Jehova i Difendim Jehosafat

Jehosafat, king bilong Juda, i bagarapim ol alta bilong Bal na ol imis long dispela hap. Em i laik bai ol manmeri i save long ol lo bilong Jehova. So em i salim ol ofisa na ol Livai i go long olgeta hap bilong Juda long skulim ol manmeri long ol lo bilong Jehova.

Ol kantri i stap klostu i pret long pait long Juda bikos ol i save Jehova i stap wantaim lain bilong em. Ol i bringim tu ol presen i kam long King Jehosafat. Tasol bihain ol Moap, ol Amon, na ol lain i sindaun long ol hap bilong Seir ol i kam pait long Juda. Jehosafat i save em i nidim helpim bilong Jehova. Em i singautim olgeta man, meri na ol pikinini i kam bung long Jerusalem. Na long ai bilong ol em i beten: ‘Jehova, mipela i no inap winim ol, mipela i lukluk long yu helpim mipela. Plis tokim mipela long samting mipela bai mekim.’

Jehova i harim beten bilong ol na tok: ‘Yupela i no ken pret. Bai mi helpim yupela. Yupela i mas kisim ples bilong yupela, na sanap tasol, na lukim mi seivim yupela.’ Hau Jehova i bin seivim ol?

Long neks moning, Jehosafat i makim ol singa na tokim ol long mats long fran bilong ami. Ol i mats kirap long Jerusalem i go long ples bilong pait ol i kolim Tekoa.

Taim ol singa i amamas na preisim Jehova long strongpela nek, Jehova i mekim pait bilong helpim ol manmeri bilong em. Em i mekim ol Amon na ol Moap i paul na kirap pait na kilim i dai narapela narapela, na no gat wanpela i abrusim bagarap. Tasol Jehova i protektim ol manmeri bilong Juda, ol soldia, na ol pris. Olgeta manmeri long ol kantri i stap klostu i harim samting Jehova i bin mekim, na ol i save Jehova i difendim yet ol manmeri bilong em. Olsem wanem Jehova i seivim ol manmeri bilong em? Em i seivim ol long kain kain rot. Em i no nidim ol man long helpim em.