Stadi 21

Kirapim Ol Man Long Bilipim Tok

¹ Taim yumi mekim tok yumi laik bai ol man i putim yau long dispela tok na ol i bilipim na ol i bihainim. Yu mas mekim tripela samting bambai ol i ken mekim olsem: (1) Ol tok yu kamapim i mas i gat as bilong en; (2) yu mas stretim gut as bilong tok; (3) yu mas kamapim gut as bilong tok.

² Tok bilong yu i mas i gat as bilong en bambai man i harim em i ken bilipim. Yu mas kamapim gut as bilong tok na bai ol man i ken save tok bilong yu i stret na yu no giaman.

³ Wokim as bilong tok. Yu mas kolim klia dispela bikpela tok yu laik stori long en. Gutpela sapos yu save long tingting bilong ol man bilong harim​—ol i ting olsem wanem long dispela tok yu mekim? Ol i save pinis long en o em nupela tok long ol? Kamapim gut ol lo Kristen na putim gut long tingting na bel bilong ol man bilong harim.

⁴ Kamapim gut as bilong tok. Yu no ken kolim nating wanpela tok; mas kamapim gut as bilong en. Taim yu kolim wanpela tok, ating ol man bai askim olsem: “Dispela tok i stret olsem wanem?” Yu mas redim gut tok bambai yu ken bekim tok olsem: “Long wanem . . . ”

⁵ Bilong helpim ol man long bilipim tok bilong yu, yu ken kamapim tok bilong wanpela man em ol man i save bilip long em na em i bin tok stret. Planti taim yu ken kamapim tok bilong Jehova, olsem i stap long Baibel, na dispela tok bai helpim tok bilong yu, na ol man i ken bilipim. Tasol sapos ol i no bilip long Baibel, pastaim yu mas helpim ol na bai ol i ken save tok bilong Baibel i stret na em i tok bilong God yet.

⁶ Sapos yu kamapim tok bilong wanpela man o tok bilong Baibel, yu no ken kolim hap tok tasol bilong en na paulim tok; yu mas kamapim stret tok. Ol tok yu mekim i mas i gat gutpela as bilong en bambai yu inap kirapim ol man long bilipim na bihainim tok bilong yu.

⁷ Gutpela rivyu. Taim yu mekim pinis bilong tok, yu ken kolim gen as bilong tok na bilong wanem yumi inap bilipim dispela tok.

⁸ Yu mas kamapim gut ol bikpela tok bambai ol man i ken save yu yet yu bilipim dispela tok na bai ol tu i ken bilipim. Sapos yu mekim klia ol tok na ol i bihainim, bai ol inap lainim narapela man long dispela tok.

⁹ Yu mas kamapim gut ol tok bambai ol man i ken wanbel wantaim tok bilong yu. Yu mas save long tingting bilong ol, ol i ting olsem wanem long dispela samting. Pol i bin mekim olsem; lukim Aposel 17:​22-31.

¹⁰ No ken kamapim planti tok tumas. No ken toktok hariap. Taim yu kamapim wanpela bikpela tok, stori gut long en. Askim olsem: Bilong wanem? Olsem wanem? Long wanem taim? Na bekim ol dispela askim insait long tok. Sapos yu mekim olsem, bai yu helpim ol man long kisim gut ol dispela tok. Taim yu kolim wanpela lo, mekim wanpela tok piksa bilong kamapim gut dispela lo. Tasol no ken pulim tok i go bikpela na kalapim minit bilong en.

¹¹ Sapos yu givim planti askim long ol man, bai yu kirapim tingting bilong ol. Taim yu kamapim pinis wanpela bikpela tok, lukim pes bilong ol man​—ol i kisim gut o nogat? Sapos nogat, orait, stori moa long dispela tok. Helpim ol bambai ol i ken save tok bilong yu i bikpela samting na ol i mas bihainim. Sapos ol i bilipim tru tok bilong yu ol bai bihainim.