Bilong Wanem Ol i Sakim Mesaia?

TAIM Jisas i stap long graun, planti manmeri i amamas tru long ol tok em i mekim, na ol i kirap nogut long ol mirakel em i wokim. Olsem na planti “ol i bilip long em” na ol i tingim em olsem em i dispela Mesaia, o Krais, Baibel i bin tok profet long en. Ol i tok: “Taim dispela man God i bin promis long salim i kam, em i kamap, ating em bai i wokim planti mirakel i winim ol mirakel dispela man hia i wokim?”​—Jon 7:31.

Maski i gat planti samting i kamapim ples klia olsem Jisas em i Mesaia, planti man husat i bin lukim Jisas na harim ol tok bilong em, ol i no bilip long em. Na sori tru, sampela em pastaim ol i bilip long em, bihain ol i lusim em. Maski i gat planti samting i kamapim klia olsem Jisas em i Mesaia, bilong wanem planti man i bin sakim em? Orait nau yumi ken skelim sampela as bilong dispela samting, na taim yumi mekim olsem, yu ken askim yu yet olsem: ‘Olsem wanem? Mi inap mekim wankain popaia long nau?’

Samting Ol i Wet Long En i No Kamap

Long taim bilong mama i karim Jisas, planti Juda i wetim Mesaia i kamap. Taim ol i bringim pikinini Jisas i go long tempel, ol man i bungim em ol i “wet long God i kisim bek ol manmeri bilong Jerusalem” long rot bilong Mesaia em God i bin promis long salim i kam. (Luk 2:38) Bihain, planti man husat i bin lukim ol wok bilong Jon Bilong Baptais, ol i tingting: “Ating Jon em i dispela man God i makim bilong kisim bek ol manmeri bilong en?” (Luk 3:15) Ol Juda bilong dispela taim bipo ol i ting Mesaia bai mekim wanem?

Long dispela taim bipo, planti Juda i bilip olsem Mesaia bai kam na helpim ol long lusim kalabus bilong i stap aninit long hatpela gavman bilong ol Rom, na kamapim bek kingdom bilong Israel long graun. Taim Jisas i no kirap yet long mekim wok bilong autim tok, sampela lida i bin kamap na ol i strong long ol man i mas mekim pait bilong daunim gavman na bai gavman i no ken bosim ol moa. Ating samting ol dispela man i bin mekim i stiaim tingting bilong ol man long ol samting ol i ting Mesaia bai mekim.

Jisas i narapela kain tru long ol dispela Mesaia giaman. Em i no wok long kirapim ol man long pait bilong daunim gavman​—em i skulim ol long laikim ol birua bilong ol na daun long gavman. (Matyu 5:​41-44) Taim ol man i laik mekim em i kamap king, em i sakim dispela wok. Em i skulim ol man olsem Kingdom bilong em “i no bilong dispela graun.” (Jon 6:15; 18:36) Tasol olkain tingting ol Juda i bin holim long ol samting Mesaia bai mekim, em i strongpela samting tru bilong stiaim tingting bilong ol.

Jon Bilong Baptais i bin lukim na harim ol samting i kamap olsem mirakel na i kamapim klia olsem Jisas em i Pikinini Bilong God. Tasol taim ol i kalabusim Jon, em i salim ol disaipel bilong em i go askim Jisas: “Ating yu dispela man God i bin promis long salim i kam, o mipela i mas wetim narapela?” (Matyu 11:3) Ating Jon i tingting olsem Jisas em i dispela Man Bilong Kisim Bek ol, em dispela man ol Juda i bilip na wet long en.

Ol aposel bilong Jisas i hatwok long kisimgut tok bilong em, olsem ol man bai kilim em i dai na bihain em bai kirap bek long matmat. Wanpela taim Jisas i toksave long ol olsem Mesaia i mas karim pen na i dai, olsem na Pita “i kisim Jisas i go long arere na i stat long krosim em.” (Mak 8:​31, 32) Pita i no kliagut yet long olsem wanem i dai bilong Jisas i stret wantaim wok em bai mekim olsem Mesaia.

Taim Jisas i go insait long Jerusalem klostu long taim bilong Pasova long 33 C.E., bikpela lain manmeri ol i kam bungim em na ol i amamas na singaut olsem em i King. (Jon 12:​12, 13) Tasol kwiktaim tru na ol samting i senis! Insait long dispela wik yet ol i holimpas Jisas na kilim em i dai. Taim Jisas i dai pinis, tupela disaipel bilong em i bel hevi na i tok: “Pastaim mipela i bin bilip olsem, Jisas em dispela man God i makim bilong kisim bek ol manmeri bilong Israel.” (Luk 24:21) Na taim Jisas i kirap bek pinis long matmat na i kamap long ol disaipel bilong em, ol i holim yet dispela tingting olsem Mesaia bai kamapim wanpela kingdom long graun. Ol i askim em: “Bikpela, ating nau long dispela taim bai yu mekim kantri Israel i kamap strong gen na i gat king i bosim em, o nogat?” I klia tru olsem ol tingting kranki long Mesaia i stap strong yet long bel na tingting bilong ol man i harim tok bilong Jisas.​—Aposel 1:6.

Taim Jisas i stap pinis long heven na holi spirit i kam daun long ol disaipel, ol i kliagut olsem Mesaia bai mekim wok olsem King long heven. (Aposel 2:​1-4, 32-36) Tupela aposel, em Pita na Jon, ol i autim tok strong olsem Jisas i bin kirap bek pinis na ol yet i wokim sampela mirakel bilong kamapim klia long ol man olsem God i helpim ol. (Aposel 3:​1-9, 13-15) Planti tausen manmeri long Jerusalem ol i harim tok na ol i kamap bilipman. Tasol ol hetman Juda i no amamas long dispela samting. Ol i bin biruaim Jisas, na olsem tasol nau ol i biruaim ol aposel na ol disaipel bilong em. Bilong wanem ol bikman bilong lotu Juda ol i birua nogut tru na sakim Jisas?

Ol Bikman Bilong Lotu i Sakim Em

Taim Jisas i kam daun long graun, lotu Juda i lusim pinis planti tok na pasin em buk bilong God i skulim ol man long en. Ol hetman bilong lotu long dispela taim bipo​—em ol Sadyusi, Farisi, na ol saveman bilong lo​—ol i bihainim ol tok na pasin bilong ol tumbuna, na putim ol i go pas long Tok Bilong God. Planti taim ol i sutim tok long Jisas olsem em i brukim Lo, long wanem, em i save wokim ol mirakel long Sabat. Tasol em i sakim strong ol tok bilong ol em Baibel i no as bilong en, na long dispela rot em i daunim namba bilong ol na tok bilong ol olsem God i orait long ol. Tasol Jisas i bin kamap insait long wanpela famili i no gat nem, na em i no bin go long ol bikpela skul bilong lotu olsem ol i bin mekim. Olsem na ol dispela man i gat pasin antap na ol i hatwok long tokaut olsem Jisas em i Mesaia! Ol dispela tok Jisas i sutim long ol i mekim ol i belhat nogut tru na ol i “bung na wokim toktok bilong painim rot long kilim Jisas i dai.”​—Matyu 12:​1-8, 14; 15:​1-9.

Tasol ol bikman bilong lotu ol i tok wanem long ol dispela mirakel Jisas i wokim? Ol i no tok olsem ol dispela mirakel i no bin kamap, nogat. Tasol ol i laik daunim bilip bilong ol man long Jisas na ol i tokim ol olsem Jisas i kisim dispela strong long Satan yet. Ol i tok: “Dispela man i save rausim ol spirit nogut long strong bilong Belsebul tasol, em hetman bilong ol spirit nogut.”​—Matyu 12:24.

I gat narapela as na ol i nolaik tru long tokaut olsem Jisas em i Mesaia. Taim Jisas i kirapim bek Lasarus, ol bikman bilong ol narapela narapela lain bilong lotu ol i bung wantaim na ol i tok: “Bai yumi mekim wanem? Dispela man i save wokim planti mirakel. Sapos yumi larim em i mekim dispela kain pasin, orait bai olgeta manmeri bai i bilip long em. Na ol Rom bai i kam na bagarapim tempel bilong yumi wantaim ol lain bilong yumi.” Ol bikman bilong lotu ol i pret, nogut ol Rom i tekewe bikpela strong na namba bilong ol, olsem na ol i pasim tok long kilim i dai Jisas na Lasarus wantaim!​—Jon 11:​45-53; 12:​9-11.

Ol i Tingting Nogut na Mekim Nogut Long Em

Long dispela taim bipo, tingting bilong ol hetman bilong lotu Juda i mekim na ol man i no laik bilip olsem Jisas em i Mesaia. Ol dispela hetman i hambak long bikpela namba bilong ol, na ol i tok bilas na daunim ol man i bilip long Jisas, na ol i tok: “Ating long lain bilong mipela ol hetman na ol Farisi, yupela i lukim wanpela man i bilip long em? Nogat tru.” (Jon 7:​13, 48) Tru, sampela hetman bilong lotu Juda, olsem Nikodemus na Josep bilong Arimatea, ol i bin kamap disaipel bilong Jisas, tasol ol i haitim bilip bilong ol, long wanem, ol i pret. (Jon 3:​1, 2; 12:42; 19:​38, 39) Ol hetman bilong lotu Juda i bin pasim tok pinis olsem, “sapos wanpela man i tokaut olsem Jisas em i dispela man God i makim bilong kisim bek ol manmeri bilong en, orait ol i mas tambuim em long kam lotu wantaim ol.” (Jon 9:22) Ol man bai givim baksait long em na rausim em long lain bilong ol.

Ol man i bin birua long ol aposel na ol disaipel bilong Jisas na dispela i mekim na bihain ol i kirap mekim nogut tru long ol. Ol aposel i strong long autim tok, olsem na ol i kisim nogut long han bilong ol kaunsil bilong haus kot bilong ol Juda. (Aposel 5:40) Ol birua i sutim tok giaman long disaipel Stiven na tok em i bin tok bilas long God. Kaunsil i tok em i gat asua na ol i tromoi ston long em na kilim em i dai. Em nau, “ol i stat long mekim nogut tru long ol manmeri bilong sios i stap long Jerusalem. Olsem na olgeta manmeri bilong sios i ranawe i go nabaut long olgeta hap bilong distrik Judia na Samaria. Tasol ol aposel i stap yet long Jerusalem.” (Aposel 6:​8-14; 7:54–8:1) Sol, bihain em i kamap aposel Pol, em i insait long wanpela wok bilong mekim nogut long ol disaipel, na “hetpris wantaim olgeta kaunsil bilong ol hetman” ol i givim tok orait long dispela.​—Aposel 9:​1, 2; 22:​4, 5.

Maski dispela taim nogut i painim ol Kristen, lotu Kristen i wok long go bikpela hariap insait long ol yia bihain long taim Jisas i dai. Planti tausen i bin kamap bilipman, tasol ol Kristen i stap yet olsem wanpela liklik lain namel long ol lain bilong Palestain long taim bilong ol aposel. Sapos man i kamapim long ples klia olsem em i wanpela disaipel bilong Krais, ol man bai givim bikpela hevi long em o bagarapim em.

Pasin Bilong Ol Long Sakim Jisas i Mas Skulim Yumi

Olsem yumi lukim pinis, ol tingting kranki, pasin bilong pret long ol wanlain, na mekim nogut long ol lain bilong Jisas, dispela i bin pasim planti manmeri long taim bilong ol aposel long bilip long Jisas. Long nau, ol tingting kranki long Jisas na ol tok bilong em, dispela inap mekim wankain samting long ol man. Olsem: Ol lotu i bin skulim planti man olsem Kingdom Bilong God em samting i stap long bel bilong ol, o em bai kamap long wok bilong ol man. Na sampela i save tingim saiens o ol nupela kain samting ol i wokim i olsem rot bilong stretim ol hevi bilong graun, olsem na ol i no gat wok long bilip long Mesaia. Planti man bilong sutim tok long Baibel long nau, ol i tok ol wok bilong Jisas em Baibel i stori long en i no bin kamap tru long bipo; long dispela rot ol i daunim bilip bilong ol man olsem Jisas em i Mesaia.

Ol dispela kain tingting i mekim na planti man i paul long wok bilong Mesaia, na ol i ting olsem i no gat wok long skelim dispela samting. Tasol long ol manmeri i gat laik long skelim ol samting i bin kamap, i gat planti samting long nau i kamapim klia olsem Jisas em i Mesaia, winim ol samting i stap long taim bilong ol aposel. Long nau yumi gat Ol Skripsa Hibru olgeta, i gat planti tok profet long ol samting Mesaia bai mekim, na i gat ol Gutnius long Baibel i stori long ol samting Jisas i bin mekim bilong truim ol dispela tok profet.a

I gat planti samting i stap ples klia na bai yumi olgeta wan wan inap skelim gut na makim wanem samting yumi laik bilip long en. Na yumi mas hariap long wokim disisen long dispela samting. Bilong wanem? Long wanem, Baibel i kamapim klia olsem klostu nau na Jisas, em King Mesaia bilong Kingdom Bilong God, em bai kirap mekim ol samting bilong pinisim olgeta man i wok long bagarapim graun, na em bai kamapim stretpela wok gavman i givim rot long olgeta manmeri i bihainim tok bilong God long i stap oltaim oltaim long graun i kamap olsem paradais. (Daniel 2:44; KTH 11:​15, 18; 21:​3-5) Yu inap i stap long dispela gutpela taim tru bai kamap bihain sapos nau yu wok strong long kisim save long Jisas na kamapim klia olsem yu bilip long em. Tingim gut long bel tok bilong Jisas yet, olsem: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol . . . bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”​—Jon 3:16.

[Futnot]

[Rait long pes 20]

Sapos yu bin stap long taim bilong Jisas, yu ting bai yu luksave long Mesaia?

[Piksa long pes 21]

Yu no ken larim sampela tingting yu holim pinis i pasim yu long kisim stretpela save long Jisas