Aisak i Kisim Gutpela Meri

YU SAVE dispela meri long piksa em i husat? Nem bilong em Rebeka. Na dispela man em i kam bungim, em Aisak. Rebeka bai kamap meri bilong Aisak. Olsem wanem dispela samting i kamap?

Papa bilong Aisak, em Abraham, em i laik kisim wanpela gutpela meri bilong pikinini bilong em. Em i no laik bai Aisak i maritim wanpela meri Kenan, long wanem, ol dispela lain i save lotuim ol giaman god. Olsem na Abraham i singautim wokboi bilong em na i tok: ‘Mi laik bai yu go bek long ples ol lain bilong mi i stap long en long Haran na kisim wanpela meri bilong pikinini bilong mi Aisak.’

Kwiktaim wokboi bilong Abraham i kisim tenpela kamel na em i wokabaut i go long dispela longwe ples. Taim em i kamap klostu long hap ol wanblut bilong Abraham i stap long en, em i malolo long wanpela hulwara. Em apinun pinis, na long dispela taim ol meri i save kam kisim wara. Olsem na wokboi bilong Abraham i beten long Jehova na i tok: ‘Meri i givim wara long mi na ol kamel bilong mi, orait mi laik bai dispela meri yu makim bilong Aisak.’

Liklik taim bihain Rebeka i kam bilong kisim wara. Taim wokboi bilong Abraham i askim Rebeka long givim wara long em, Rebeka i mekim olsem. Na em i givim wara long olgeta kamel. Em i hatwok, long wanem, ol kamel i save dring planti wara.

Taim Rebeka i mekim pinis dispela wok, wokboi bilong Abraham i askim em long nem bilong papa bilong em. Na em i askim Rebeka tu long em inap slip long haus bilong ol long dispela nait. Rebeka i tok: ‘Mi pikinini bilong Betuel na yu ken i stap wantaim mipela.’ Wokboi bilong Abraham i save olsem Betuel em i pikinini bilong brata bilong Abraham, em Nahor. Olsem na em i brukim skru na tenkyu long Jehova i bin stiaim em i go long lain bilong Abraham.

Long dispela nait, wokboi bilong Abraham i tokim Betuel na Laban, em brata bilong Rebeka, long as na em i kam. Tupela wantaim i wanbel long Rebeka i ken i go wantaim em na maritim Aisak. Rebeka i tok wanem taim ol i askim em? Em i tok: ‘Yes, bai mi go.’ Olsem na long neks de ol i kalap long ol kamel na bihainim longpela rot i go bek long Kenan.

Em apinun taim ol i kamap long Kenan. Rebeka i lukim wanpela man i wokabaut i stap. Em Aisak. Aisak i amamas long lukim Rebeka. Mama bilong em, Sara, em i dai inap tripela yia i go pinis na Aisak i wari yet long dispela. Tasol nau Aisak i laikim tru Rebeka, na em i amamas gen.