Skulim Ol Pikinini Bilong Yu

Rebeka i Redi Long Amamasim Jehova

REBEKA em nem bilong planti meri long nau. Yu save long sampela husat i gat dispela nem?​—a Rebeka em wanpela meri i gat nem na stori bilong em i stap long wanpela buk em planti man i save long en, em Baibel. Yu save long sampela stori bilong em?​— Yumi mas i gat laik long kisim save long Rebeka, long wanem, pasin bilong em inap helpim yumi long lotuim God tru, em Jehova.

Rebeka em namba 2 meri em Baibel i kolim nem bilong em na em i kamap meri i lotu tru long Jehova. Yu save husat em i namba wan meri em Baibel i kolim em olsem meri i lotu tru long Jehova?​— Em Sara, meri bilong Abraham. Taim Sara i lapun, em i kamap mama bilong Aisak​— em i gat dispela wanpela pikinini tasol. Yumi ken stori nau long olsem wanem Rebeka i redi long mekim samting i amamasim Jehova na olsem wanem em i bungim Aisak.

Winim 60 yia i lus bihain long taim God i tokim Abraham na Sara long lusim Haran na i go sindaun long Kenan. Taim Abraham na Sara i kamap lapun, God i tok promis olsem tupela bai kamapim wanpela pikinini na ol i mas kolim em Aisak. Yu ken save olsem tupela i laikim tumas Aisak. Sara i dai taim em i gat 127 krismas, na long dispela taim pikinini bilong em, Aisak, i bikpela man pinis na em i bel sori tru long mama i dai. Abraham i no laik bai Aisak i maritim wanpela meri Kenan, long wanem, ol lain Kenan i no lotuim Jehova. Olsem na em i salim wokman bilong em Elieser long i go long Haran, em ples we ol wanblut bilong Abraham i stap long en, na em i mas makim wanpela meri long dispela hap long kamap meri bilong Aisak. Haran i stap longwe tru inap olsem 800 kilomita!​—Stat 12:​4, 5; 15:2; 17:​17, 19; 23:1.

Orait Elieser i redim ol samting na em i go kamap long Haran; em i go wantaim sampela arapela wokboi bilong Abraham na 10-pela kamel i karim ol kago na ol presen bilong givim long meri husat bai kamap meri bilong Aisak. Ol i kamap long hulwara na ol i malolo liklik, long wanem, Elieser i save olsem long apinun ol manmeri bai kam bilong kisim wara bilong famili na bilong ol animal. Orait nau Elieser i beten olsem: Mi bai askim ol meri long givim mi wara bilong dring, na sapos wanpela bilong ol i bekim tok olsem: “Yu dring, na bai mi givim wara long ol kamel bilong yu tu,” orait mi bai makim em long maritim Aisak.

Ol samting i kamap stret olsem em i bin beten long en! Yangpela meri Rebeka i kam long hulwara, na “em i naispela meri tru.” Taim Elieser i askim em long givim em wara bilong dring, em i tok: “Bai mi givim wara long ol kamel bilong yu tu.” Na Rebeka “i ran i go bek bilong pulimapim wara gen,” na Elieser i kirap nogut na “lukluk tasol i stap.” Tingim! Bilong pinisim nek drai bilong 10-pela kamel, Rebeka i mas pulimapim wara inap olsem 1,000 lita!

Elieser i givim ol naispela presen long Rebeka, na em i kisim save olsem em i pikinini meri bilong Betuel, em wanblut bilong Abraham. Rebeka i tokim Elieser na ol pren bilong em long i go “slip” long haus bilong papa bilong em. Na em i ran i go bilong toksave long famili long ol dispela lain em Abraham i bin salim ol i kam long Kenan.

Taim Laban, em brata bilong Rebeka, i lukim ol dispela presen na kisim save long Elieser em i husat, em i singautim Elieser i go insait long haus. Tasol Elieser i tok: “Mi no ken kaikai kwik. Mi mas autim tok bilong mi pastaim.” Na em i tokim ol long as na Abraham i salim em i kam. Betuel wantaim meri bilong em, na Laban, ol i amamas na orait long dispela marit i ken kamap.

Taim ol i kaikai pinis, Elieser wantaim lain bilong em ol i slip. Long moningtaim, Elieser i tok: “Mi laik i go bek long bikman bilong mi.” Tasol mama bilong Rebeka na brata bilong em i laik bai ol i stap liklik taim moa inap “10-pela de samting.” Taim ol i askim Rebeka sapos em i redi long i go, em i tok, “Yes, bai mi go.” Em i no westim taim, em i kirap na bihainim Elieser na ol i go. Taim ol i kamap long Kenan, em i maritim Aisak na kamap meri bilong em.​— Stat 24:​1-58, 67.

Rebeka i lusim famili na ol pren na em i go long wanpela longwe ples, na em i save olsem ating em i no inap lukim gen famili bilong em. Yu ting i isi long mekim olsem?​— Nogat, em i no isi. Tasol Rebeka i redi long mekim samting i amamasim Jehova, na em i kisim blesing. Em i kamap wanpela tumbuna mama bilong Seivia bilong yumi, em Jisas Krais. Yumi tu bai kisim blesing sapos yumi redi long mekim samting i amamasim Jehova.​—Rom 9:​7-10.

[Futnot]

OL ASKIM:

▪ Rebeka em i husat? Elieser i bungim em long wanem hap?

▪ Bilong wanem Abraham i no laik bai Aisak i maritim wanpela meri Kenan?

▪ Olsem wanem Rebeka i soim olsem em inap kamap gutpela maritmeri?

▪ Yumi mas mekim wanem bilong bihainim pasin bilong Rebeka?