Jehosafat i Bilip Long Jehova

YU SAVE ol dispela man i husat? Ol i mekim wanem? Ol i go long pait, na ol man i go paslain ol i singsing. Tasol ating bai yu tok: ‘Bilong wanem na ol man bilong singsing i no gat bainat na spia bilong pait?’ Orait nau yumi ken stori long en.

Jehosafat em i king bilong tupela lain bilong Israel. Em i bin stap long wankain taim em King Ahap na Jesebel i bosim ol 10-pela lain bilong Israel long hap not. Tasol Jehosafat em i gutpela king, na papa bilong em Asa, em tu i gutpela king. Olsem na inap planti yia tupela lain bilong Israel long hap saut i gat gutpela sindaun.

Tasol nau wanpela samting i kamap na i mekim ol manmeri i pret. Sampela man i kam long Jehosafat na ol i tokim em olsem: ‘Bikpela lain ami bilong ol Moap, Amon, na maunten Seir ol i kam bilong pait long yu.’ Planti Israel i go bung long Jerusalem bilong askim Jehova long helpim ol. Ol i go long haus lotu, na Jehosafat i beten na tok: ‘O Jehova, yu God bilong mipela, mipela i no save bai mipela i mekim wanem. Mipela i no gat strong bilong pait long dispela bikpela lain ami. Mipela i lukluk long yu tasol long helpim mipela.’

Jehova i harim beten bilong Jehosafat, na long rot bilong wanpela wokman Jehova i tokim ol manmeri olsem: ‘Dispela pait em i no bilong yupela, nogat, em i pait bilong God. Yupela i no inap mekim pait. Yupela sanap tasol na lukim Jehova i helpim yupela.’

Olsem na long de bihain long moningtaim Jehosafat i tokim ol manmeri: ‘Yupela i mas bilip strong long Jehova!’ Orait nau em i putim ol man bilong singsing i go paslain long ol soldia, na taim ol i wokabaut i go, ol i mekim ol singsing bilong litimapim nem bilong Jehova. Yu save wanem samting i kamap taim ol i go klostu long ples bilong pait? Jehova i mekim na ol birua i pait namel long ol yet. Na taim ol Israel i go kamap, olgeta soldia long lain bilong ol birua i dai pinis!

Man! Jehosafat i bihainim savetingting na em i bilip long Jehova, a? Yumi tu bai bihainim savetingting sapos yumi bilip long Jehova.