San i Sanap i Stap

LUKIM Josua. Em i tok: ‘San, yu sanap i stap!’ Na san i sanap i stap. Em i stap namel stret long skai inap wanpela de olgeta. Jehova i mekim dispela samting i kamap! Tasol nau yumi ken kisim save bilong wanem Josua i laik bai san i lait yet i stap.

Taim dispela 5-pela king nogut bilong Kenan i kirap long pait long ol Gibeon, ol Gibeon i salim wanpela man i go bilong askim Josua long helpim ol. Em i tok: ‘Kam kwiktaim long mipela! Helpim mipela! Olgeta king bilong ples maunten i kam bilong pait long mipela ol wokboi bilong yupela.’

Kwiktaim Josua na ami bilong em i go. Inap wanpela nait olgeta ol i wokabaut. Taim ol i kamap long Gibeon, ol soldia bilong dispela 5-pela king i pret na ol i kirap ranawe. Nau Jehova i salim ol traipela ston ais i kam daun na kilim i dai planti soldia moa, winim ol soldia em ami bilong Josua i kilim ol i dai.

Josua i lukim olsem klostu nau san bai i go daun. Tudak bai kamap, na planti soldia bilong ol dispela 5-pela king bai i ranawe. Olsem na Josua i beten long Jehova na em i tok: ‘San, yu sanap i stap!’ Na taim san i lait i stap yet, ol Israel i pinisim ol birua na winim dispela pait.

I gat planti moa king nogut long Kenan em ol i birua long lain bilong God. Bihain long 6-pela yia samting Josua na ami bilong em i daunim 31 king bilong Kenan. Taim ol i daunim pinis ol dispela king, nau Josua i tilim graun Kenan long ol lain Israel em ol i no kisim yet hap graun.

Planti yia i lus, na bihain Josua i dai taim em i gat 110 krismas. Taim em na ol pren bilong em i stap yet, ol manmeri i bihainim tok bilong Jehova. Tasol taim ol dispela gutpela man i dai, ol manmeri i kirap mekim ol pasin nogut na hevi i painim ol. Long dispela taim ol i mas kisim helpim long God.