Sapta 39

Ol Hambakman na Ol Man Bilong Pasin Daun

JISAS i stori long gutpela pasin bilong Jon Bilong Baptais, na bihain em i givim sampela tok long ol man i save hambak na senisim nabaut tingting bilong ol. Em i tok: “Ol manmeri bilong dispela taim . . . i olsem ol pikinini i sindaun i stap long ol ples bung na i singaut long ol arapela pikinini olsem, ‘Mipela i winim mambu bilong yupela i ken singsing, tasol yupela i no laik singsing.’ ”

Wanem insait bilong dispela tok? Jisas i tok: “Jon i kam, na em i no save kaikai planti na em i no save dring wain. Na ol i tok, ‘Spirit nogut i stap long en.’ Na Pikinini Bilong Man i kam, na em i kaikai na i dring, na ol i tok, ‘Lukim, em i man bilong kaikai planti tumas, na em i man bilong dring planti wain tumas. Em i pren bilong ol man bilong kisim takis na bilong ol man bilong mekim sin.’ ”

Ol dispela manmeri i no save amamas long wanpela samting. Jon i sakim ol laik bilong skin, long wanem em i wanpela Promisman i givim em yet long God. Ensel i tok pinis, Jon “i no ken dring wain na bia samting.” Tasol ol man i tok, wanpela spirit nogut i stap long em. Jisas i kaikai na dring wankain olsem ol narapela man, tasol ol man i tok, em i save kaikai na dring tumas.

I hatwok tru long amamasim ol dispela man! Ol i olsem ol pikinini, em ol i no laik singsing taim ol narapela pikinini i winim mambu. Tasol Jisas i tok, “Ol wok bilong God i soim olsem save bilong en em i samting tru.” Tru tumas, ol wok bilong Jon na Jisas i soim olsem ol tok ol man i sutim long tupela em i giaman.

Bihain Jisas i krosim ol lain bilong sampela taun em i bin wokim planti mirakel long en, olsem Korasin, na Betsaida, na Kaperneam. Sapos em i bin wokim ol dispela mirakel long ol taun bilong ol Fonisia, olsem taun Tair na Saidon, Jisas i tok, longtaim bipo bai ol Tair na Saidon i tanim bel pinis. Jisas i krosim ol Kaperneam, na em i tok: “Long de God i makim bilong kotim ol manmeri, hevi i kamap long yupela bai i winim tru hevi i kamap long ol Sodom.”

Jisas i mekim pinis dispela tok na bihain em i litimapim nem bilong Papa bilong em. Em i mekim olsem, long wanem God i save haitim ol gutpela tok i tru bilong em long ol saveman, tasol God i soim dispela gutpela tok long ol man i gat pasin daun olsem bilong ol pikinini.

Jisas i singautim ol man i kam long em na em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, . . . long wanem, mi save mekim pasin isi long ol man na mi save daunim mi yet. Na bai . . . yupela i kisim malolo.”

Olsem wanem Jisas i givim malolo long ol man? Em i helpim ol long lusim ol pasin bilong lotu na ol bikpela hevi ol hetman bilong lotu i bin putim long ol, olsem ol hetman i kolim planti samting ol i mas mekim bilong bihainim lo bilong Sabat na i hatwok tumas long ol i mekim. Na ol man i karim hevi aninit long ol gavman politik, Jisas i soim rot long ol bambai dispela hevi inap tekewe long ol. Na ol man i bel hevi long wanem ol i bin mekim rong, em i soim rot long ol bambai dispela bel hevi bilong ol i ken pinis. Em i soim rot long ol bambai sin bilong ol i ken tekewe na ol i ken i stap wanbel wantaim God.

Jisas i laik bai yumi dediket long God na givim skin bilong yumi olgeta bilong mekim wok bilong God, em i gutpela Papa bilong yumi na Man bilong pasin sori na pasin marimari. Sapos yumi laik kisim laip oltaim, yumi mas bihainim ol lo bilong God tasol, em ol lo i stap long Baibel. Na dispela i no save givim hevi long yumi. Matyu 11:16-30; Luk 1:15; 7:31-35; 1 Jon 5:3.

▪ Ol manmeri long taim bilong Jisas, olsem wanem ol i olsem pikinini?

▪ Wanem samting i kirapim Jisas long litimapim nem bilong Papa bilong em?

▪ Ol man i karim wanem ol hevi? Jisas i mekim wanem tok promis bilong helpim ol?