim Jisas i dai? (b) Jisas i mekim wanem bihain long em i kirap bek?
14 I gat tupela as na Jehova i bin larim Jisas i dai. Namba wan as em olsem: Pasin bilong Jisas long i stap gut long God i go inap long em i dai, dispela i kamapim klia wanpela bikpela samting bilong dispela “tok hait.” Em i kamapim long ples klia olsem man i gutpela olgeta, em inap tru long holimpas “pasin bilong givim bel tru long God” na stap gut long wok king bilong God maski Satan i putim ol bikpela traim long em. (1 Ti. 3:16, NW) Namba tu as em olsem: Jisas i tok, “Pikinini Bilong Man . . . i kam . . . bilong givim laip bilong em bilong baim bek planti manmeri.” (Mt. 20:28) Dispela pe bilong “baim bek” ol man, i pinisim strafe bilong sin em olgeta tumbuna pikinini bilong Adam i bin kisim long em, na dispela pe i opim rot long ol man husat i bilip long Jisas olsem em i rot bilong God long kisim bek ol manmeri, ol inap kisim laip oltaim.—1 Ti. 2:5, 6.
15 Krais i stap 3-pela de long matmat na bihain God i kirapim em bek, na inap 40 de em i kamap long ol disaipel bilong soim ol olsem em i stap laip gen, na em i tokim ol long sampela samting moa ol i mas mekim. (Ap. 1:3-5) Na bihain em i go antap long heven bilong givim pe bilong nambawan ofa bilong em long Jehova na em i wetim taim em Jehova i makim bilong em i ken kam i stap olsem King Mesaia. Namel long dispela haptaim em i wet i stap, i gat planti samting em i mas mekim.
Inapim Wok Bilong Em Olsem Mesaia
16, 17. Stori long wok bilong Jisas olsem Mesaia bihain long em i go antap long heven.
16 Kirap long taim Jisas i kirap bek, inap planti handet yia em i stiaim ol wok insait long kongrigesen Kristen, em dispela kongrigesen em i stap olsem King bilong en. (Kl. 1:13) Long taim God i makim, Jisas bai stat long yusim namba bilong em olsem King long Kingdom Bilong God. Ol tok profet bilong Baibel na ol samting i kamap long graun i kamapim long ples klia olsem, kirap long 1914 Jisas i kam i stap pinis olsem King na pasin bilong “dispela graun i laik pinis.” (Mt. 24:3; KTH 11:15) I no longtaim bihain long dispela, em i go pas long ol ensel holi na ol i rausim Satan na ol ensel nogut bilong em long heven.—KTH 12:7-10.
17 Jisas i kirapim wok bilong autim tok na skulim ol man long yia 29 C.E. na klostu nau dispela wok bai pinis. Klostu nau em bai jasim olgeta lain manmeri i stap laip. Na ol man i olsem sipsip em ol i bilip olsem em i rot bilong Jehova long kisim bek ol man, em bai tokim ol long “kisim kingdom Papa i bin redim na makim bilong [ol] . . . long taim graun i kamap nupela yet.” (Mt. 25:31-34, 41) Na ol man husat i sakim Jisas olsem King, ol bai bagarap olgeta taim em i go pas long ol ami bilong heven long pinisim olgeta pasin nogut. Na bihain Jisas bai pasim Satan long sen na tromoi em wantaim ol ensel nogut bilong em i go long “hul i no gat as.”—KTH 19:11-14; 20:1-3.
18, 19. Wok bilong Jisas olsem Mesaia bai kamapim wanem ol samting? Dispela bai kamapim wanem ol samting long ol man husat i bihainim tok bilong em?
18 Long Taim Bilong Wan Tausen Yia Bilong Krais i Stap King, Jisas bai inapim tru ol biknem bilong em, olsem “Man bilong givim gutpela tingting tru,” “God i gat bikpela strong,” “Papa bilong i stap oltaim oltaim,” na “King bilong kamapim gutpela sindaun na bel isi.” (Ais. 9:6, 7) Long rot bilong wok king bilong em insait long Kingdom, ol manmeri bai kamap gutpela olgeta, na ol manmeri em ol i bin i dai na em i kirapim bek ol, ol tu bai kamap gutpela olgeta. (Jo. 5:26-29) Mesaia bai bringim ol manmeri i go ‘long ol hul wara i gat wara bilong givim laip,’ na ol manmeri i gat pasin bilong bihainim tok, em bai helpim ol long stap bel isi wantaim Jehova. (Ritim KTH 7:16, 17.) Bihain long laspela traim, Jisas bai tromoi olgeta bikhetman, na Satan na ol ensel nogut bilong em “i go daun long bikpela hul i gat hatpela paia,” na i olsem Em i krungutim het bilong dispela “snek” na kilim em i dai.—KTH 20:10.
19 Man! Jisas i inapim gut tru wok bilong em olsem Mesaia! Graun bai kamap wanpela paradais na ol manmeri em God i bin baim bek ol, ol bai stap oltaim oltaim long en, na ol bai i gat gutpela helt tru na ol bai i stap amamas tru. Bai i no gat wanpela samting i nogutim nem holi bilong Jehova, na i stret tru olsem em i stap nambawan bos bilong heven na graun. Man! Ol gutpela samting tru i wetim ol man husat i bihainim tok bilong dispela Man God i Makim!
Yu Lukim Pinis Mesaia?
20, 21. I gat wanem as na yu mas tokim ol narapela long Mesaia?
20 Kirap long 1914 na i kam, yumi stap long dispela haptaim bilong pa·rou·siʹa bilong Krais, olsem kam i stap bilong em. Tru, ol man i no inap lukim long ai olsem em i kam i stap pinis olsem King bilong Kingdom Bilong God, tasol yumi luksave long dispela samting taim yumi lukim truim bilong ol tok profet. (KTH 6:2-8) Tasol maski i olsem, wankain olsem ol Juda long taim bilong ol aposel, planti man long nau i sakim ol mak i soim olsem Mesaia i kam i stap. Ol tu i laikim wanpela mesaia husat i insait long wok politik o husat bai i helpim ol long rot bilong ol hetman politik. Tasol yu kisim save olsem nau Jisas i mekim wok olsem King bilong Kingdom Bilong God. Olsem wanem? Yu bin amamas taim yu kisim save long dispela samting? Olsem ol disaipel long taim bilong ol aposel, ating bel bilong yu i kirapim yu long tok: “Mipela i lukim pinis Mesaia.”
21 Long nau taim yu stori wantaim ol narapela long tok i tru, yu save tokaut long wok bilong Jisas olsem Mesaia? Sapos yu mekim olsem, dispela bai helpim yu long pilim tru samting em i bin mekim bilong helpim yu, na ol samting em i wok long mekim long nau, na ol samting em bai inapim long bihain. Olsem Andru na Filip, ating yu bin tokim ol wantok na pren bilong yu long Mesaia. I gutpela sapos yu givim bel long kamapim klia long ol olsem Jisas Krais em i dispela Mesaia em God i bin tok promis long salim i kam, na em rot bilong God long kisim bek ol man.
Yu Inap Stori Long Dispela?
• Olsem wanem ol disaipel long taim bilong ol aposel i kisim save long Mesaia?
• Wanem tupela samting i stap olsem as na Jisas i dai?
• Jisas bai mekim wanem ol samting bilong inapim wok bilong em olsem Mesaia?
[Ol Piksa long pes 21]
Olsem wanem ol manmeri long taim bilong ol aposel i save olsem Jisas em i dispela Mesaia God i bin promis long salim i kam?
[Piksa long pes 23]
Taim yu toktok wantaim ol narapela, yu save tokaut long wok bilong Jisas olsem Mesaia?