Bodi Bilong Man Inap Stretim Em Yet

I GAT planti samting i helpim yumi long stap laip. Wanpela em olsem, taim bodi i bagarap o sua i kamap, kwiktaim em inap mekim ol wok bilong stretim em yet.

Tingim: Ol sel long bodi i mekim planti wok bilong helpim bodi long stretim em yet.

• Ol pletlet em liklik hap bilong blut we i save bung long hap sua i kamap. Ol i kamap planti na bai ol i inap stretim gen ol rop bilong blut i bagarap.

• Man inap pilim pen long hap sua i kamap, long wanem, sua i ret na skin i solap. Bodi i mekim olsem bilong rausim ol pipia samting long sua.

• Insait long sampela de sua i drai. Na bodi i stretim ol rop bilong blut na blut i ken ron gut long bodi.

• Na taim sua i drai pinis, nupela skin i kamap bilong helpim hap bodi i bagarap long kamap strong gen.

Ol saveman i painimaut olsem bodi i save kamapim planti pletlet bilong stretim ol rop bilong blut. Olsem na ol i wokim ol plastik samting we inap stretim em yet sapos i gat bagarap long en. Ol dispela plastik i gat ol liklik tiub na i gat 2-pela marasin insait long ol tiub. Taim plastik i bagarap ol marasin long ol tiub i save kam ausait. Taim ol marasin i bung, ol i kamapim samting olsem glu bilong pasim ol hap bilong plastik i gat bruk o bagarap. Na taim glu i drai na kamap strong, em i pasim hap we plastik i bruk na plastik i luk nupela gen. Wanpela saveman i tok, ol man i traim long wokim ol plastik samting we i no inap long bagarap. Na dispela i wankain long pasin bilong bodi long stretim em yet taim sua samting i kamap.

Yu ting wanem? Samting bodi i mekim bilong stretim em yet i kamap long rot bilong evolusen? O wanpela i bin wokim?