Kisim Ol Pren Long Ol Narapela Lain

Hevi

Sapos yumi stap longwe long lain em yumi gat tingting kranki long ol, yumi inap strongim pasin bilong bel nogut long narapela lain. Na sapos yumi kisim ol pren husat i wankain long yumi, ating bai yumi ting olsem pasin bilong yumi long wokim tingting, pilim samting, na mekim ol samting, dispela tasol i stret.

Stiatok Bilong Baibel

“Mekim pasin laikim long bel bilong yupela i go bikpela moa.” —2 KORIN 6:13

Dispela i makim wanem samting? “Bel” bilong yumi i makim filings na laik bilong yumi. Sapos yumi laikim tasol lain i wankain long yumi, bel bilong yumi i holim bek pasin laikim. Bilong abrusim dispela hevi, yumi mas amamas long mekim pren wantaim ol narapela lain i no wankain long yumi.

Kisim Ol Pren Long Ol Narapela Lain Dispela Bai Helpim Yu

Taim yumi save gut long ol narapela, yumi bai kliagut long risen na ol i gat narapela pasin bilong mekim ol samting. Na taim yumi pas gut wantaim ol, yumi bai lukim ol olsem ol i wanlain bilong yumi. Yumi bai tingim ol moa, na amamas na bel hevi bilong ol i olsem bilong yumi yet.

Tingim eksampel bilong Nazaré. Pastaim em i save bel nogut long ol man bilong narapela lain i kam sindaun long kantri bilong em. Em i stori long samting i bin helpim em: “Mi save stap wantaim ol na wok wantaim ol. Mi bungim ol man em pasin bilong ol i narapela kain olgeta long ol samting em ol man long komiuniti i tok ol i save mekim. Taim yu poroman wantaim ol man bilong narapela kalsa, yu luksave olsem pasin bilong ol i no wankain olsem tok ol man i mekim, na yu kirap long laikim na tingim ol wan wan.”

Samting Yu Ken Mekim

Painim rot long toktok wantaim ol man bilong narapela kantri, lain, o tokples. Yu ken

Askim ol long stori liklik long ol yet.
Singautim ol long kaikai wantaim yu.
Harim stori bilong ol, na painimaut wanem samting i bikpela samting long ol.

Sapos yu kliagut long ol samting i bin painim wanpela lain na i helpim ol long kisim ol gutpela pasin, ating yu bai kisim stretpela tingting long ol man bilong dispela lain.

Wanpela Stori Tru: Kandasamy na Sookammah (Kanada)

“Mipela i kamap bikpela long Saut Afrika long taim we i gat pasin birua namel long ol waitskin na blakskin. Ol i fosim ol man bilong kain kain skin long stap long komiuniti bilong ol yet, na dispela i kirapim pasin bilong bel nogut long ol man bilong narapela skin. Mipela i no waitskin, na mipela i no laikim ol waitskin, long wanem, sampela i mekim pasin long mipela olsem mipela i samting nating. Long dispela taim, mipela i no ting olsem mipela i gat pasin bilong bel nogut long narapela lain. Mipela i ting olsem mipela i karim hevi bilong dispela pasin.

“Bilong senisim tingting bilong mipela, mipela i kirap kisim ol pren bilong narapela narapela bekgraun. Taim mipela i bung wantaim ol waitskin, mipela i luksave olsem planti samting long ol na mipela i wankain. Mipela olgeta i karim wankain hevi long laip.

“Na tu, rot i op na mipela i kisim tupela marit waitskin na ol i stap long haus bilong mipela inap longpela taim. Na mipela i kisimgut save long ol. I no longtaim na mipela i tingim mipela yet olsem ol pren na mipela i wankain. Olsem na, mipela i stat long kisim stretpela tingting long ol waitskin.”