Yu Inap Kisim Savetingting
“God em i as bilong olgeta tok i stap long Rait Holi.” (2 Timoti 3:16) Dispela i makim olsem God i Gat Olgeta Strong i givim tingting bilong em long ol man bilong raitim Baibel.
God i Singautim Yu Long Kisim Helpim Long Savetingting Bilong Em
“Mi Jehova, mi . . . save skulim yupela long ol samting we inap helpim yupela, mi tasol mi save stiaim yupela long rot yupela i mas wokabaut long en. Sapos yupela i putim gut yau long ol lo bilong mi, orait bel isi bilong yupela bai kamap olsem wara i save ron na stretpela pasin bilong yupela bai kamap olsem ol weiv bilong solwara.”—AISAIA 48:17, 18.
Yu ken tingim olsem ol dispela tok em invatesen i kam long God. Em i laik bai yu stap bel isi na stap amamas oltaim, na em inap helpim yu long kisim ol dispela samting.
Yu Inap Kisim Savetingting Bilong God
“Long olgeta kantri, ol i mas autim gutnius pastaim.”—MAK 13:10.
Dispela “gutnius” i makim tu ol tok promis bilong Jehova long pinisim pen na hevi, long mekim graun i kamap paradais, na kirapim bek ol famili na pren bilong yumi i dai pinis. Ol Witnes Bilong Jehova i autim dispela tok em Baibel i as bilong en long olgeta hap bilong graun.