Sapta 33
Jisas i Truim Tok Profet Bilong Aisaia
JISAS i kisim save pinis olsem ol Farisi na ol lain bilong Herot i laik kilim em i dai, olsem na em wantaim ol disaipel i lusim dispela ples na ol i go long hap bilong raunwara Galili. Bikpela lain bilong olgeta hap bilong Palestain na bilong ol narapela hap tu ol i kam long em. Jisas i oraitim planti sikman, olsem na ol man i gat sik ol i laik i go klostu na putim han long em.
Bikpela lain moa i pas long Jisas, olsem na em i tokim ol disaipel long putim wanpela bot i stap bambai em i ken kalap long en na lainim yet ol man i bung long nambis o i go long narapela hap bilong raunwara na helpim ol man.
Disaipel Matyu i stori long ol wok Jisas i mekim na em i tok dispela i truim “wanpela tok God i bin mekim long maus bilong profet Aisaia,” olsem:
“Dispela em i wokman bilong mi. . . . Mi laikim em tumas, . . . Bai mi putim Spirit bilong mi long em, na em bai i autim tok bilong stretpela pasin long olgeta lain manmeri bilong graun. Em bai i no mekim tok kros na singaut bikmaus. Ol manmeri bai i no harim em i toktok long ol rot. Pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut. . . . Na ol manmeri bilong ol arapela lain bai ol i bilip long em na wetim em i helpim ol.”
Jisas em i dispela wokman God i laikim tumas. Na Jisas i kamapim long ples klia stretpela pasin tru, em bilip bilong lotu giaman i wok long karamapim. Ol Farisi i gat tingting kranki long lo bilong God, olsem na long de Sabat ol i no save helpim man i gat sik! Bilong kamapim klia stretpela pasin bilong God, Jisas i helpim ol man long lusim ol dispela pasin i no stret, em ol hetman bilong lotu i bin kamapim. Olsem na ol hetman bilong lotu ya i laik kilim em i dai.
Wanem insait bilong dispela tok olsem em i no ken ‘mekim tok kros o singaut bikmaus, na ol manmeri i no ken harim em i toktok long ol rot’? Taim Jisas i oraitim sik bilong ol man em i save “tambuim ol long ol i no ken autim tok bilong em long ol arapela manmeri.” Em i no laik bai ol i singaut long ol bikrot na tokaut long wok em i mekim long oraitim sik, o ol i stori stori long ol wok em i mekim na stori i paul.
Na Jisas i save givim gutpela tok long ol man i olsem pitpit i no gat strong na i laik bruk, o ol i olsem lam i no lait gut. Em i mekim gut long ol. Long gutpela pasin sori, em i strongim ol man i gat pasin daun. Tru tumas, olgeta lain man i ken bilip long em na wetim em! Matyu 12:15-21; Mak 3:7-12; Aisaia 42:1-4.
▪ Olsem wanem Jisas i kamapim stretpela pasin long ples klia na em i no mekim tok kros o singaut long ol rot?
▪ Husat ol i olsem pitpit i no gat strong o lam i no lait gut? Jisas i mekim wanem kain pasin long ol?