Sapta 18
Yu Stap Gut Long Nupela King Bilong Bosim Graun?
LONG Naisan 9 long yia 33 C.E., Krais Jisas i kam long ol Juda olsem King bilong ol, em i dispela Krais Baibel i bin tok profet long em. Em i lusim Maunten Oliv i kam long Jerusalem, na bikpela lain disaipel ol i amamas long em na litimapim nem bilong God long ol strongpela wok Jisas i bin mekim. (Luk 19:37, 38; Sekaraia 9:9) Tasol olsem wanem? Bai ol i stap gut long dispela man ol i amamas long em olsem King bilong ol? I no longtaim na traim i painim ol long dispela samting.
2 Kirap long yia 1914 na i kam inap long nau Krais Jisas i bin mekim wok king. Em i nupela King bilong bosim graun. Sampela manmeri bilong olgeta lain ol i amamas, long wanem nau ol inap kisim laip aninit long wanpela gavman Krais i bosim, em dispela gavman inap stretim tru hevi bilong ol man. Tasol bai ol i stap gut long dispela King? Olsem wanem long yumi olgeta wan wan?
DISPELA KING YET I STAP GUT LONG GOD
3 Krais Jisas i mekim planti samting i kamapim long ples klia olsem em yet i stap gut long Jehova, em King Bilong Heven na Graun. Em i no surik liklik. Olsem na Baibel i kolim Jisas olsem ‘man bilong Jehova yet.’ (Sam 16:10; Aposel 2:24-27) Long tok Hibru, insait bilong dispela tok “stap gut long” man i olsem ‘mekim gut long’ man o ‘givim bel long’ man. Man i stap gut long narapela man, i no olsem em i bihainim lo o stretpela pasin tasol na em i stap gut long em; nogat; em i laikim tru dispela man na pilim tru ol gutpela pasin bilong em na em i stap gut long em.—Skelim Sam 40:8; Jon 14:31.
4 Bipo long heven, Seten i laik kisim biknem em bilong God tasol, na sampela ensel moa i lusim wok tru bilong ol long oganaisesen bilong Jehova long heven, tasol namba wan Pikinini bilong God i no bihainim pasin bikhet bilong ol. Em i no laik tru long bihainim pasin bilong ol! Em i no tingim skin bilong em yet; em i givim bel olgeta long Papa bilong em, olsem na em i redi long lusim biknem bilong em long heven na kamap man long graun na karim pen na i dai bambai em i ken bihainim laik bilong Papa bilong em. Em i laikim tumas Papa bilong em, olsem na em i mekim olgeta samting bilong truim ol tok profet Baibel i mekim long em.—Filipai 2:5-8; Luk 24:44-48.
5 Taim Jisas i stap long graun, Seten i putim planti traim long em bambai em i lusim wok God i bin givim long em—na sapos inap, Seten i laik pulim em long mekim wanpela pasin i no stret na bai God yet i sakim Pikinini bilong em. Seten i strong long Jisas i mekim ol samting bilong kisim bikpela nem na namba—tasol em bikpela nem na namba bilong dispela graun em Seten yet i stap bos bilong en. Jisas i sakim Seten. Em i kolim ol tok bilong Baibel i stiaim tingting bilong em. (Matyu 4:1-10) Jisas i gat bikpela save tru, tasol em i mekim gutpela wok long dispela bilong bihainim laik bilong God. Em i givim bel olgeta long mekim ol wok God i bin salim em bilong mekim. (Jon 7:16-18; 8:28, 29; 14:10) Em i gutpela piksa tru bilong pasin bilong i stap gut long God!
6 Jisas i stap gut long God, olsem na Jehova i kirapim bek em long matmat na “litimapim em na putim em antap tru. Na God i givim em wanpela nem i winim olgeta arapela nem. Em i givim dispela nem long Jisas, bai olgeta man . . . ol i ken kolim nem bilong Jisas na brukim skru long em. Na olgeta man i mas tokaut olsem, ‘Jisas Krais em i Bikpela.’ Na bai nem bilong God Papa em i stap antap tru.” (Filipai 2:9-11) Dispela “nem i winim olgeta arapela nem” i makim bikpela strong na namba Jisas i kisim bambai em inap mekim ol samting Jehova i laik bai em i mekim. Dispela tok “brukim skru long em” i makim olsem olgeta man i mas tingim bikpela wok em i kisim na ol i mas aninit long em. Ol i mas i stap gut long em, em i King bilong ol.
STAP GUT LONG OL MAN SPIRIT BILONG JEHOVA I BIN MAKIM OL
7 Taim Jisas i go antap long heven, nau lain bilong em long graun ol i no inap lukim em na dispela i traim bel bilong ol. Bai ol i bihainim yet ol lo em i bin lainim ol long en? Bai ol i klia long pasin bilong dispela graun? Bai ol i harim tok bilong ol man, em spirit holi i bin givim wok wasman long ol? Bai ol i givim bel olgeta long mekim wok Jisas i bin tokim ol long mekim?
8 Olsem wanem long ol “arapela sipsip” ol i kam bung wantaim “liklik lain” ol i bilong kisim Kingdom bilong heven? Bai ol i daun tru long Krais, em i King, na laikim tru ol brata? Ol samting i bin kamap i makim olsem olgeta insait long dispela “wanpela lain sipsip” aninit long Krais Jisas ol i laikim tru ol brata, olsem Jonatan pikinini bilong King Sol em i laikim tru Devit. Jonatan i lukim Devit i givim bel olgeta long Jehova, na Devit i bilip tru olsem Jehova bai helpim em taim em i kilim i dai draipela man Golaiat. Jonatan i pilim tru ol dispela gutpela pasin bilong Devit na Jonatan i “givim bel bilong en moa yet long Devit na em i laikim Devit tru olsem em i laikim em yet.” Bihain Jonatan i save Jehova i laik givim wok king long Devit na i no long em yet, tasol Jonatan i no bel nogut long dispela samting. Em i givim bel yet long Devit. Em i redi long i dai tu bilong helpim Devit.—1 Samuel 17:45-47; 18:1; 23:16, 17.
9 I no Jonatan tasol—i gat sampela man ol i no bilong lain Isrel, ol tu i laikim Devit na ol i bihainim em. Devit i no baim ol bilong kamap ami bilong em. Nogat. Ol i strongpela man bilong pait na ol i laikim tumas Devit, olsem na ol i go bihainim em, em dispela man spirit bilong God i bin makim em. Sampela ol i bilong lain Keret na lain Pelet, na sampela bipo ol i bilong biktaun Get bilong ol Filistia. Ol dispela man i stap gut long Devit taim pikinini man bilong Devit, em Apsalom, i laik grisim ol Isrel na bai ol i bihainim em. Maski Apsalom i gat biknem na em i mekim kain kain pasin giaman, tasol em i no inap grisim ol long bihainim em.—2 Samuel 15:6, 10, 18-22.
10 Sam 45 tu i stori gut long Krais na lain remnan na ol “arapela sipsip” ol i pas gut wantaim. Ol tok bilong dispela sam i no olsem naispela tok nating tasol; nogat; em i tok profet long Kingdom Krais i bosim—em God i “stap king bilong oltaim oltaim” em i as bilong dispela wok king bilong Jisas. (Sam 45:1-7; Hibru 1:8, 9) Man bilong raitim sam i stori long meri i laik marit long Krais, em ‘pikinini meri bilong king,’ na ol i bringim em i kam long King long de bilong marit. I gat sampela “yangpela meri i poroman bilong em ol i bihainim em i go.” Ol dispela “poroman” bilong em i makim husat? Ol i makim ol manmeri ol i wet long kisim laip long graun aninit long Kingdom bilong God. “Ol i amamas na belgut” na bihainim dispela lain ol i olsem “meri” bilong Krais na ol i mekim olsem i go inap long taim olgeta bilong dispela lain i go i stap wantaim Krais long heven. Ol dispela “poroman” i go wantaim ol “insait long bikpela haus king,” tasol i no olsem ol i go insait long heven. Nogat. Dispela tok i makim olsem ol i givim ol yet bilong mekim wok bilong King. Olsem wanem? Yu insait long dispela lain ol i amamas na bihainim ‘meri i laik marit’?—Sam 45:13-15.
YUMI MAS MEKIM WANEM BILONG I STAP GUT LONG KING?
11 I gat planti samting i save painim yumi na ol samting yumi mekim i kamapim long ples klia tingting bilong yumi—yumi bilip tru long Kingdom bilong God i stap long han bilong Krais o nogat? Yu tingim dispela Kingdom i stap tru? Jisas i tok, ol disaipel tru bilong em “ol i no bilong dispela graun.” Orait, olsem wanem long yu? Yu “no bilong dispela graun”?—Jon 17:15, 16.
12 Yumi mas i stap gut long King bilong yumi, tasol yumi sinman, olsem na yumi no inap mekim gutpela olgeta. Tasol yumi no ken bikhet na kalapim lo bilong God, maski ol narapela man i lukim yumi o nogat. Sapos yumi stap gut long King bilong yumi, bai yumi wok long bihainim moa yet ol lo bilong Baibel na yumi no ken bihainim liklik ol pasin bilong dispela graun. Bai yumi nolaik tru long ol pasin nogut.—Sam 97:10.
13 Sapos yumi nolaik tru long ol pasin nogut, bai yumi no laik kisim save long ol dispela kain pasin na bai yumi go klostu long en. Sapos man i laik kisim save long ol samting ol pamukman na pamukmeri i save mekim, bagarap inap painim em. (Provep 7:6-23) Na olsem tasol bagarap bilong spirit inap painim man i laik kisim save long tingting bilong ol man i bin lusim Jehova na em i baim na kaunim ol buk o nius ol dispela man i wokim. Ol dispela man i lusim pinis Jehova na oganaisesen bilong em, na long tok bilong ol i olsem ol i “paitim” ol man bipo ol i stap wanwok bilong ol. (Matyu 24:48-51) Provep 11:9 i toksave olsem: “Sapos ol man bilong mekim pasin nogut [olsem ol man i bin lusim Jehova] i toktok, dispela inap bagarapim ol arapela manmeri.” Tasol sapos yumi stap gut long King bilong yumi, dispela bai lukautim yumi na tok gris bilong ol dispela man i no ken giamanim yumi.—2 Jon 8-11.
14 Bikpela samting yumi ken mekim bilong kamapim long ples klia olsem yumi stap gut long God na long King Krais Jisas, em olsem: Yumi mas givim bel olgeta long mekim dispela wok Jisas i lainim ol disaipel bilong em long mekim. Em yet i makim pasin ol i mas bihainim—em i raun long ol taun na ol ples na autim gutpela tok bilong Kingdom bilong God. (Luk 8:1) Jisas i kolim wok ol Kristen tru i mas mekim long nau, em i tok: “Na bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Long rot bilong dispela wok, ol manmeri long olgeta hap i harim tok bilong Kingdom na ol i mas tingting: Ol i laikim dispela Kingdom o nogat? Bikpela lain manmeri ol i tingting pinis na ol i givim bel long Kingdom. Dispela samting bai helpim ol long abrusim bagarap long taim bilong bikpela hevi tru. (Revelesen 7:9, 10) Yu stap gut long dispela wok yumi mas mekim hariap?
15 Longtaim bipo Devit i raitim wanpela song o sam na em i tok: “Bikpela [Jehova], olgeta samting yu bin wokim bai i litimapim nem bilong yu. Na bai ol manmeri bilong yu ol i tenkyu long yu. Bai ol i tok long biknem bilong yu i stap long olgeta ples yu bosim, na bai ol i stori long bikpela strong bilong yu. Olsem na bai olgeta manmeri i ken save long ol bikpela wok yu bin mekim. Na ol i ken save yu stap strongpela king, na nem bilong yu i bikpela tru. Yu bai i stap king na bosim olgeta manmeri oltaim oltaim.” (Sam 145:10-13) Nau Jehova i mekim wok king bilong em long rot bilong dispela Kingdom i stap long han bilong Krais Jisas, em Man bilong i stap gut long God. Na sapos yumi givim bel long autim dispela tok bilong Kingdom, orait bai yumi kamapim long ples klia olsem yumi stap gut long God na long Krais.
16 Olsem wanem long yu? Yu givim bel long wok bilong autim tok bilong Kingdom? Yu save putim dispela wok i go pas long ol narapela samting yu laik mekim? Ating yu mekim bikpela wok i winim bilong sampela man, o ating yu mekim liklik wok tasol. Sampela ol inap mekim bikpela wok na sampela ol inap mekim liklik wok tasol. Tasol gutpela sapos yumi olgeta wan wan yumi skelim wok autim tok yumi mekim na yumi askim skin bilong yumi, olsem: ‘Mi tingting long mi mas mekim dispela wok na mi mekim liklik? Mi tingting tasol long abrusim bagarap na mi mekim? O mi laikim tumas Jehova na King Krais Jisas na mi sori long ol narapela man, olsem na mi tingim dispela wok i nambawan bikpela samting na ol narapela samting i nambatu?’ Sapos yumi stap gut long King bilong yumi, bai yumi mekim ol samting bilong kamapim long ples klia olsem yumi tingim dispela wok i bikpela samting na yumi givim bel long en olsem King bilong yumi i mekim.
17 Taim Krais Jisas i go insait long Jerusalem long yia 33 C.E., ol disaipel i amamas long em olsem King bilong ol. Liklik taim na bai dispela King i bagarapim olgeta man i sakim wok king Jehova i mekim long rot bilong em. Tasol dispela ‘bikpela lain manmeri’ ol i bin i stap gut long God olsem em yet i mekim, bai “em i tokim ol . . . long i stap bel isi.” Bai yu insait long dispela lain?—Sekaraia 9:10, NW; Efesas 4:20-24.
[Askim Bilong Stadi]
1. Taim Jisas i kam olsem King long yia 33 C.E., bikpela lain manmeri ol i mekim wanem?
2. (a) Planti man long nau ol i mekim wanem taim ol i harim tok olsem Krais em i nupela King bilong bosim graun? (b) Tasol i gat wanem ol askim yumi mas tingim gut?
3. (a) Bilong wanem Baibel i kolim Jisas olsem ‘man bilong Jehova yet’? (b) Wanem insait bilong dispela tok “stap gut long” man?
4, 5. (a) Taim Jisas i stap long heven na Seten i bikhet, Jisas i mekim wanem na em i kamapim long ples klia olsem em i stap gut long God? (b) Taim em i stap long graun, olsem wanem em i kamapim dispela pasin bilong em?
6. God i givim bikpela nem long Jisas, olsem na yumi mas mekim wanem?
7. Wanem samting i traim bel bilong ol man i bihainim Jisas?
8. Jonatan i laikim tru Devit na dispela i makim wanem samting?
9. Sampela ami bilong Devit, em ol i no bilong lain Isrel, olsem wanem ol i kamapim bel bilong ol, ol i givim bel long Devit?
10. (a) Sam 45 i stori olsem wanem long Krais na lain remnan na ol “arapela sipsip” ol i pas gut wantaim? (b) Ol poroman bilong meri i laik marit ol i mekim wanem na i olsem ‘ol i go insait long bikpela haus king’?
11. Wanem ol samting i save painim yumi na i traim bel bilong yumi olsem yumi “no bilong dispela graun”?
12. Yumi sinman, tasol yumi ken mekim wanem samting moa na bai yumi kamapim long ples klia olsem yumi stap gut long King bilong yumi?
13. Sapos yumi stap gut long King bilong yumi, olsem wanem dispela inap helpim yumi long sakim tok gris bilong ol man i bin lusim Jehova?
14. (a) I gat wanem bikpela samting yumi ken mekim bilong kamapim long ples klia olsem yumi stap gut long Krais, em i King? (b) Bilong wanem dispela wok em i bikpela samting tru?
15. (a) Sam 145:10-13 i tok, ol manmeri i stap gut long God ol bai tokaut long wanem samting? (b) Orait, yumi tu mas mekim wanem?
16. Sapos yumi stap gut long God, dispela bai kirapim yumi long wok olsem wanem long autim tok bilong Kingdom? Na sapos yumi stap gut long God, bai yumi gat wanem tingting long mekim dispela wok?
17. Taim Jisas i bagarapim ol man nogut, bai em i tokim husat “long i stap bel isi”?