Sapta 8
Ol i Wok Long Winim Pait
SMERNA
1. (a) Jisas i stap long heven na kisim biknem pinis na nau em i givim tok long wanem kongrigesen? (b) Jisas i tok, “mi man i stap namba wan tru na i stap bihain tru” na dispela i kirapim ol Kristen long Smerna long tingim wanem samting?
TAUN Efesus bilong bipo i bagarap pinis. Tasol namba 2 taun Jisas i salim tok long en em i stap yet na em i wanpela bikpela taun. Dispela biktaun bilong kantri Turki, nau ol i kolim Ismir, em i stap inap olsem 56 kilomita longwe long Efesus, long hap bilong not. I gat 4-pela kongrigesen bilong ol Witnes Bilong Jehova i wok strong long dispela taun long nau tu. Long taim bilong ol aposel, ol i kolim dispela taun olsem Smerna. Harim ol tok nau Jisas i mekim. Em i tokim Jon: “Na yu mas raitim sampela tok long ensel bilong sios [kongrigesen] i stap long taun Smerna. Dispela tok i olsem, ‘Mi man i stap namba wan tru na i stap bihain tru. Bipo mi dai pinis, tasol nau mi stap laip. Na mi salim dispela tok i kam long yu.’ ” (KTH 2:8) Jisas i salim dispela tok long ol Kristen long Smerna na dispela i kirapim ol long tingim Jisas em i stap gut long Jehova inap long em i dai, na em i namba wan man na laspela man em Jehova yet i bin kirapim bek bilong kisim laip oltaim long heven. Jisas yet bai kirapim bek olgeta narapela Kristen em God i makim ol. Olsem na em inap tru long givim tok long ol brata bilong em bilong stretim ol, em ol i wet long kisim laip oltaim wantaim em long heven.
2. Dispela Man ‘i dai pinis, tasol nau em i stap laip,’ olsem wanem tok bilong em i strongim bel bilong olgeta Kristen?
2 Jisas i go pas long bihainim stretpela pasin na long dispela as em i karim hevi. Tasol em i sanap strong na em i kisim pe i stret long dispela pasin em i mekim. Em i stap gut long God i go inap long em i dai na em i kirap bek. Dispela em i as na olgeta Kristen i ken bilip na wetim gutpela samting i kamap. (Aposel 17:31) Jisas i “dai pinis, tasol nau [em i] stap laip,” olsem na yumi save, sapos yumi bihainim tok i tru na yumi sanap strong maski wanem wanem kain hevi i painim yumi long dispela, orait gutpela pasin yumi mekim i no ken lus nating. Jisas i kirap bek na dispela samting i strongim bel bilong olgeta Kristen, na i strongim tru bel bilong ol taim ol i holimpas bilip na ol i karim hevi long dispela. Kain hevi olsem i painim yu? Orait, tok Jisas i givim long kongrigesen long Smerna inap strongim bel bilong yu, em i tok:
3. (a) Jisas i mekim wanem gutpela tok long ol Kristen long Smerna? (b) Ol Kristen long Smerna i stap rabis na bilong wanem Jisas i tok, ol i “gat planti samting moa yet”?
3 “Mi save long ol hevi na pen i bin kamap long yu, na mi save olsem yu stap rabis tru. Tasol yu gat planti samting moa yet. Na mi save long dispela tok bilas ol sampela man i save mekim long yu. Dispela ol man i save tok, ol i bilong lain Juda. Tasol ol i no bilong lain Juda. Nogat. Ol i lain bilong Satan tasol.” (KTH 2:9) Jisas i no gat tok long ol brata bilong em long Smerna; em i kolim tasol gutpela pasin ol i mekim. Ol i stap strong long bilip na ol i bin karim bikpela pen na hevi long dispela. Na ating long dispela as tasol ol i stap rabis long ol samting bilong skin. (Hibru 10:34) Tasol ol i gat bikpela tingting long ol samting bilong spirit, na ol i bin bungim ol gutpela gutpela samting bilong ol long heven, olsem Jisas i tok ol i mas mekim. (Matyu 6:19, 20) Olsem na long ai bilong Nambawan Wasman bilong ol sipsip i olsem ol i “gat planti samting.”—Lukim Jems 2:5.
4. Husat ol i birua tru long ol Kristen long Smerna? Jisas i ting olsem wanem long ol dispela birua?
4 Jisas i tok, ol Kristen long Smerna i bin kisim bikpela hevi long ol Juda. Pastaim planti man bilong lotu Juda ol i birua tru long wok bilong ol Kristen long autim tok. (Aposel 13:44, 45; 14:19) Jerusalem i bagarap na nau sampela yia bihain ol dispela Juda long Smerna i mekim yet dispela pasin bilong Satan. Olsem na Jisas i tok, ol i “lain bilong Satan”!a
5. Wanem ol traim bai painim ol Kristen long Smerna?
5 Dispela pasin birua i givim hevi long ol Kristen long Smerna, tasol Jisas i strongim bel bilong ol, em i tok: “Bihain liklik yu bai karim pen, tasol dispela i no ken mekim yu i pret. Harim. Satan bai i mekim, na ol bai i kalabusim sampela man namel long yupela, bilong traim yupela. Na bai yupela i karim hevi na pen inap long 10-pela de. Tasol yu mas holim bilip, i go inap long taim yu dai, na bai mi givim yu laip olsem prais.” (KTH 2:10) Tripela taim Jisas i tok, “yupela” na dispela i makim olsem tok bilong em i bilong kongrigesen olgeta. Jisas i no inap tok, liklik taim bai hevi bilong ol Kristen long Smerna i pinis. Nogat. Bihain bai sampela i karim pen na sampela i kalabus. Jisas i tok, bai ol i karim pen na hevi inap “10-pela de.” Namba “10” i makim samting bilong graun em inap tru. Olsem na ol dispela gutpela Kristen i holimpas bilip na i gat planti samting bilong spirit, ol i mas kisim traim inap tru taim ol i stap yet long graun.
6. (a) Bilong wanem ol Kristen long Smerna i no ken pret? (b) Taim Jisas i laik pinisim ol tok em i salim long kongrigesen long Smerna, em i tok wanem?
6 Tasol ol Kristen long Smerna i no ken pret o lusim bilip liklik. Sapos ol i holimpas bilip i go inap long taim ol i dai, bai ol i kisim “prais,” em laip i stap oltaim long heven. (1 Korin 9:25; 2 Timoti 4:6-8) Aposel Pol i tingim dispela prais em i gutpela samting tru na em i redi long lusim olgeta samting, laip bilong em long graun tu, bambai em i ken kisim. (Filipai 3:8) Ol dispela gutpela Kristen long Smerna i gat wankain tingting. Jisas i laik pinisim tok bilong em na em i tok: “Orait man i gat yau, em i mas harim gut dispela tok Holi Spirit i autim long ol sios [kongrigesen]. Sapos man i winim pait, orait namba 2 dai bai i no inap long bagarapim em. Nogat tru.” (KTH 2:11) Ol man i winim pait ol i no ken lus long kisim prais. Bai ol i kisim laip i stap oltaim long heven na ol i no ken i dai moa.—1 Korin 15:53, 54.
“Karim Hevi na Pen Inap Long 10-pela De”
7, 8. Long yia 1918 olsem wanem kongrigesen Kristen i kisim traim ‘inap tru,’ olsem ol Kristen long Smerna i bin kisim long bipo?
7 Ol Kristen long Smerna i bin karim hevi na pen, na olsem tasol long nau dispela lain em Jon i piksa bilong ol, na ol poroman bilong ol, ol i bin karim hevi na ol i karim yet. Satan i bin traim ol ‘inap tru.’ Tasol ol i bin sanap strong long traim na dispela i makim ol i lain bilong God stret. (Mak 13:9, 10) De bilong Bikpela i kirap na liklik taim bihain ol tok Jisas i bin salim long ol Kristen long Smerna i strongim tru bel bilong liklik lain bilong Jehova ol i bilong olgeta lain. (KTH 1:10) Kirap long yia 1879 dispela liklik lain i bin wok strong long kisim save long ol tok bilong God long Baibel na ol i autim ol dispela gutpela tok long ol narapela man. Tasol long taim bilong Namba Wan Pait Bilong Olgeta Hap, ol man i birua tru long ol. Hap as bilong dispela pasin birua i painim ol, em olsem: Ol i no helpim dispela pait. Na hap as em olsem: Ol i no pret long kamapim long ples klia rong bilong ol misin i holim nating nem Kristen. Sampela hetman bilong ol dispela misin i kirapim ol man long birua long dispela liklik lain, na dispela pasin birua i kamap strong tru long yia 1918 na i kain olsem pasin birua i bin painim ol Kristen long Smerna long han bilong ol Juda long dispela taun.
8 Bikpela pasin birua i kamap long hap bilong Amerika na bihain ol i putim nupela presiden bilong Sosaiti Was Taua, em Joseph F. Rutherford, na 7-pela wanwok bilong em long kalabus long Jun 22, 1918. Ol i givim 20 yia kalabus long ol. Tasol 9-pela mun bihain ol i baim ol na ol i lusim kalabus. Long Me 14, 1919, kot bilong apil i skelim gen ol na i tok, ol i no gat rong. Kot i tok, namba wan kot i bin popaia long lo inap 130 taim na i no stret kot i bin givim kalabus long ol. Jas Manton em wanpela Katolik na em i gat bikpela nem na namba (knight of the order of St. Gregory the Great) na em i no bin larim ol dispela Kristen i baim kalabus long 1918, tasol bihain, olsem long yia 1939, em yet i gat kot na ol i givim tupela yia kalabus long em na em i mas baim kot (inap K10,000). Em i kot long 6-pela rong bilong kisim grismani na paulim kot.
9. Taim Hitler i bosim Jemani em i mekim wanem long ol Witnes Bilong Jehova? Na ol pris pasto i ting olsem wanem long dispela?
9 Taim Hitler i bosim Jemani, em i tambuim wok autim tok bilong ol Witnes Bilong Jehova. Inap planti yia planti tausen Witnes i karim hevi long ol kalabus na planti ol i dai, na ol birua i kilim i dai olsem 200 yangpela man em ol i no laik insait long ami bilong Hitler na i go long pait. Yumi ken save ol pris pasto i bin helpim dispela pasin birua, long wanem wanpela pris Katolik i tok: “Nau i gat wanpela kantri long dispela graun i tambuim pinis dispela lain . . . [ol Witnes Bilong Jehova]. Em kantri Jemani! . . . Taim Adolf Hitler i kamap nambawan gavman, ol hetman bilong lotu Katolik long Jemani i askim em gen [long ol Witnes], na Hitler i tok, ‘Dispela lain [ol Witnes Bilong Jehova] ol i mekim na pasin nogut i kamap; . . . Mi ting ol i giaman tasol; mi no ken larim dispela man bilong Amerika, Jas Rutherford, i bagarapim ol Katolik long Jemani olsem. Mi tambuim [ol Witnes Bilong Jehova] long Jemani.’ ” Pris hia em i amamas tru long dispela tok.—Nius The German Way bilong Me 29, 1938.
10. (a) Wanem pasin birua i bin painim ol Witnes Bilong Jehova insait long de bilong Bikpela? (b) Ol dispela Kristen i bin go long kot bambai lo i no ken tambuim lotu bilong ol na planti taim wanem samting i bin kamap?
10 Nau planti yia bilong de bilong Bikpela i kamap i go pinis, tasol Satan wantaim lain bilong em ol i pait yet long liklik lain Kristen em God i makim ol, na long ol poroman bilong dispela liklik lain. Planti ol i bin kisim kalabus, na ol man i bin mekim nogut tru long ol. (KTH 12:17) Ol dispela birua i bin wok long “putim lo” bambai ol i ken mekim dispela pasin nogut, tasol lain bilong Jehova ol i strong long tok: “Mipela i mas bihainim tok bilong God tasol. Mipela i no ken bihainim tok bilong ol man.” (Song 94:20; Aposel 5:29) Long yia 1954 Wastaua (tok Inglis) i ripot olsem: “Insait long 40 yia i go pinis, long narapela narapela taim inap olsem 70 kantri i bin putim lo na tambuim ol Witnes Bilong Jehova na mekim nogut tru long ol.” Sapos i gat rot, ol dispela Kristen i bin i go long kot bilong stretim dispela samting bambai lo i no ken tambuim lotu bilong ol, na long sampela kantri ol i bin winim kot. Long Sprim Kot bilong Amerika ol i bin winim kot 50 taim, na i wankain tu long sampela kantri moa.
11. Jisas i kolim wanem samting bilong makim em i stap King pinis na dispela samting i bin painim ol Witnes Bilong Jehova long de bilong Bikpela?
11 I no gat narapela lain i bin wok strong olsem long bihainim lo bilong Jisas, em i tok yumi mas givim samting bilong Sisar long Sisar. (Luk 20:25; Rom 13:1, 7) Tasol i no gat narapela lain em ol kain kain gavman long planti kantri i bin kalabusim sampela bilong lain bilong ol, na ol i mekim yet long sampela kantri long Saut na Sentral Amerika, na long Yurop, na Afrika, na Esia. Taim Jisas i mekim bikpela tok profet bilong em na em i kolim ol samting bai makim olsem em i stap King pinis long heven, wanpela samting em i kolim i olsem: “Long dispela taim bai ol i kisim yupela bilong givim pen na hevi long yupela, na bai ol i kilim yupela i dai. Na olgeta lain manmeri bai ol i bel nogut tru long yupela, long wanem, nem bilong mi em i stap long yupela.” (Matyu 24:3, 9) Dispela samting i bin painim tru ol Witnes Kristen bilong Jehova long de bilong Bikpela.
12. Liklik lain em Jon i piksa bilong ol, ol i bin mekim wanem bilong strongim lain bilong God taim ol man i mekim nogut long ol?
12 Bilong strongim lain bilong God bambai ol inap sanap strong long taim bilong hevi na traim, liklik lain em Jon i piksa bilong ol, oltaim ol i bin kirapim ol brata long tingim ol tok Jisas i bin givim long ol Kristen long Smerna. Olsem: Taim Hitler i bosim Jemani na ol man i kirap mekim nogut long ol Witnes, sampela Wastaua (tok Inglis) bilong yia 1933 na 1934 i putim sampela stori olsem: “No Ken Pret Long Ol”; dispela stori i kamapim tok bilong Matyu 10:26-33. Narapela stori em “Paia” na i kamapim tok bilong Daniel 3:17, 18. Narapela stori em “Maus Bilong Ol Laion” na as tok bilong en em Daniel 6:22. Long 1980 i go 1989—long taim ol i wokim dispela buk namba wan taim long tok Inglis na ol man i mekim nogut tru long ol Witnes Bilong Jehova long planti kantri, winim 40—Wastaua i strongim lain bilong God long ol kain stori olsem: “Ol Man i Mekim Nogut Long Ol, Tasol Ol i Amamas!” na “Ol Kristen i Karim Hevi na Sanap Strong.”b
13. Taim ol man i mekim nogut long ol Witnes Kristen bilong Jehova, olsem wanem ol inap long sanap strong na i no pret olsem ol Kristen long Smerna long bipo?
13 Tru tumas, ol Witnes Kristen bilong Jehova i karim hevi inap “10-pela de.” Kain kain hevi na traim i painim ol. Tasol ol i sanap strong olsem ol Kristen long Smerna bipo i bin mekim; ol i no pret. Na maski ol hevi hia long graun i wok long kamap nogut moa yet, yumi no ken pret. Yumi redi pinis long karim hevi na sanap strong, na bai yumi amamas long mekim, maski ol i tekewe o “pulim” ol samting bilong yumi. (Hibru 10:32-34) Yumi yet yumi mas stadi long Baibel na putim ol dispela tok bilong God i go daun long bel bilong yumi, na bai yumi inap long sanap strong long bilip. Sapos yu holimpas bilip yu ken save, Jehova inap lukautim yu na em bai mekim olsem. “Olgeta hevi yupela i karim, yupela i mas putim long han bilong en.”—1 Pita 5:6-11.
[Ol Futnot]
a Jon i dai pinis na inap olsem 60 yia bihain, ol i bin kukim Polikap long paia na kilim em i dai long Smerna, long wanem em i bilip long Jisas na em i no laik lusim dispela bilip. Long dispela taim Polikap i gat 86 krismas. Wanpela buk (The Martyrdom of Polycarp) em ol man i ting ol i bin raitim long taim dispela samting i bin kamap, em i tok, taim ol man i bungim paiawut bilong wokim paia na kukim Polikap, “ol Juda i . . . givim bel long helpim dispela wok”—maski dispela em i “wanpela bikpela de Sabat.”
b Lukim Wastaua bilong Disemba 1983.
[Blok/Piksa long pes 39]
Inap planti yia, ol man bilong raitim ol buk i stori long ol samting i bin kamap long bipo, ol i save stori long ol Witnes Bilong Jehova long Jemani i bin holimpas bilip long taim bilong gavman bilong Hitler. Wanpela buk olsem (Mothers in the Fatherland, bilong Claudia Koonz, 1986) i tok: “Planti Jeman ol i no bilong lain bilong Hitler na ol i nolaik tru long dispela gavman, tasol bikpela hap lain bilong ol i save aninit long en. . . . Tasol i gat 20,000 Witnes Bilong Jehova, em ol i gat narapela bilip na tingting, na olgeta wantaim i no laik aninit liklik long dispela gavman. . . . Lotu bilong ol i strongim ol na ol i wanbel long sakim. Ol i no wok wantaim dispela gavman liklik. Lain polis bilong dispela gavman i bagarapim nambawan ofis bilong ol long Jemani long 1933 na tambuim lotu bilong ol long 1935, tasol ol i no lusim bilip liklik na ol i no kolim tok bilong litimapim Hitler. Bikpela hap lain (planti ol i man) bilong ol Witnes Bilong Jehova long Jemani ol i bin kalabus long ol banis kalabus nogut, na gavman i bin kilim i dai 1,000, na 1,000 ol i bin dai namel long 1933 na 1945. . . . Ol Katolik na Talatala i harim ol pris pasto bilong ol i kirapim ol long wok gut wantaim Hitler. Sapos ol i sakim tok, ol i brukim lo bilong misin na lo bilong gavman tu wantaim.”